ജമ്മു കാശ്മീരിലെ ഉധംപൂരില്‍ നിന്നും പിടിയിലായ ഭീകരന്‍ മുഹമ്മദ് നവേദ് പാക്കിസ്ഥാനിലുള്ള തന്റെ മാതാപിതാക്കളോട് സംസാരിക്കണമെന്ന് ആവശ്യപ്പെട്ടതായി റിപ്പോര്‍ട്ട്. ജമ്മു കശ്മീരിലെ പ്രത്യേക കോടതിക്കു മുന്‍പാകെയാണ് നവേദ് ഇക്കാര്യം ആവശ്യപ്പെട്ടത്. ഇതോടെ നവേദ് പാക്ക് സ്വദേശി തന്നെയാണെന്ന ഇന്ത്യയുടെ വാദത്തിന് കൂടുതല്‍ ബലമേകി.

ജഡ്ജ് സാഹിബ് അവരെക്കുറിച്ചുള്ള ഓര്‍മകള്‍ തുടര്‍ച്ചയായി എന്റെ മനസ്സില്‍ വരുന്നു. കഴിഞ്ഞ കുറെ കാലമായി ഞാനവരോട് സംസാരിച്ചിട്ട്. ഫോണിലൂടെ അവരോട് സംസാരിക്കാന്‍ താങ്കള്‍ എന്നെ സഹായിക്കണം. ഞാനവരുടെ നമ്പര്‍ മുന്‍പു തന്നെ ദേശീയ അന്വേഷണ ഏജന്‍സി (എന്‍ഐഎ)ക്ക് നല്‍കിയിട്ടുണ്ടെന്നും നവേദ് കോടതിക്കു മുന്‍പാകെ അറിയിച്ചു. തനിക്ക് വീട്ടിലേക്ക് മടങ്ങിപ്പോകണമെന്നും നവേദ് പറഞ്ഞു.
നവേദ് നല്‍കിയ ഫോണ്‍ നമ്പറില്‍ ബന്ധപ്പെടാന്‍ ശ്രമിച്ചിരുന്നു. പക്ഷേ ആ നമ്പര്‍ ഇപ്പോള്‍ നിലവിലില്ലെന്നും ദേശീയ അന്വേഷണ ഏജന്‍സി കോടതിയെ അറിയിച്ചു. ഇതുകേട്ടയുടന്‍ തന്റെ കൈയ്യില്‍ സുഹൃത്തുക്കളുടെ നമ്പറുകളുണ്ടെന്നും ആ നമ്പറിലേക്ക് വിളിക്കാനും നവേദ് ആവശ്യപ്പെട്ടു. തന്റെ കൈയ്യിലുണ്ടായിരുന്ന ഏതാനും നമ്പറുകള്‍ ഉദ്യോഗസ്ഥര്‍ക്ക് കൈമാറുകയും ചെയ്തു.
കഴിഞ്ഞ വ്യാഴാഴ്ചയാണ് മുഹമ്മദ് നവീദിനെയും ഇയാള്‍ക്ക് സഹായം ചെയ്ത ഷൗക്കത്ത്, കുര്‍ഷീദ് എന്നിവരെ പ്രത്യേക കോടതിക്കു മുന്‍പാകെ ഹാജരാക്കിയത്. ഇവരെ 14 ദിവസത്തേക്ക് ജുഡീഷ്യല്‍ കസ്റ്റഡിയില്‍ വിട്ടു. ഉധംപൂരില്‍ ആക്രമണം നടത്തുന്നതിനിടെ നവേദിനെ നാട്ടുകാരാണ് ജീവനോടെ പിടികൂടിയത്. ഇയാള്‍ക്കൊപ്പമുണ്ടായിരുന്ന മറ്റൊരു ഭീകരന്‍ ആക്രമണത്തില്‍ കൊല്ലപ്പെട്ടിരുന്നു. മുംബൈയില്‍ ഭീകരാക്രമണം നടത്തിയ അജ്മല്‍ കസബിനു ശേഷം ജീവനോടെ ഇന്ത്യയുടെ പിടിയിലാകുന്ന ആദ്യ പാക്ക് ഭീകരനാണ് നവേദ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha