റേഷന്‍ ധാന്യങ്ങളും മണ്ണെണ്ണയും ആദ്യം മുഴുവന്‍ പണവും നല്‍കി വാങ്ങിയശേഷം സബ്‌സിഡിത്തുക പിന്നീട് ബാങ്ക് അക്കൗണ്ടിലേക്കു കൈമാറുന്ന പദ്ധതി (ഡയറക്ട് ബെനിഫിറ്റ് ട്രാന്‍സ്ഫര്‍ ഡി.ബി.ടി.) ഉടന്‍ നടപ്പാക്കും. റേഷന്‍ ധാന്യങ്ങളുടെ ചോര്‍ച്ചതടയുകയും സബ്‌സിഡി അര്‍ഹതപ്പെട്ടവര്‍ക്കു മാത്രമായി ചുരുക്കുകയുമാണ് ലക്ഷ്യം.
നിലവില്‍ പാചകവാതക സബ്‌സിഡി മാത്രമാണ് നേരിട്ട് ഉപഭോക്താവിന്റെ അക്കൗണ്ടുവഴി നല്‍കുന്നത്. പൊതുവിതരണശൃംഖലയിലേക്കും ഡി.ബി.ടി. വ്യാപിപ്പിക്കല്‍ ഇക്കൊല്ലം അവസാനത്തോടെ പ്രഖ്യാപിക്കാനാണ് ആലോചന. എന്നാല്‍, പദ്ധതി നടപ്പാക്കേണ്ടത് സംസ്ഥാനസര്‍ക്കാറുകളായതിനാല്‍ കരുതലും മുന്നൊരുക്കവും ഇക്കാര്യത്തില്‍ ആവശ്യമാണ്. എല്ലാവര്‍ക്കും ബാങ്ക് അക്കൗണ്ട് ജന്‍ധന്‍ വിജയകരമായതിനാല്‍ വലിയ തടസ്സം ഇക്കാര്യത്തിലുണ്ടാവില്ലെന്നാണ് അധികാരികളുടെ കണക്കുകൂട്ടല്‍.
റേഷന്‍ ധാന്യങ്ങളുടെ കാര്യത്തില്‍ ഡി.ബി.ടി. നടപ്പാക്കാനുള്ള വിശദാംശങ്ങളോ നിര്‍ദേശമോ കേന്ദ്രത്തില്‍നിന്നു വന്നിട്ടില്ലെന്ന് സംസ്ഥാന ഭക്ഷ്യവിതരണമന്ത്രി അനൂപ് ജേക്കബ് പറഞ്ഞു. കേന്ദ്രനിര്‍ദേശമുണ്ടായാലും ആലോചിച്ചേ ഇക്കാര്യത്തില്‍ തീരുമാനമെടുക്കൂ എന്ന് അദ്ദേഹം വിശദീകരിച്ചു.
ചണ്ഡീഗഢിലും പുതുച്ചേരിയിലും പരീക്ഷണാടിസ്ഥാനത്തില്‍ ഡി.ബി.ടി. നടപ്പാക്കുന്നുണ്ട്. അതു വിജയിച്ച പശ്ചാത്തലത്തിലാണ് മറ്റിടങ്ങളിലേക്കും വ്യാപിപ്പിക്കുന്നത്. അനര്‍ഹര്‍ക്ക് റേഷന്‍ ധാന്യങ്ങള്‍ നല്‍കലും മറച്ചുവില്‍ക്കലുംവഴി 30 ശതമാനം മുതല്‍ 40 ശതമാനംവരെ ചോര്‍ച്ച സബ്‌സിഡിയിനത്തിലുണ്ടാകുന്നുണ്ട്. കള്ള റേഷന്‍ കാര്‍ഡുകളാണ് മറ്റൊരു പ്രശ്‌നം. റേഷന്‍ നല്‍കല്‍ ആധാറുമായി ബന്ധിപ്പിച്ചാവുമ്പോള്‍ ചോര്‍ച്ച തടയാനാവുമെന്നാണ് കണക്കുകൂട്ടല്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha