തീര്‍ത്ഥാടകര്‍ക്കിടയിലേയ്ക്ക് കാര്‍ ഇടിച്ചു കയറി നാല് പേര്‍ മരണപ്പെട്ടു, 16 പേര്‍ക്ക് പരിക്ക്; കാറില്‍ നിന്ന് കഞ്ചാവ് കണ്ടെടുത്തതായും റിപ്പോര്‍ട്ടുകള്‍
ദസറ ആഘോഷങ്ങള്‍ക്കിടെ തീര്‍ത്ഥാടകര്‍ക്കിടയിലേയ്ക്ക് കാര്‍ ഇടിച്ചുകയറി നാല് പേര്‍ മരണപ്പെട്ടു. ഛത്തീസ്ഗഡിലെ ജഷ്പുര്‍ ജില്ലയിലാണ് സംഭവം. അപകടത്തില്‍ 16 പേര്‍ക്ക് പരിക്കേറ്റാതായും റിപ്പോര്‍ട്ടുകള്‍ പറയുന്നു. പരിക്കേറ്റവരെ പത്തല്‍ഗാവ് സിവില്‍ ആശുപത്രിയില്‍ പ്രവേശിപ്പിച്ചിരിക്കുകയാണ്.
ദുര്‍ഗാദേവിയുടെ വിഗ്രഹം നിമജ്ജനം ചെയ്യാന്‍ നടന്നു പോകുന്ന 20ഓളം തീര്‍ത്ഥാടകര്‍ക്കിടയിലേയ്ക്കാണ് മധ്യപ്രദേശ് നമ്പര്‍ പ്ലേറ്റുള്ള കാര്‍ ഇടിച്ചുകയറിയത്. രോഷാകുലരായ നാട്ടുകാര്‍ കാര്‍ അടിച്ചു തകര്‍ത്തു. കാറില്‍ നിന്ന് കഞ്ചാവ് കണ്ടെടുത്തതായും റിപ്പോര്‍ട്ടുകളുണ്ട്. രണ്ട് പ്രതികളെ അറസ്റ്റ് ചെയ്തതായി ജില്ലാ പൊലീസ് മേധാവിയുടെ ഓഫിസ് അറിയിച്ചു.
മധ്യപ്രദേശിലെ സിംഗ്രോളി സ്വദേശികളായ ബബ്ലു വിശ്വകര്‍മ (21), ശിശുപാല്‍ സാഹു (26) എന്നിവരാണ് അറസ്റ്റിലായത്. സംഭവത്തില്‍ ദുഃഖം രേഖപ്പെടുത്തിയ ഛത്തീസ്ഗഡ് മുഖ്യമന്ത്രി ഭൂപേഷ് ബാഗേല്‍ അന്വേഷണത്തിന് ഉത്തരവിട്ടു.
ഈ മാസം ആദ്യം ഉത്തര്‍പ്രദേശിലെ ലഖിംപുര്‍ ഖേരിയില്‍ കേന്ദ്ര ആഭ്യന്തര സഹമന്ത്രി അജയ് മിശ്രയുടെ മകന്‍ ആശിഷ് മിശ്രയുടെ വാഹനം കര്‍ഷകര്‍ക്കിടയിലേക്ക് ഇടിച്ചുകയറി നാലു കര്‍ഷകര്‍ ഉള്‍പ്പെടെ 8 പേര്‍ മരിച്ചിരുന്നു.
https://www.facebook.com/Malayalivartha
