ഹീറോയാകാന്‍ പ്രായമൊരു പ്രശ്‌നമല്ലെന്ന് തെളിയിച്ചിരിക്കുകയാണ് ഉത്തര്‍പ്രദേശ് സ്വദേശിയായ 60കാരന്‍. ഒരു കറുത്ത ദിനം സമ്മാനിച്ചേക്കാവുന്ന വന്‍ ദുരന്തത്തില്‍നിന്ന് സംസ്ഥാനത്തെ കഴിഞ്ഞ ദിവസം സംരക്ഷിച്ചത് റാംജിത് യാദവ് എന്ന വൃദ്ധനായരുന്നു. ഗംഗാ നദിയില്‍ മുങ്ങിത്താഴാനൊരുങ്ങിയ ബോട്ടില്‍നിന്നും റാംജിത് യാദവ് കൈപിടിച്ചു കയറ്റിയത് 15 സ്‌കൂള്‍ വിദ്യാര്‍ത്ഥികളെ. മിര്‍സാപൂര്‍ സ്വദേശിയായ റാംജിത്തിന് ധീരതയ്ക്കുള്ള പുരസ്‌കാരം നല്‍കുമെന്ന് മുഖ്യമന്ത്രി അഖിലേഷ് യാദവ് വ്യക്തമാക്കിക്കഴിഞ്ഞു.
റാംജിത്ത് ധീരത തെളിയിച്ച സംഭവത്തില്‍ പോലീസ് നല്‍കുന്ന വിവരണം ഇങ്ങനെ. ചൊവ്വാഴ്ച പതിവുപോലെ പാല്‍ വില്‍പ്പനയ്ക്കായി ഗംഗാ നദിയിലൂടെ വള്ളത്തില്‍ യാത്ര ചെയ്യവെയാണ് കുട്ടികള്‍ സഞ്ചരിക്കുന്ന ബോട്ട് റാംജിത്ത് ശ്രദ്ധിച്ചത്. റാംപൂരിലെ സ്‌കൂളിലേക്ക് വിദ്യാര്‍ത്ഥികളുമായി പോകുന്ന ബോട്ടായിരുന്നു ഇത്. ഇതിനിടയില്‍ ബോട്ടിന്റെ നിയന്ത്രണം തെറ്റുകയും ബോട്ടില്‍ വെള്ളം കയറാനും ആരംഭിച്ചു. കുട്ടികള്‍ അകാരണമായി ബഹളമുണ്ടാക്കാന്‍ തുടങ്ങിയതോടെയാണ് അപകടത്തെക്കുറിച്ചുള്ള സൂചന റാംജിത്തിന് ലഭിച്ചത്.
റാംജിത്ത് താന്‍ സഞ്ചരിച്ചിരുന്ന വള്ളം ഉടന്‍ ബോട്ടിനടുത്തേയ്ക്ക് വിട്ടു. തന്റെ വള്ളത്തില്‍ മുഴുവന്‍ കുട്ടികളെയും കയറ്റാന്‍ കഴിയില്ലെന്ന് തിരിച്ചറിഞ്ഞ അദ്ദേഹം ഉടന്‍ വെള്ളത്തിലേക്ക് എടുത്തുചാടി. തുടര്‍ന്ന് കുട്ടികളില്‍ ഒരാളെ തോളിലേറ്റുകയും മറ്റുള്ളവരോട് പരസ്പരം അള്ളിപ്പിടിച്ചശേഷം തന്റെ ചുമലില്‍ പിടിച്ചുകിടക്കാനും നിര്‍ദേശിച്ചു. തുടര്‍ന്ന് റാംജിത്ത് കുട്ടികളുമായി കരയിലേക്ക് നീന്തുകയാണ് ചെയ്തത്. ഇതിനിടയില്‍ ശബ്ദംകേട്ട് ഓടിയെത്തിയ നാട്ടുകാരില്‍ ചിലരും സഹായത്തിനെത്തി. കുട്ടികളുമായി റാംജിത്തിന്റെ കരയിലേക്ക് നീന്തിയതിനെ അവിസ്മരണീയമെന്നാണ് കണ്ടുനിന്ന നാട്ടുകാര്‍ വിശേഷിപ്പിച്ചത്. 60ാം വയസില്‍ ഇത്തരമൊരു സാഹസം ചെയ്യാന്‍ റാംജിത്ത് കാണിച്ച ധൈര്യം അപാരമെന്ന് മുഖ്യമന്ത്രി അഖിലേഷ് യാദവും പ്രതികരിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha