പൈപ്പ് ലൈന്‍ വഴി വീടിന്റെ മൂന്നാം നിലയിലേക്ക് കയറാന്‍ ശ്രമിച്ച യുവാവ് വീണു മരിച്ചു. ഭാര്യ വാതില്‍ തുറക്കാത്തതിനാലാണ് പൈപ്പ് ലൈനിലൂടെ വീട്ടിലേക്ക് കയറാന്‍ ശ്രമിച്ചതെന്നാണ് വിവരം. ചെന്നൈയിലെ ജൊലാര്‍പേട്ടിലാണ് സംഭവം. സ്വകാര്യ സ്ഥാപനത്തില്‍ മാര്‍ക്കറ്റീങ് റപ്രസന്റേറ്റീവായി ജോലി ചെയ്യുന്ന തെന്നരശു (30)ആണ് മരിച്ചത്.

ഞായറാഴ്ച്ച രാത്രി വൈകി വീട്ടിലെത്തിയ ഇയാള്‍ കോളിങ് ബെല്‍ പ്രവര്‍ത്തിക്കാത്തതിനെ തുടര്‍ന്ന് ഭാര്യ പുനിതയെ പലവട്ടം ഫോണ്‍ ചെയ്തു. ഭാര്യ ഫോണ്‍ എടുക്കാത്തതിനാല്‍ മൂന്നാം നിലയിലേക്ക് പൈപ്പ് ലൈനിലൂടെ കയറാന്‍ ശ്രമിച്ച യുവാവ് താഴേക്ക് വീഴുകയായിരുന്നു. വീഴ്ച്ചയില്‍ തലയ്ക്ക് പരിക്കേറ്റതാണ് മരണകാരണമെന്ന് പൊലീസ് പറഞ്ഞു.

എന്നാല്‍ ശബ്ദം കേട്ട് വീടിനു പുറത്തേക്ക് വന്ന ഭാര്യ പുനിതയാണ് തെന്നരശു വീണുകിടക്കുന്നതു കണ്ടത്. ഉടന്‍തന്നെ ആശുപത്രിയില്‍ എത്തിച്ചെങ്കിലും രക്ഷിക്കാന്‍ സാധിച്ചില്ല. സി ആര്‍ പി സി സെക്ഷന്‍ 174 പ്രകാരം സംഭവത്തില്‍ പൊലീസ് കേസെടുത്തു. തെന്നരശിനും പുനിതക്കും ഒന്നരവയസ്സുള്ള കുഞ്ഞുണ്ട്.

അതേസമയം ഭാര്യയും രണ്ട് സുഹൃത്തുക്കളും ചേര്‍ന്ന് തെന്നരശുവിനെ കൊലപ്പെടുത്താന്‍ ശ്രമിക്കുകയായിരുന്നുവെന്ന ആരോപണം ഉന്നയിച്ച് യുവാവിന്റെ ബന്ധുക്കള്‍ രംഗത്തെത്തി. പൊലീസില്‍ പരാതിപ്പെടുകയും അന്‍പതോളം ബന്ധുക്കള്‍ പൊലീസ് സ്‌റ്റേഷനു മുന്നിലുളള റോഡ് ഉപരോധിക്കുകയും ചെയ്തു. എന്നാല്‍ പോസ്റ്റ് മോര്‍ട്ടം ഫലം പുറത്തുവരാത്തതിനാല്‍ പരാതി സ്വീകരിക്കില്ലെന്ന് പൊലീസ് പറഞ്ഞു.