ഹിമാചല്‍ പ്രദേശിലെ പനൗള്‍ മേഖലയില്‍ നിര്‍മ്മാണത്തിലിരുന്ന തുരങ്കം തകര്‍ന്ന് വീണ് മൂന്ന് നിര്‍മ്മാണ തൊഴിലാളികള്‍ മണ്ണിനടിയില്‍ കുടുങ്ങിയിട്ട് 140 മണിക്കൂര്‍ പിന്നിടുന്നു

ഒരു പൈപ്പിലൂടെ അവര്‍ ഇരിക്കുന്ന കുഴിയിലേക്കിറക്കിയ സിസിടിവി ക്യാമറയിലൂടെ ഇവര്‍ പുറം ലോകത്തോടു സംസാരിച്ചു. തങ്ങള്‍ അടുത്ത ഏഴ് എട്ട് ദിവസം കൂടി ഇവിടെ പിടിച്ചുനില്‍ക്കുമെന്നും രക്ഷപ്പെടുത്തൂ എന്നും സിസിടിവിയിലൂടെ ദൗത്യസേനയെ ഇവര്‍ അറിയിച്ചു.

ഈ പൈപ്പിലൂടെ ഓക്‌സിജനും അത്യാവശ്യമുളള ഭക്ഷണസാധനങ്ങളുമൊക്കെ എത്തിക്കുന്നുണ്ട്. ഹിമാചല്‍ സ്വദേശികളായ മണി രാം,സതീഷ് കുമാര്‍,ഹൃദയ് റാം എന്നിവരാണ് അപകടത്തില്‍ പെട്ട് കുടുങ്ങി കിടക്കുന്നത്. കിരത്പൂറിനും മനാലിക്കുമിടയില്‍ ദേശീയ പാത നാലുവരി പാതയാക്കുന്നതിന്റെ നിര്‍മ്മാണ പ്രവര്‍ത്തനങ്ങള്‍ക്ക് ഇടയിലാണ് അപകടം നടന്നത്.

നാലുവരി പാതക്ക് വേണ്ടി നിര്‍മ്മിച്ച ടണലാണ് തകര്‍ന്നു വീണത്. തുരങ്കം തകര്‍ന്ന് മണ്ണിടിഞ്ഞ് വീണ് മൂന്ന് തൊഴിലാളികളാണ് ഉള്ളില്‍ കുടുങ്ങിയത്. തുരങ്കത്തിന് 1.3 കിലോ മീറ്റര്‍ നീളമാണ് ഉള്ളത്.

പോലീസിന്റെയും ഫയര്‍ ഫോഴ്‌സിന്റെയും നേതൃത്വത്തില്‍ രക്ഷാപ്രവര്‍ത്തനം തുടരുകയാണ്. തൊഴിലാളികള്‍ ഏകദേശം 30 മീറ്റര്‍ ഉള്ളിലാണ് കുടുങ്ങി കിടക്കുന്നതെന്ന് പോലീസ് അറിയിച്ചു. മണ്ണിടിച്ചില്‍ ഉണ്ടാവുന്നതാണ് രക്ഷാപ്രവര്‍ത്തനം വൈകിപ്പിക്കുന്നത്.

തൊഴിലാളികളുടെ കുടുംബങ്ങള്‍ നല്ലവാര്‍ത്ത പ്രതീക്ഷിച്ച് സംഭവസ്ഥലത്തിന് സമീപം നിര്‍മ്മിച്ച ടെന്റില്‍ കഴിയുകയാണ്.
നാലുദിവസം കൊണ്ട് രക്ഷാസേന ഒരു പാത നിര്‍മ്മിച്ച് ഇവര്‍ക്ക് തൊട്ടരികിലെത്തിയിരുന്നു. എന്നാല്‍ പാറക്കെട്ട് ഇവരുടെ മുന്നോട്ടുള്ള പോക്ക് തടഞ്ഞു. മണ്ണിടിച്ചില്‍ പ്രതീക്ഷിച്ച് പാറപൊട്ടിക്കുന്നത് ഒഴിവാക്കി. മറ്റൊരു പാത നിര്‍മ്മിക്കുകയാണ്.

ജെയ്പൂരില്‍ എണ്ണഖനനം ചെയ്യുന്ന ഉപകരണങ്ങളുള്‍പ്പടെ ഇവരെ രക്ഷിക്കാനെത്തിച്ചിട്ടുണ്ട്. 28 മീറ്ററോളം തുരങ്കമുണ്ടാക്കിയെന്നും മറ്റൊരു 20 മീറ്റര്‍ കുഴിക്കണമെന്നും അടുത്ത 24 മണിക്കൂര്‍ കൂടി ഇവര്‍ക്കരികിലെത്താനാവുമെന്നും ഉയര്‍ന്ന ഉദ്യോഗസ്ഥര്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക