ഗ്രാമങ്ങളുടെ അടിത്തറ തകര്‍ന്നപ്പോള്‍ കേന്ദ്രസര്‍ക്കാറിന് മനം മാറ്റം. സഹകരണ ബാങ്കുകള്‍ക്കുമേല്‍ ഏര്‍പ്പെടുത്തിയ കര്‍ക്കശ നിബന്ധനകളില്‍ ഇളവു നല്‍കാന്‍ കേന്ദ്ര ധനകാര്യ മന്ത്രാലയവും ആര്‍ബിഐയും ഒരുങ്ങുന്നു. സുപ്രീം കോടതിയുടെ ഇടപെടലിന്റെ കൂടി അടിസ്ഥാനത്തിലാണ് ആര്‍ബിഐ സഹകരണ ബാങ്കുകള്‍ക്കായി ഇളവു പ്രഖ്യാപിക്കാന്‍ ഒരുങ്ങുന്നത്. നോട്ട് പിന്‍വലിക്കല്‍ തീരുമാനം പൂര്‍ത്തിയാകുന്ന ജനുവരി മുതല്‍ ക്രമാനുഗതമായി ലഘൂകരിക്കാനാണ് ആര്‍ബിഐയുടെ നീക്കം.
നിയന്ത്രണങ്ങള്‍ അനിയന്ത്രിതമാകുന്നതു ഗ്രാമീണ സമ്പദ്‌വ്യവസ്ഥ തകര്‍ക്കുമെന്നു ബോധ്യമുള്ള സാഹചര്യത്തിലാണിതെന്നു ധനമന്ത്രാലയവൃത്തങ്ങള്‍ വ്യക്തമാക്കി. പൊതുമേഖലാ ബാങ്കുകള്‍ക്കു നല്‍കുന്ന തോതില്‍ സഹകരണ ബാങ്കുകള്‍ക്കും പുതിയ നോട്ടുകള്‍ നല്‍കാമെന്നു സര്‍ക്കാര്‍ സുപ്രീം കോടതിയില്‍ ഉറപ്പു നല്‍കിയതു കഴിഞ്ഞ ദിവസമാണ്. ഇതോടെ, രാജ്യത്തെ സഹകരണ ബാങ്കുകളില്‍ കഴിഞ്ഞ മാസം 10നും 14നും ഇടയ്ക്കു ലഭിച്ച 8,000 കോടി രൂപ നിക്ഷേപത്തിനു സംരക്ഷണവും ഉറപ്പായിരുന്നു.
ഇതേസമയം, ഭാവിയില്‍ ബാങ്കിങ് നിബന്ധനകളും ചട്ടങ്ങളും കര്‍ക്കശമായി പാലിക്കാന്‍ സഹകരണ സ്ഥാപനങ്ങളെ നിര്‍ബന്ധിതമാക്കും. ഏര്‍പ്പെടുത്തിയ നിബന്ധനകള്‍ സഹകരണ പ്രസ്ഥാനത്തിനു വേരോട്ടമുള്ള വിവിധ സംസ്ഥാനങ്ങളില്‍ സാധാരണക്കാരെ പ്രതികൂലമായി ബാധിച്ചെന്നു സര്‍ക്കാരിനു ബോധ്യപ്പെട്ടിട്ടുണ്ട്. കേരളം, മഹാരാഷ്ട്ര, ഗുജറാത്ത്, ബംഗാള്‍ എന്നിവിടങ്ങളില്‍നിന്നു ശക്തമായ സമ്മര്‍ദമാണ് കേന്ദ്രത്തിനും ആര്‍ബിഐക്കുമേരും ഉണ്ടായത്.
കേരളത്തില്‍നിന്നു സര്‍ക്കാര്‍ പ്രതിനിധി സംഘത്തിനു പുറമേ എ.കെ.ആന്റണിയുടെ നേതൃത്വത്തില്‍ എംപിമാരും രമേശ് ചെന്നിത്തലയുടെ നേതൃത്വത്തില്‍ യുഡിഎഫ് സംഘവും കേന്ദ്രനേതാക്കളെ സന്ദര്‍ശിച്ചു.ജില്ലാ ബാങ്കുകള്‍ക്കു നോട്ട് മാറ്റാനുള്ള അനുമതി നിഷേധിച്ചത് അവയെ ആശ്രയിക്കുന്ന പ്രാഥമിക സംഘങ്ങള്‍ക്കു തിരിച്ചടിയായി. നിക്ഷേപമായി സ്വീകരിച്ച തുക നിഷ്‌ക്രിയമാവുകയും ചെയ്തു.
ആഴ്ചതോറും ഇടപാടുകാര്‍ക്കു പിന്‍വലിക്കാവുന്ന 24,000 രൂപയാണു സംഘങ്ങള്‍ക്കും പിന്‍വലിക്കാനാവുന്നത്. കൈവശം പുതിയ നോട്ടില്ലാത്തതും ഉള്ള പഴയ നോട്ട് ജില്ലാ ബാങ്കുകള്‍ക്കു നല്‍കാനാകാത്തതും സംഘങ്ങളെ നിര്‍ജീവാവസ്ഥയിലാക്കിയിരുന്നു. പൂര്‍ണമായും സ്തംഭനാവസ്ഥയിലായി സഹകരണ ബാങ്കുകളുടെ അവസ്ഥയ്ക്ക് ജനുവരിയോടെ മാറ്റം വരുമെന്നാണ് ഇപ്പോഴത്തെ പ്രതീക്ഷ.