പഹല്ഗാം ഭീകരാക്രമണവും ഓപറേഷന് സിന്ദൂറും... വിദേശരാജ്യങ്ങളില് വിശദീകരിക്കാന് കേന്ദ്രത്തിന്റെ പത്തംഗ സംഘം
വിദേശരാജ്യങ്ങളില് പഹല്ഗാം ഭീകരാക്രമണത്തെയും ഓപറേഷന് സിന്ദൂറിനെയും തുടര്ന്നുള്ള നിര്ണായക നയതന്ത്ര നീക്കത്തില് ഇന്ത്യയുടെ നിലപാട് ധരിപ്പിക്കാന് കേന്ദ്രസര്ക്കാര് സര്വകക്ഷി സംഘത്തെ അയക്കുന്നു.മുസ്ലിം ലീഗ് പാര്ലമെന്ററി പാര്ട്ടി നേതാവ് ഇ.ടി. മുഹമ്മദ് ബഷീര്, കോണ്ഗ്രസ് പ്രവര്ത്തക സമിതി അംഗം ശശി തരൂര്, സി.പി.എം രാജ്യസഭാ കക്ഷി നേതാവ് ജോണ് ബ്രിട്ടാസ്, മുന് വിദേശകാര്യ സഹമന്ത്രിയും ബി.ജെ.പി നേതാവുമായ വി. മുരളീധരന് തുടങ്ങിയവര് കേരളത്തില്നിന്ന് സംഘത്തിലുണ്ടാകും.
കേന്ദ്ര പാര്ലമെന്ററി കാര്യ മന്ത്രി കിരണ് റിജിജുവാണ് സര്വകക്ഷി സംഘത്തിലേക്ക് തെരഞ്ഞെടുക്കപ്പെട്ട എം.പിമാരെ ഇക്കാര്യം നേരില് വിളിച്ചറിയിച്ചത്. കോണ്ഗ്രസില് നിന്ന് ശശി തരൂരിന് പുറമെ മനീഷ് തിവാരി, അമര് സിങ്, സല്മാന് ഖുര്ശിദ് എന്നിവര് കൂടി സംഘത്തിലുണ്ടാകുമെന്ന് പാര്ട്ടി വൃത്തങ്ങള് അറിയിച്ചു.
അസദുദ്ദീന് ഉവൈസി (എ.ഐ.എം.ഐ.എം), സുദീപ് ബന്ദോപാധ്യായ (തൃണമൂല്), കനിമൊഴി (ഡി.എം.കെ), സഞ്ജയ് ഝാ (ജെ.ഡി.യു), പ്രിയങ്ക ചതുര്വേദി (ശിവസേന ഉദ്ധവ് താക്കറെ), വിക്രംജിത് സാഹ്നി (ആം ആദ്മി പാര്ട്ടി), സുസ്മിത് പത്ര (ബിജു ജനതാദള്), സുപ്രിയ സുലെ (എന്.സി.പി ശരത് പവാര്) എന്നിവരും ഇന്ത്യക്കായുള്ള നയതന്ത്ര ദൗത്യത്തിനുണ്ട്. ദക്ഷിണ കൊറിയ, ജപ്പാന്, സിംഗപ്പൂര് എന്നിവിടങ്ങളിലേക്കുള്ള സംഘത്തെ സല്മാന് ഖുര്ശിദും യൂറോപ്പിലേക്കും പശ്ചിമേഷ്യയിലേക്കുമുള്ള സംഘത്തെ മനീഷ് തിവാരിയും നയിക്കുമെന്നും ഏജന്സികള് റിപ്പോര്ട്ട് ചെയ്യുന്നു.
"
https://www.facebook.com/Malayalivartha
