സ്ത്രീകള് ജോലി ചെയ്യുന്നതാണ് തൊഴിലില്ലായ്മയ്ക്കു കാരണമെന്ന് ഛത്തിസ്ഗഡിലെ പാഠപുസ്തകം
ഛത്തിസ്ഗഡിലെ പത്താം ക്ലാസ് പാഠപുസ്തകം മറ്റൊരു വിവാദത്തിന് വഴിയൊരുക്കുന്നു. സ്ത്രീ ശാക്തീകരണത്തെക്കുറിച്ചും സ്ത്രീ-പുരുഷ സമത്വത്തെക്കുറിച്ചും വര്ധിച്ച രീതിയില് സംസാരിക്കുന്ന ഇക്കാലത്ത് ഛത്തിസ്ഗഡ് ബോര്ഡ് ഓഫ് സെക്കന്ഡറി എജ്യുക്കേഷന് തങ്ങളുടെ പാഠപുസ്തകത്തില് അച്ചടിച്ചു വച്ചിരിക്കുന്നത് സ്ത്രീകള് ജോലിചെയ്യാന് തുടങ്ങിയതാണ് തൊഴിലില്ലായ്മയ്ക്കു കാരണമെന്നാണ്.
സ്വാതന്ത്ര്യാനന്തരം ഇന്ത്യയില് തൊഴിലില്ലായ്മ കൂടാന് കാരണം സ്ത്രീകള് എല്ലാ മേഖലകളിലും ജോലി ചെയ്യുന്നതിനാലാണെന്നാണ് പുസ്തകത്തില് പറയുന്നത്. ജഷ്പൂര് ജില്ലയിലെ ഒരു അധ്യാപിക ഇക്കാര്യത്തില് സംസ്ഥാന വനിതാ കമ്മിഷനു പരാതി നല്കിയിട്ടുണ്ട്. വിഷയം മുഖ്യമന്ത്രി രമണ് സിങ്ങിന്റെ ശ്രദ്ധയില്പ്പെടുത്തി നടപടിയെടുക്കാമെന്ന് കമ്മിഷന് പരാതിക്കാരിക്ക് ഉറപ്പുനല്കി.
കഴിഞ്ഞവര്ഷം പശ്ചിമബംഗാളില് സ്കൂള് പാഠപുസ്തകങ്ങളില് വിപ്ലവകാരികളായ സ്വാതന്ത്രസമരസേനാനികളെ തീവ്രവാദികളെന്നു രേഖപ്പെടുത്തിയത് വിവാദമായിരുന്നു. സ്വാതന്ത്ര്യസമര സേനാനികളായ ഖുദിറാം ബോസ്, ജതീന്ദ്രനാഥ് മുഖര്ജി, പ്രഫുല്ല ചാകി എന്നിവരെയാണ് എട്ടാം ക്ലാസ്സിലെ പാഠപുസ്തകത്തില് തീവ്രവാദികളായി വിശേഷിപ്പിച്ചത്.
2013-ല് അരുണാചല് പ്രദേശിനെ ഇന്ത്യയുടെ ഭൂപടത്തില് ഉള്പ്പെടുത്താതെ മഹാരാഷ്ട്രയിലെ പത്താം ക്ലാസ്സിലെ ഭൂമിശാസ്ത്ര പാഠപുസ്തകം ഇറക്കിയിരുന്നു. തെറ്റു കണ്ടെത്തിയതിനെ തുടര്ന്ന് ഇവ പിന്വലിച്ചു. 2012-ലെ ഒരു സിബിഎസ്ഇ സ്കൂള് പുസ്തകത്തില് നോണ് വെജിറ്റേറിയന് ഭക്ഷിക്കുന്നവര് കള്ളം പറയുകയും കബളിപ്പിക്കുകയും കുറ്റകൃത്യങ്ങള് ചെയ്യുകയും ചെയ്യുമെന്ന് അച്ചടിച്ചിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha
