ഇഞ്ചിയോണ്‍ ഏഷ്യന്‍ ഗെയിംസില്‍ ഇന്ത്യയ്ക്കായി സ്വര്‍ണം ഇടിച്ചു വാങ്ങിയ മേരികോം എന്ന അഭിമാന താരം ഞെട്ടിക്കുന്ന വെളിപ്പെടുത്തലുമായി രംഗത്ത്. താനും പീഡനത്തിന്റെ ഇരയാണെന്നാണ് ഇന്ത്യയുടെ സൂപ്പര്‍ ബോക്‌സിംഗ് താരത്തിന്റെ വെളിപ്പെടുത്തല്‍. 2004ല്‍ രോഹ്തക്കിലുള്ള ഒരു ക്യാമ്പില്‍ വച്ച് ഒരാള്‍ തന്നെ മാനഭംഗപ്പെടുത്താന്‍ ശ്രമിച്ചതായാണ് മേരി പറഞ്ഞത്. നടക്കാനിറങ്ങിയ തന്നെ ഒരാള്‍ പുറകില്‍ നിന്നും വന്ന് സ്പര്‍ശിക്കുകയായിരുന്നു. 

ഇത്തരം സംഭവങ്ങള്‍ ഡല്‍ഹിയില്‍ മാത്രമല്ല സംഭവിക്കുന്നതെന്നും മേരി കോം വ്യക്തമാക്കി. ഒരിക്കല്‍ മണിപ്പൂരില്‍ വച്ചും ഇതേ പോലൊരു അനുഭവം തനിക്കുണ്ടായിട്ടുണ്ട്. പള്ളിയില്‍ പോകാനിറങ്ങിയ തന്നെ ഒരു റിക്ഷാക്കാരന്‍ മാനഭംഗപ്പെടുത്താന്‍ ശ്രമിച്ചിട്ടുണ്ട്. ചെരുപ്പുമായി താന്‍ അയാളെ പിന്തുടര്‍ന്നെങ്കിലും അയാള്‍ രക്ഷപെടുകയായിരുന്നു.
ഡല്‍ഹിയില്‍ 2006ല്‍ തന്റെ സുഹൃത്തായ ജന്നിഫറിനും ഇത്തരത്തിലൊരു മോശം അനുഭവം ഉണ്ടായിട്ടുണ്ട്. അന്ന് തങ്ങള്‍ ഒരുമിച്ച് ലോദി കോളനിയിലൂടെ പോകുമ്പോള്‍ രണ്ട് പേര്‍ ബൈക്കിലെത്തി ജന്നിഫറിനെ അപമാനിക്കാന്‍ ശ്രമിച്ചുവെന്നാണ് മേരി കോം പറഞ്ഞത്.
ഏഷ്യന്‍ ഗെയിംസിലെ തന്റെ നേട്ടം രാജ്യം ആഘോഷിക്കുമ്പോഴാണ് വടക്ക്കിഴക്കന്‍ സംസ്ഥാനങ്ങളില്‍ നിന്നുള്ളവര്‍ രാജ്യത്തിന്റെ പല ഭാഗത്തും വംശീയ അധിക്ഷേപത്തിന് ഇരയാകുന്നത്. ഈ പ്രവണത നിരാശാജനകമാണെന്നും മേരി കോം വ്യക്തമാക്കി. ചൊവ്വാഴ്ച ബാംഗ്ലൂരിലൊരു മണിപ്പൂരി വിദ്യാര്‍ത്ഥിയും ഗൂര്‍ഗണില്‍ നാഗാലാന്റ് സ്വദേശികളായ രണ്ട് പേരും ആക്രമണത്തിന് ഇരയായിരുന്നു. ഇത്തരം ആക്രമണങ്ങള്‍ ശരിയല്ല. ആര്‍ക്കെതിരിയും വേര്‍തിരിവ് പാടില്ല. ആരാണ് തെറ്റുകാരനെന്ന് കണ്ടെത്താതെ ഒരു കാര്യം തീര്‍ച്ചപ്പെടുത്തുന്നത് നിര്‍ഭാഗ്യകരമാണ്.ആര്‍ക്കും ആരെയും ഉപദ്രവിക്കാനോ കൊലപ്പെടുത്താനോ ഉള്ള അധികാരമില്ലെന്നും മേരി പറയുന്നു.നമ്മളെല്ലാവരും ഇന്ത്യക്കാരാണ്. നമ്മളുടെ മെഡലുകള്‍ ഇന്ത്യയ്ക്കുള്ളതാണ്. പിന്നെന്തിന് സംസ്ഥാനത്തിന്റെ പേരില്‍ വേര്‍ തിരിവെന്നും മേരി ചോദിക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha