ന്യുയോര്‍ക്കില്‍ ചേരുന്ന യു.എന്‍ ജനറല്‍ അസംബ്ലയില്‍ ഇന്ത്യയുമായി ഉപാധിരഹിത ചര്‍ച്ചയ്ക്കില്ലെന്ന് പാകിസ്താന്‍ ദേശീയ സുരക്ഷാ ഉപദേഷ്ടാവ് സര്‍താജ് അസീസ്. കശ്മീര്‍ വിഷയം അജണ്ടയാക്കാത്ത ഒരു ചര്‍ച്ചയ്ക്കും പാകിസ്താന്‍ തയ്യാറല്ല. ഭീകര പ്രശ്‌നം മാത്രമാണ് ഇന്ത്യയ്ക്ക് ഉയര്‍ത്താനുള്ളത്. എന്നാല്‍ കശ്മീര്‍ അടക്കം എല്ലാ വിഷയങ്ങളും ചര്‍ച്ച ചെയ്യണമെന്നാണ് പാകിസ്താന്റെ ആവശ്യമെന്നും അസീസ് പറഞ്ഞു. ഒരു ദേശീയ ദിനപത്രത്തിന് അനുവദിച്ച അഭിമുഖത്തിലാണ് അസീസ് നിലപാട് വ്യക്തമാക്കിയത്.
യു.എന്‍ യോഗത്തില്‍ പ്രധാനമന്ത്രി നരേന്ദ്ര മോഡിയും നവാസ് ഷെരീഫും പങ്കെടുക്കാനിരിക്കേയാണ് പാകിസ്താന്‍ വീണ്ടും നിലപാട് കടുപ്പിക്കുന്നത്. ഇരുരാജ്യങ്ങളും തമ്മിലുള്ള നയതന്ത്ര വിടവ് വര്‍ധിക്കുമെന്ന സൂചനയാണ് അസീസ് നല്‍കുന്നത്. പാകിസ്താന്റെ നിലപാട് സുതാര്യമാണ്. കഴിഞ്ഞ മാസം നടക്കേണ്ടിയിരുന്ന എന്‍.എസ്.എ തല ചര്‍ച്ച വേണ്ടെന്നുവച്ചത് ഇന്ത്യയാണ്. അതുകൊണ്ടുതന്നെ ഇനിയൊരു ചര്‍ച്ചയ്ക്കുള്ള ആവശ്യം ഉയരേണ്ടത് ഇന്ത്യയുടെ ഭാഗത്തുനിന്നാണ്. ഇന്ത്യയാണ് മുന്‍കൈയെടുക്കേണ്ടതെന്നും അസീസ് വ്യക്തമാക്കി.
കഴിഞ്ഞ മാസം 24ന് അസീസും ഇന്ത്യയുടെ ദേശീയ സുരക്ഷ ഉപദേഷ്ടാവ് അജിത് ഡോവലും തമ്മില്‍ ഡല്‍ഹിയില്‍ നടക്കേണ്ടിയിരുന്ന ചര്‍ച്ചയില്‍ നിന്ന് അവസാന നിമിഷം ഇന്ത്യ പിന്‍മാറുകയായിരുന്നു. കശ്മീര്‍ വിഘടനവാദി നേതാക്കളെ അത്താഴ വിരുന്നിന് ക്ഷണിച്ച പാകിസ്താന്‍ ഹൈക്കമ്മീഷണര്‍ അബ്ദുള്‍ ബാസിതിന്റെ തീരുമാനമായിരുന്നു ഇതിനു പിന്നില്‍..

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha