മഹാരാഷ്ട്ര, ഹരിയാന നിയമസഭാ തിരഞ്ഞെടുപ്പുകളില്‍ ബിജെപിയ്ക്കു ചരിത്ര നേട്ടം. ഹരിയാനയില്‍ ബിജെപി അധികാരത്തിലേക്ക്. പത്തുവര്‍ഷം അധികാരത്തിലിരുന്ന കോണ്‍ഗ്രസിനെ മൂന്നാം സ്ഥാനത്തേക്കു തള്ളിയാണ് ബിജെപി കേവലഭൂരിപക്ഷം നേടിയത്. ഓംപ്രകാശ് ചൗത്താലയുടെ ഐഎന്‍എല്‍ഡിയാണ് രണ്ടാം സ്ഥാനത്ത്. 90 അംഗ നിയമസഭയില്‍ 47 സീറ്റുകളില്‍ വിജയിച്ചാണ് ബിജെപി അധികാരത്തിലേക്ക് എത്തുന്നത്. 19 സീറ്റില്‍ വിജയിച്ച ഐഎന്‍എല്‍ഡി കോണ്‍ഗ്രസിനെ പിന്തള്ളി രണ്ടാം സ്ഥാനത്ത് എത്തി.
അതേസമയം മഹാരാഷ്ട്രയില്‍ ബിജെപി ഏറ്റവും വലിയ ഒറ്റക്കക്ഷിയായി. ശിവസേനയുമായുള്ള കാല്‍നൂറ്റാണ്ട് നീണ്ട ബന്ധം അവസാനിപ്പിച്ച ശേഷം ഒറ്റയ്ക്ക് മത്സരിച്ചാണ് ബിജെപി ശക്തി തെളിയിച്ചത്. ബിജെപി 123 സീറ്റിലും ശിവസേന 61 സീറ്റിലും കോണ്‍ഗ്രസ് 43 സീറ്റിലും എന്‍സിപി 41 സീറ്റിലുമാണ് മുന്നിട്ടു നില്ക്കുന്നത്. മുഖ്യമന്ത്രിപദം മോഹിച്ച ഉദ്ദവ് താക്കറേയ്ക്ക് ബിജെപിയുടെ മറുപടിയുമായി.
അതേസമയം, എന്‍സിപിയുമായുള്ള ബന്ധം ഉപേക്ഷിച്ച് ഒറ്റയ്ക്ക് മത്സരിച്ച കോണ്‍ഗ്രസിന് കനത്ത തിരിച്ചടിയാണ് നേരിട്ടത്. ബിജെപിക്കും ശിവസേനയ്ക്കും പിന്നില്‍ മൂന്നാം സ്ഥാനത്തേക്ക് ഒതുങ്ങി കോണ്‍ഗ്രസ്. കോണ്‍ഗ്രസിന്റെയും എന്‍സിപിയുടെയും സ്വാധീന മേഖലകള്‍ ബിജെപി പിടിച്ചെടുത്തു. കോണ്‍ഗ്രസിന്റെ പരമ്പരാഗത മണ്ഡലങ്ങളിലും ബിജെപിയുടെ മുന്നേറ്റമാണ് കാണുന്നത്.

പ്രധാനമന്ത്രി നരേന്ദ്ര മോഡിയുടെ നേതൃത്വത്തിലുള്ള പ്രചാരണത്തിന്റെ വിജയമാണ് ചരിത്രനേട്ടത്തിലൂടെ ബിജെപി കരസ്ഥമാക്കിയത്. 

മഹാരാഷ്ട്രയില്‍ കേവലഭൂരിപക്ഷം നേടാന്‍ കഴിയാതെ പോയതിനാല്‍ ശിവസേനയുടെയോ എന്‍സിപിയുടെയോ പിന്തുണ ബിജെപിക്ക് വേണ്ടിവരും. ഈ സാഹചര്യത്തില്‍ ബിജെപിയും ശിവസേനയും വീണ്ടും സഖ്യത്തിലെത്താനാണ് സാധ്യത. എന്‍സിപി ബിജെപിക്ക് പിന്തുണ നല്‍കാമെന്ന് പ്രസ്ഥാവന നടത്തി. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha