ഉറുമ്പിനെ ബ്രെയിന്വാഷ് ചെയ്ത് പുല്മേട്ടിലെത്തിക്കും ആ വിര!
ജീവികള് തമ്മില് പൊരുതിയും, ചതിച്ചും, ചിലപ്പോഴൊക്കെ സഹായിച്ചും, സഹകരിച്ചും നിലനില്പിനായുള്ള പോരാട്ടങ്ങള് നടത്തിക്കൊണ്ടിരിക്കുകയാണ് പ്രകൃതിയില്. സ്വന്തം വംശം നിലനിര്ത്താന്, നിസ്സാരജീവികള് എന്ന് നാം കരുതുന്ന പല ജീവികളും, ചെയ്യുന്ന കാര്യങ്ങള് അപസര്പ്പക കഥകളെപ്പോലും വെല്ലുന്ന ആസൂത്രണത്തോടെയാണ്.
ലാന്സെറ്റ് ലിവര് ഫ്ലൂക് (The lancet liver fluke)) (ശാസ്ത്രനാമം Dicrocoelium dendriticum) എന്ന വിരയുടെ ജീവിതം തുടങ്ങുന്നത് ആടുകളുടെ കാട്ടത്തില് നിന്നും കന്നുകാലികളുടെ ചാണകത്തില് നിന്നുമാണ്. ഈ വിരയുടെ മുട്ടകള് ചാണകത്തില് ഉള്ളത് മനസ്സിലാക്കാതെ അത് അകത്താക്കാന് ഒച്ചുകള് എത്തുന്നു.
ചാണകം ഭക്ഷിക്കുന്ന ഈ ഒച്ചുകളുടെ (Cochlicopa lubrica) ഉള്ളില് കടക്കുന്ന വിരയുടെ മുട്ടകള് അവയ്ക്കുള്ളില് വച്ച് വിരിയുന്നു. ഒച്ചിനകത്തിരുന്നുകൊണ്ട് ജീവിതത്തിന്റെ രണ്ടാമത്തെ ദശയിലേക്കു നീങ്ങുന്നതോടൊപ്പം ഇവ ഒച്ചുകളുടെ ദേഹത്തുള്ള കൊഴുത്തദ്രാവകത്തില് ചില രാസമാറ്റങ്ങള് വരുത്തുന്നു. ഈ രാസമാറ്റത്തോടെ ആ ദ്രാവകത്തിന്റെ രുചിയില് മാധുര്യം ഏറുന്നു. ആ മധുരത്തില് ആകൃഷ്ടരായി എത്തുന്ന ഉറുമ്പുകള് (Formica fusca) ഈ ദ്രാവകം കഴിക്കുമ്പോള് വിരകള് ഉറുമ്പിന്റെ ഉള്ളില് എത്തുകയും ചെയ്യുന്നു. ഉറുമ്പിന്റെ ഉള്ളിലെത്തുന്ന വിരകളില് ഭൂരിഭാഗവും അതിന്റെ ശരീരത്തില് തങ്ങുകയും ലാര്വാ ജീവിതത്തിന്റെ നാലാം ഘട്ടത്തിലേക്ക് കടക്കുകയും ചെയ്യും.
എന്നാല് അവയില് ഒരെണ്ണം പതിയെ നീങ്ങിനീങ്ങിച്ചെന്ന് ഉറുമ്പിന്റെ തലച്ചോറില് എത്തുന്നു. അവിടെ ഉറുമ്പിന്റെ ചിന്തയുടെ നിയന്ത്രണം ആ വിര ഏറ്റെടുക്കും. ചുരുക്കത്തില് വിരയുടെ അടിമയായി മാറും ആ ഉറുമ്പ്. വിര നടത്തുന്ന ഈ വിക്രിയയോടെ ഉറുമ്പിന് സ്വന്തമായി ഒന്നും ചെയ്യാനാവാതെ തന്റെ കൂട്ടത്തെ (കോളനി) ഉപേക്ഷിച്ച് ചുറ്റുമുള്ള പുല്ലിന്റെ മുകള് ഭാഗത്തേക്ക് നടക്കേണ്ടിവരുന്നു. തന്റെ യജമാനന്റെ തീരുമാനപ്രകാരം മാത്രം ഇങ്ങനെ തുടര്ന്നും ചെയ്യേണ്ടിവരുന്ന ഉറുമ്പ് ഒരുനാള് മേഞ്ഞുനടക്കുന്ന പശു പുല്ലുതിന്നുന്നതിന്റെ കൂടെ അതിന്റെ വയറ്റിലാവുന്നു.
ഉറുമ്പിനൊടൊപ്പം പശുവിന്റെ വയറ്റില് എത്തിയ വിരകള് അവിടെ പ്രായപൂര്ത്തിയെത്തുന്നു. ചെറുകുടലില്നിന്നു പിത്തനാളിയില്ക്കൂടി കരളിലെത്തി അവിടെ മുട്ടയിടുകയും പശുവിന്റെ ചാണകത്തോടൊപ്പം മണ്ണിലെത്തുകയും, ആ മുട്ടകള്, തന്നെ തിന്നാനെത്തുന്ന ഒച്ചിനെ കാത്ത് ഇരിക്കുകയും ചെയ്യുന്നു.
തന്റെ ജീവിതചക്രം മുന്നോട്ട് കൊണ്ടുപോകാന് വേണ്ടി മറ്റു പലജീവികളെയും ഉപയോഗിക്കുന്ന ഈ വിര അതിലൊരെണ്ണമായ ഉറുമ്പിന്റെ സ്വഭാവത്തെ നിയന്ത്രിക്കുന്ന ജീവിയായിപ്പോലും വര്ത്തിക്കുന്നു. ലോകത്തെല്ലായിടത്തും കാണപ്പെടുന്ന ഈ വിര ചെറുജീവികളെ ബാധിക്കാറുണ്ട്. പന്നി, ആട് തുടങ്ങിയ ജീവികളോടൊപ്പം അപൂര്വമായി മനുഷ്യരെയും ഇവ ആക്രമിക്കുന്നു. എന്നാല് ഇതുകൊണ്ട് കാര്യമായ ബുദ്ധിമുട്ടൊന്നും മനുഷ്യന് ഉണ്ടാവാറില്ല.
ഒച്ചുകള്ക്ക് ചാണകം തിന്നാനുള്ള മോഹം അതിനുള്ളില് നിറച്ചത് ആരാണാവോ? അത് ചാണകം തിന്നുന്നത് കൊണ്ടാണല്ലോ ഈ വിരകള്ക്ക് അതിന്റെ വംശം നിലനിര്ത്താനാവുന്നത്!
https://www.facebook.com/Malayalivartha