നേതാജി സുഭാഷ് ചന്ദ്രബോസ് മരിച്ചെന്നു കരുതുന്ന അപകടത്തിന് എട്ടുമാസങ്ങള്‍ക്കുശേഷം അദ്ദേഹം ജീവിച്ചിരിക്കുന്നുവെന്ന് മഹാത്മാ ഗാന്ധി വിശ്വസിച്ചിരുന്നതായി രേഖകള്‍. ഇതിനെക്കുറിച്ചുള്ള രേഖകള്‍ ബംഗാള്‍ സര്‍ക്കാര്‍ ഇന്ന് പുറത്ത് വിടും. നേതാജിയെക്കുറിച്ചുള്ള 64 രേഖകള്‍ ഡീക്ലാസ്സിഫൈ ചെയ്ത് ബംഗാള്‍ സര്‍ക്കാര്‍ ഇന്നു പുറത്തുവിടാനിരിക്കെയാണ് ഈ വിവരം പുറത്തുവരുന്നത്.
അത്തരത്തില്‍ 1997ല്‍ ഡീക്ലാസ്സിഫൈ ചെയ്ത രേഖകളിലാണ് നേതാജി മരിച്ചുവെന്നു കരുതുന്ന 1945 ഓഗസ്റ്റ് 18ന് തായ്‌ഹോക്കുവിലുണ്ടായ വിമാനാപകടത്തിനു എട്ടു മാസങ്ങള്‍ക്കു ശേഷവും അദ്ദേഹം ജീവനോടെയിരിക്കുന്നുവെന്ന് ഗാന്ധിജി വിശ്വസിച്ചിരുന്നതായി വ്യക്തമാകുന്നത്. ബംഗാളിലെ ഒരു പ്രാര്‍ഥനയ്ക്കിടയില്‍ പൊതുജനമധ്യത്തിലാണ് ഗാന്ധിജി ഇക്കാര്യം പറഞ്ഞത്. അതിനു നാലുമാസങ്ങള്‍ക്കു ശേഷം ഒരു ലേഖനത്തിലും ഇക്കാര്യം ഗാന്ധിജി വിശദീകരിക്കുന്നുണ്ട്. കൃത്യമായ വിവരമില്ലെങ്കിലും അദ്ദേഹം ജീവനോടെയുണ്ടെന്ന തോന്നലുണ്ടെന്നാണ് ഗാന്ധിജി പറഞ്ഞത്.
ഇതു തന്റെ മനസ്സിന്റെ അകത്തുനിന്നുള്ള തോന്നലാണെന്ന് ഗാന്ധിജി പറഞ്ഞിട്ടുണ്ടെന്നും എന്നാല്‍ അദ്ദേഹത്തിനു കിട്ടിയ രഹസ്യവിവരത്തിന്റെ അടിസ്ഥാനത്തിലാണ് നേതാജി ജീവനോടെയുണ്ടെന്ന് പറഞ്ഞതെന്നാണ് കോണ്‍ഗ്രസുകാര്‍ വിശ്വസിക്കുന്നതെന്നും 1946 ഏപ്രില്‍ എട്ടിലെ ഇന്റലിജന്‍സ് ഫയലില്‍ പറയുന്നു. താന്‍ റഷ്യയിലുണ്ടെന്നും ഇന്ത്യയിലേക്കു രക്ഷപെടണമെന്നും കാട്ടി നെഹ്‌റുവിന് നേതാജിയുടെ കത്തുവന്നെന്നുള്ള ഒരു രഹസ്യ റിപ്പോര്‍ട്ട് ഉണ്ടായിരുന്നെന്നും ഈ സമയത്തായിരിക്കാം ഗാന്ധിജി നേതാജി ജീവിച്ചിരിപ്പുണ്ടെന്ന് പ്രസ്താവന നടത്തിയതെന്നും ഒരു രേഖ പറയുന്നു.
ശ്രാദ്ധം നടത്താന്‍ ഒരുങ്ങിയ നേതാജിയുടെ കുടുംബത്തെ ഗാന്ധിജി തടഞ്ഞിരുന്നു. അദ്ദേഹത്തിന്റെ മരണത്തെക്കുറിച്ചു ചോദ്യമുയരുന്നുണ്ടെന്നാണ് അന്നു ഗാന്ധിജി പറഞ്ഞതെന്ന് നേതാജിയുടെ ബന്ധു ചന്ദ്രബോസ് പറഞ്ഞു. ഇക്കാര്യത്തില്‍ ഗാന്ധിജിക്ക് വിവരമുണ്ടായിരുന്നുവെന്ന് വിശ്വസിക്കുന്നതായും അദ്ദേഹം പറഞ്ഞു. 1946 ഏപ്രിലിലെ ഹരിജന്‍ മാസികയില്‍ ഗാന്ധിജി ഇക്കാര്യങ്ങളെല്ലാം എഴുതിയിരുന്നുവെന്ന് നേതാജിയുടെ അനന്തരവന്റെ ഭാര്യയും നേതാജി റിസര്‍ച്ച് ബ്യൂറോ അധ്യക്ഷയുമായ കൃഷ്ണ ബോസ് പറഞ്ഞു

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha