നോട്ടു പരിഷ്‌ക്കരണത്തിനു പിന്നാലെ ഹൈദരാബാദില്‍നിന്നു മാത്രം പഴയ നോട്ടുകള്‍ക്കൊപ്പം പിടിച്ചെടുത്തത് 2700 കോടിയുടെ സ്വര്‍ണബിസ്‌കറ്റുകളാണെന്ന് എന്‍ഫോഴ്‌സ്‌മെന്റ് ഡയറക്ടറേറ്റ്. 8000 കിലോ സ്വര്‍ണമാണ് നവംബര്‍ എട്ടിനും മുപ്പതിനുമിടയ്ക്ക് ഹൈദരാബാദിലെത്തിയതെന്നും ഉദ്യോഗസ്ഥര്‍ വ്യക്തമാക്കിയതായി ദേശീയ മാധ്യമം റിപ്പോര്‍ട്ടു ചെയ്തു.

ഈമാസം ഒന്നിനും പത്തിനുമിടയ്ക്ക് 1500 കിലോയുടെ പുതിയ സ്വര്‍ണമെത്തിയിട്ടുണ്ട്. അസാധുനോട്ടുകളുപയോഗിച്ച് സ്വര്‍ണം വാങ്ങുന്ന പ്രവണത വര്‍ധിച്ചതോടെയാണിത്. ഹൈദരാബാദിലെ സ്വര്‍ണക്കട്ടി, ആഭരണ വ്യാപാരികളില്‍നിന്ന വലിയതോതില്‍ സ്വര്‍ണം വാങ്ങിക്കൂട്ടുകയാണെന്നും ഉദ്യോഗസ്ഥര്‍ പറയുന്നു.

പഴയ നോട്ടുകളാണോ ഇടപാടിന് ഉപയോഗിച്ചതെന്ന് അറിയാന്‍ അന്വേഷണം നടന്നുകൊണ്ടിരിക്കുകയാണ്.
അതേസമയം, നോട്ട് അസാധുവാക്കുന്നതിനു മുന്‍പായി വലിയ തോതില്‍ സ്വര്‍ണം ആവശ്യപ്പെട്ട് ആളുകളെത്തിയിരുന്നുവെന്നും അഡ്വാന്‍സ് ബുക്കിംഗ് ഉണ്ടായിരുന്നുവെന്നുമാണ് സ്വര്‍ണ വ്യാപാരികള്‍ പറയുന്നത്. അങ്ങനെ ലഭിച്ച പണമാണ് കൈവശമുള്ളതെന്നും അവര്‍ വ്യക്തമാക്കുന്നു.