ബോംബെ ഹൈക്കോടതി വിധിയില്‍ ഇടപെടാനാകില്ലെന്ന് തുറന്നടിച്ച് സുപ്രീം കോടതി. ജൈനമതക്കാരുടെ ഉല്‍സവത്തോടനുബന്ധിച്ച് മുംബൈയില്‍ മാംസവില്‍പന നിരോധിച്ചുകൊണ്ടുള്ള മഹാരാഷ്ട്ര സര്‍ക്കാരിന്റെ നടപടി റദ്ദാക്കിയ വിഷയത്തിലാണ് സുപ്രീകോടതിയുടെ പരാമര്‍ശം.

ജസ്റ്റിസ് ടി.എസ്. താക്കൂര്‍, ജസ്റ്റിസ് കുര്യന്‍ ജോസഫ് എന്നിവര്‍ ഉള്‍പ്പെട്ട ബഞ്ചാണ് മാംസവില്‍പന നിരോധനം റദ്ദാക്കിയ ബോംബെ ഹൈക്കോടതി വിധിയില്‍ ഇടപെടാന്‍ വിസമ്മതിച്ചത്. മാംസവില്‍പന നിരോധിച്ച രീതിയേയും വിമര്‍ശിച്ച സുപ്രീം കോടതി മാംസവില്‍പന നിരോധനം ജനങ്ങളില്‍ അടിച്ചേല്‍പ്പിക്കാനാവില്ലെന്നും വ്യക്തമാക്കി. മാംസവില്‍പന നിരോധനത്തെ എതിര്‍ക്കുന്നവരുടെ നിലപാടും അനുഭാവപൂര്‍വം പരിഗണിക്കാന്‍ അധികാരികള്‍ തയാറാകണമെന്നും സുപ്രീം കോടതി ആവശ്യപ്പെട്ടു. 

മാംസ വില്‍പന നിരോധിച്ചു കൊണ്ടുള്ള സര്‍ക്കാര്‍ നടപടി റദ്ദാക്കിയ ബോംബെ ഹൈക്കോടതി വിധിക്കെതിരെ ഒരു മതസംഘടന സമര്‍പ്പിച്ച ഹര്‍ജി തീര്‍പ്പാക്കവെയാണ് സുപ്രീം കോടതി ഇക്കാര്യങ്ങള്‍ വ്യക്തമാക്കിയത്. അഹിംസയെന്നത് ഇന്ത്യന്‍ ഭരണഘടന വിഭാവനം ചെയ്യുന്ന മൂല്യമാണെന്നും മൃഗങ്ങളോടുള്ള ഇടപെടലിന്റെ കാര്യത്തിലും ഇത് പാലിക്കേണ്ടതാണെന്നുമായിരുന്നു ഹര്‍ജിക്കാരുടെ വാദം.

മൃഗങ്ങളോടും ദയകാട്ടേണ്ടതുണ്ടെന്നും ഇത്തരം തത്വചിന്തയില്‍ വിശ്വസിക്കുന്നവരാണ് ഭൂരിപക്ഷം ലോകരാജ്യങ്ങളുമെന്നും ഹര്‍ജിക്കാര്‍ ചൂണ്ടിക്കാട്ടി. എന്നാല്‍, ചില ഉല്‍സവങ്ങളോട് അനുബന്ധിച്ച് മാത്രമായി മൃഗങ്ങളോടുള്ള ദയ ചുരുക്കുന്നതിലെ വൈരുദ്ധ്യം ചൂണ്ടിക്കാട്ടിയ സുപ്രീം കോടതി ഇത്തരം തീരുമാനങ്ങള്‍ ജനങ്ങളില്‍ അടിച്ചേല്‍പ്പിക്കാനാകില്ലെന്നും സുപ്രീയ കോടതി ചൂണ്ടിക്കാട്ടി.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha