സ്കൂളിലെ റിപ്പബ്ലിക് ദിന ചടങ്ങളില് മദ്യപിച്ച് എത്തിയ പ്രധാനാധ്യാപകനെ പൊലീസ് അറസ്റ്റ് ചെയ്തു
സ്കൂളിലെ റിപ്പബ്ലിക് ദിന ചടങ്ങളില് മദ്യപിച്ച് എത്തിയ പ്രധാനാധ്യാപകനെ പൊലീസ് അറസ്റ്റ് ചെയ്തു. സമ്പൂര്ണ മദ്യ നിരോധനം നടപ്പാക്കിയ ബിഹാറിലാണ് സംഭവം. കഴിഞ്ഞ ദിവസത്തെ ചടങ്ങില് വെച്ച് ദേശീയ പതാക ഉയര്ത്താന് കഴിയാതെ ബുദ്ധിമുട്ടിയ അധ്യാപകനെ കണ്ട നാട്ടുകാരാണ് എംഎല്എയും പൊലീസിനെയും വിവരമറിയിച്ചത്.
മുസഫര്പൂര് ജില്ലയിലെ മിനാപൂരിലുള്ള സര്ക്കാര് സ്കൂളിലാണ് സംഭവം. ഹെഡ്മാസ്റ്റര് മദ്യപിച്ച് ലക്കുകെട്ട അവസ്ഥയില് റിപ്പബ്ലിക് ദിനാഘോഷത്തില് പങ്കെടുക്കാന് എത്തിയപ്പോള് നാട്ടുകാര് പ്രദേശത്തെ എംഎല്എയായ ആര്ജെഡി നേതാവ് രാജീവ് കുമാറിനെയും പൊലീസിനെയും വിവരമറിയിച്ചു. പൊലീസ് സ്ഥലത്തെത്തി അധ്യാപകനെ സ്റ്റേഷനിലേക്ക് കൊണ്ടുപോയി ബ്രീത്ത് അനലൈസര് പരിശോധന നടത്തി. പിന്നാലെ മെഡിക്കല് ടെസ്റ്റിനും വിധേയനാക്കി. തുടര് നടപടികള് സ്വീകരിക്കുമെന്ന് പൊലീസ് അറിയിച്ചിട്ടുണ്ട്.
തന്റെ നിസ്സാഹയത കാരണമാണ് മദ്യപിച്ചതെന്ന്, അറസ്റ്റിലാവുന്നതിന് മുമ്പ് ഇയാള് പറഞ്ഞു. അഞ്ച് മാസമായി ശമ്പളമില്ല. ഉച്ചക്കഞ്ഞി കൊടുക്കാനുള്ള പണം പോലും കിട്ടുന്നില്ല. ഈ സ്കൂള് നടത്തിക്കൊണ്ടു പോകാനുള്ള കഷ്ടപ്പാട് തനിക്കറിയാം. കടക്കെണിയിലാണ് ഇപ്പോള്. വീട്ടുകാര്യങ്ങളും സ്കൂളും നടത്തിക്കൊണ്ടുപോകാനുള്ള ബുദ്ധിമുട്ട് മനസിലാക്കണമെന്നും അധ്യാപകന് പറഞ്ഞു.
മദ്യപിക്കാന് ആരാണ് പണം നല്കിയതെന്ന ചോദ്യത്തിന് ചില അടുപ്പക്കാര് പണം നല്കിയെന്നും അല്ലാതെ തന്റെ കൈയിലെവിടെ പണമെന്നുമായിരുന്നു അദ്ദേഹത്തിന്റെ മറുചോദ്യം. അതേസമയം സംസ്ഥാനത്തെ മദ്യനിരോധനത്തിന്റെ യാഥാര്ത്ഥ്യമാണ് ഈ സംഭവത്തിലൂടെ പുറത്തുവന്നതെന്ന് എംഎല്എ രാജീവ് കുമാര് പറഞ്ഞു. എല്ലായിടത്തും മദ്യം സുലഭമാണെന്നും അധ്യാപകനെതിരെ നടപടി എടുക്കണമെന്നും എംഎല്എ ആവശ്യപ്പെട്ടു. മാസങ്ങളായി അധ്യാപകര്ക്ക് ശമ്പളം നല്കുന്നില്ലെന്ന ആരോപണവും സംസ്ഥാനത്ത് വലിയ വിവാദങ്ങള്ക്ക് വഴിവെച്ചിട്ടുണ്ട്.
https://www.facebook.com/Malayalivartha
