ഉത്തര ഡല്‍ഹിയിലെ തിമര്‍പൂരിലുളള 65-കാരന് മേയ് എട്ടിന് ഫോണിലേക്ക് ഒരു സന്ദേശമെത്തി. ബാങ്ക് അക്കൗണ്ടില്‍ നിന്ന് 2700 രൂപ പിന്‍വലിച്ചെന്നായിരുന്നു സന്ദേശം. ബാലന്‍സ് പരിശോധനയില്‍ അക്കൗണ്ടില്‍ അവശേഷിക്കുന്നത് 275 രുപ മാത്രമാണെന്ന് കണ്ടെത്തി. അക്കൗണ്ടിലുണ്ടായിരുന്ന 2.34 ലക്ഷം എവിടെ പോയി എന്നതായിരുന്നു അദ്ദേഹത്തെ ആശങ്കപ്പെടുത്തിയത്. എന്നാല്‍ പേടിഎം വഴി രണ്ടു മാസത്തിനുള്ളില്‍ പലയിടങ്ങളിലേക്ക് മാറ്റപ്പെട്ടുവെന്ന് ബാങ്കില്‍ നിന്ന് മറുപടി കിട്ടിയതോടെ പരാതിയുമായി പോലീസിനെ സമീപിച്ചു.

രണ്ടു മാസം പോലീസ് അന്വേഷിച്ചിട്ട് കാര്യമായ തുമ്പുണ്ടായില്ല. ഇതേതുടര്‍ന്ന് സെപ്തംബര്‍ ഒന്നിന് കേസ് ക്രൈംബ്രാഞ്ചിന് കൈമാറി. പണം കൈമാറിയത് ആര്‍ക്കാണെന്ന് അറിയാന്‍ ക്രൈംബ്രാഞ്ച് പേടിഎമ്മുമായി ബന്ധപ്പെട്ടു. ഇതോടെ പിടിയിലായ പ്രതിയെ കണ്ട് ആ മുത്തച്ചന്‍ ഞെട്ടി. അദ്ദേഹത്തിന്റെ കൊച്ചുമകനാണ് പിടിയിലായത്.

അതേസമയം, തന്റെ അക്കൗണ്ട് പാസ്വേര്‍ഡും ഐഡിയും ഒരു സുഹൃത്ത് ആവശ്യപ്പെട്ടിരുന്നുവെന്നും കുട്ടി പറഞ്ഞു. മാസങ്ങളായി താന്‍ പബ്ജി കളിക്കുന്നുണ്ട്. എന്നല്‍ ചില അഡ്വവാന്റേജുകള്‍ക്ക് പണം മുടക്കാനില്ലാത്തതിനാല്‍ തൃപ്തനായിരുന്നില്ല. ഒരു ദിവസം മുത്തചഛന്റെ ഡെബിറ്റ് കാര്‍ഡ് വീട്ടില്‍ നിന്നു കിട്ടി. ഇതുപയോഗിച്ച് പണം നല്‍കി. ഓരോ തവണയും ഇടപാട് നടക്കുമ്പോള്‍ മുത്തച്ഛന്റെ ഫോണിലേക്ക് ഒടിപി വന്നിരുന്നു. ഫോണ്‍ കൈക്കലാക്കി ഇത് ഡിലീറ്റ് ചെയ്യുകയായിരുന്നുവെന്ന് കൊച്ചുമകന്‍ പറയുന്നു.

രണ്ടു മാസത്തോളം ഇത്തരത്തില്‍ പണം നഷ്ടപ്പെട്ടു. എന്നാല്‍ ആ പണം പൂര്‍ണ്ണമായും താന്‍ കളിച്ചുകളഞ്ഞതല്ലെന്നാണ് 'പയ്യന്റെ' നിലപാട്. ഒരു പ്രത്യേക ലെവലില്‍ എത്തിയപ്പോള്‍ തന്റെ പബ്ജി അക്കൗണ്ട് ഹാക്ക് ചെയ്യപ്പെട്ടുവെന്ന് പയ്യന്‍ ദ്വാരക പോലീസ് കമ്മീഷണര്‍ ആന്റോ അല്‍ഫോന്‍സെയ്ക്ക് മുന്നില്‍ കുറ്റസമ്മതം നടത്തി.

പണം നഷ്ടപ്പെട്ടതോടെ മുത്തച്ഛന്‍ പരാതി നല്‍കിയിരുന്നെങ്കിലും നിയമനടപടിയുമായി മുന്നോട്ടുപോകാനില്ലെന്ന് അദ്ദേഹം പറയുന്നു. പണം നഷ്ടപ്പെട്ടത് എങ്ങനെയാണെന്ന് കണ്ടെത്തിയാല്‍ മാത്രം മതിയായിരുന്നുവെന്നാണ് ഇപ്പോഴദ്ദേഹത്തിന്റെ നിലപാട്.