കള്ളപ്പണ കേസില്‍ സുപ്രീം കോടതിയില്‍ കള്ളപ്പണക്കാരുടെ പേരുകള്‍ വെളിപ്പെടുത്തുന്ന വിഷയത്തില്‍ കേന്ദ്ര സര്‍ക്കാര്‍ മലക്കം മറിഞ്ഞു. വിദേശബാങ്കുകളില്‍ കള്ളപ്പണം നിക്ഷേപിച്ചവരുടെ പേരുവിവരങ്ങള്‍ പുറത്തുവിടാന്‍ കഴിയില്ലെന്ന് കേന്ദ്രം സുപ്രീം കോടതിയില്‍ സത്യവാങ്മൂലം സമര്‍പ്പിച്ചു. വിവരങ്ങള്‍ നല്കുന്നത് അന്താരാഷ്ട്ര ഉടമ്പടികളുടെ ലംഘനമാണെന്നാണ് സര്‍ക്കാര്‍ വാദം.

കള്ളപ്പണം നിക്ഷേപിച്ചവരുടെ പേരുകള്‍ ബന്ധപ്പെട്ട ഏജന്‍സികളുമായി പങ്കുവയ്ക്കാമെന്നും കേന്ദ്രം വ്യക്തമാക്കി. മോഡി സര്‍ക്കാര്‍ കള്ളപ്പണ നിക്ഷേപകരെ സംരക്ഷിക്കുന്നുവെന്നും ഇവരുടെ വിവരം പുറത്തുവിടണമെന്നും ആവശ്യപ്പെട്ട് മുന്‍ ബിജെപി നേതാവും മുതിര്‍ന്ന അഭിഭാഷകനുമായ രാം ജേഠ്മലാനിയാണ് സുപ്രീം കോടതിയെ സമീപിച്ചത്. കേസില്‍ ഈ മാസം 28ന് വീണ്ടും വാദം കേള്‍ക്കും.
വിദേശ രാജ്യങ്ങളിലെ ബാങ്കുകളില്‍ കള്ളപ്പണക്കാര്‍ നിക്ഷേപിച്ചിരിക്കുന്ന പണം ഇന്ത്യയില്‍ തിരിച്ചുകൊണ്ടുവരുമെന്നും വികസന പദ്ധതികള്‍ക്കായി ഉപയോഗിക്കുമെന്നും ഇത്തരക്കാരുടെ പേര് വിവരങ്ങള്‍ പുറത്തുവിടുമെന്നുമുള്ളത് ബിജെപിയുടെ പ്രധാന തെരഞ്ഞെടുപ്പ് വാഗ്ദാനങ്ങളില്‍ ഒന്നായിരുന്നു. സര്‍ക്കാര്‍ അധികാരത്തിലേറിയയുടന്‍ കള്ളപ്പണ നിക്ഷേപം പരിശോധിക്കുന്നതിന് പ്രത്യേക അന്വേഷണ സംഘത്തെയും നിയോഗിച്ചിരുന്നു. ഇതിനിടെയാണ് കോടതിയില്‍ സര്‍ക്കാര്‍ മറിച്ചുള്ള നിലപാട് സ്വീകരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha