ബാഹുബലി ഉള്പ്പെടെയുള്ള വമ്പന് ചിത്രങ്ങളെ പിന്തള്ളി കോര്ട്ട് ഓസ്കാറിന്
മികച്ച ചിത്രത്തിനുള്ള ഇക്കൊല്ലത്തെ ദേശീയ ചലച്ചിത്ര പുരസ്കാരം നേടിയ മറാത്തി ചിത്രം \'കോര്ട്ട്\' ഇന്ത്യയുടെ ഔദ്യോഗിക ഓസ്കാര് എന്ട്രിയാവും. പുതുമുഖ സംവിധായകന് ചൈതന്യ തംഹാനെയുടെ നിരൂപണ പ്രശംസ നേടിയ ചിത്രമായ \'കോര്ട്ട്\', ബാഹുബലി ഉള്പ്പെടെയുള്ള വമ്പന് ചിത്രങ്ങളെ പിന്തള്ളിയാണ് ഓസ്കാര് ഓട്ടത്തില് ഇടം പിടിച്ചത്. മികച്ച സാങ്കേതികതയും സര്ഗാത്മകതയും ഒത്തുചേര്ന്ന് സമകാലിക ഇന്ത്യയെ തുറന്നു കാട്ടുകയാണ് ഈ സിനിമയെന്ന് \'കോര്ട്ട്\' തിരഞ്ഞെടുത്ത ഫിലിം ഫെഡറേഷന് ജൂറി ചെയര്മാന് അമോല് പലേക്കര് അറിയിച്ചു.
30-ഓളം സിനിമകളില് നിന്നാണ് ജൂറിയുടെ തിരഞ്ഞെടുപ്പ്. ഒരു നാടോടി ഗായകന്റെ വിചാരണയുടെ പശ്ചാത്തലത്തില് ഇന്ത്യന് നീതിന്യായ വ്യവസ്ഥയെ പരിശോധനാ വിധേയമാക്കുകയാണ് സംവിധായകന്. മുംബൈയിലെ ഒരു കീഴ്ക്കോടതിയായിരുന്നു കഥാ പരിസരം. പുതുമുഖങ്ങളായിരുന്നു ചിത്രത്തിലേറെയും. ആദ്യമായി 2014 സെപ്തംബര് നാലിന് വെനീസ് ഫിലിം ഫെസ്റ്റിവലില് പ്രദര്ശിപ്പിച്ച ചിത്രം അവാര്ഡും നേടിയിരുന്നു. 2015 ഏപ്രില് 17-നാണ് ഇന്ത്യയില് റിലീസ് ചെയ്തത്.
ബാഹുബലിയാവും ഓസ്ക്കാറിലേക്കെന്ന അഭ്യൂഹങ്ങളുണ്ടായിരുന്നു. 17 അംഗ ജൂറിയില് നിന്ന് രണ്ടുപേര് രാജി വെച്ചതുമായി ബന്ധപ്പെട്ട ചോദ്യത്തിന് സാങ്കേതിക കാരണങ്ങളാലാണ് രാജിയെന്നായിരുന്നു ചെയര്മാന്റെ മറുപടി. കോര്ട്ട് ഐകകണ്ഠേനയുള്ള തീരുമാനമാണെന്നും പലേക്കര് വിശദീകരിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
