അച്ഛന്റെ അടിയേറ്റ് അഞ്ചു വയസുകാരനായ മകന്‍ മരിച്ചു. പഠിക്കാതെ മൊബൈലില്‍ ഗെയിം കളിച്ചു കൊണ്ടിരിക്കുന്നത് കണ്ട് അസ്വസ്ഥനായതിനെ തുടര്‍ന്ന് പിതാവ് മകനെ അടിക്കുകയായിരുന്നു.

മരകഷ്ണം കൊണ്ടുള്ള അടിയേറ്റ് നിലത്തുവീണ കുട്ടിയെ ഉടനെ തന്നെ ആശുപത്രിയില്‍ കൊണ്ടു പോയെങ്കിലും ജീവന്‍ രക്ഷിക്കാനായില്ല.

ഡല്‍ഹിയിലെ കാന്‍പൂര്‍ മേഖലയില്‍ വ്യാഴാഴ്ചയാണ് സംഭവം നടന്നത്. 27 കാരനായ ആദിത്യ പാണ്ഡെയാണ് മകനെ തല്ലിയത്. പഠിക്കാതെ, മൊബൈലില്‍ ഗെയിം കളിച്ചു കൊണ്ടിരിക്കുന്നതാണ് പിതാവിനെ പ്രകോപിപ്പിച്ചത്. അടിയേറ്റ് വീണ കുഞ്ഞിനെ അമ്മയാണ് ആശുപത്രിയിലെത്തിച്ചത്.

അടിയുടെ ആഘാത്തില്‍ അബോധാവസ്ഥയിലായ കുട്ടിയുടെ കഴുത്തില്‍ അടിയേറ്റ പാടുണ്ടെന്ന് മെഡിക്കല്‍ റിപ്പോര്‍ട്ട് വ്യക്തമാക്കുന്നു. തുടക്കത്തില്‍ കുട്ടിക്ക് പരുക്കേല്‍ക്കാനുള്ള കാരണത്തെ കുറിച്ച് വ്യക്തമായി ഉത്തരം പറയാന്‍ വീട്ടുകാര്‍ തയാറായില്ലെന്ന് ഡോക്ടര്‍മാര്‍ പറയുന്നു.

കുട്ടിയുടെ ശരീരത്തില്‍ കൈകളിലും കാലുകളിലും കഴുത്തിലും അടിയേറ്റ പാടുണ്ടെന്നും ഡോക്ടര്‍മാര്‍ പറയുന്നു. തുടര്‍ന്ന് പൊലീസ് വിശദമായി ചോദ്യം ചെയ്തപ്പോഴാണ് പിതാവ് കുറ്റസമ്മതം നടത്തിയത്. പഠിക്കാതെ മൊബൈലില്‍ കളിച്ചു കൊണ്ടിരിക്കുന്നത് കണ്ടതാണ് ദേഷ്യത്തിന് കാരണമെന്ന് ആദിത്യ പറഞ്ഞതായി പൊലീസ് പറയുന്നു. കുട്ടിയുടെ മൃതദേഹം എയിംസില്‍ പോസ്റ്റ്‌മോര്‍ട്ടത്തിനായി സൂക്ഷിച്ചിരിക്കുകയാണ്. സെക്ഷന്‍ 302 പ്രകാരമാണ് കേസെടുത്തിരിക്കുന്നത്.