കൊലപാതക ബലാത്സംഗ കേസുകളില്‍ തൂക്കിലേറ്റപ്പെട്ട കൗമാരക്കാരന്‍ 18 വര്‍ഷത്തിന് ശേഷം നിരപരാധിയാണെന്ന് കോടതി വിധിച്ചു. ചൈനയിലെ ഇന്നര്‍ മംഗോളിയിയിലാണ് ഈ അസാധാരണ കോടതിവിധിയുണ്ടായത്. ഹുജില്‍റ്റു എന്ന 18 കാരനെയാണ് വധശിക്ഷ നടപ്പിലാക്കിയ ശേഷം കുറ്റവാളിയല്ലെന്ന് കണ്ടെത്തിയത്.

ഹുജില്‍റ്റുവിനെതിരേ ഉണ്ടായത് തെറ്റായ വിധിയാണെന്ന് തിങ്കളാഴ്ച മംഗോളിയ ഹയര്‍ പീപ്പിള്‍സ് കോടതി കണ്ടെത്തി.1996 ല്‍ ഹുജില്‍റ്റു കുറ്റക്കാരനാണെന്ന് കണ്ടെത്തി വധശിക്ഷയ്ക്ക് വിധേയമാക്കിയിരുന്നു. ഒരു പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തിയ ശേഷം ടെക്‌സ്‌റ്റൈല്‍ ഫാക്ടറിയുടെ ബാത്ത്‌റൂമില്‍ കൊത്തിയരിഞ്ഞിട്ടതായി ഇയാള്‍ കുറ്റസമ്മതം നടത്തിയതിന്റെ വെളിച്ചത്തിലായിരുന്നു അറസ്റ്റ്. സംഭവം നടന്ന 48 മണിക്കൂറിനുള്ളില്‍ പിടിയിലാകുകയും തുടര്‍ന്ന് 61 ദിവസത്തിന് ശേഷം വധശിക്ഷ നടപ്പാക്കുകയും ചെയ്തു.
എന്നാല്‍ ഒരു ടെക്‌സ്‌റ്റൈല്‍ ഫാക്ടറി ജീവനക്കാരി ഉള്‍പ്പെടെ 10 സ്ത്രീകളെ ബലാത്സംഗം ചെയ്ത് കൊന്നൊടുക്കിയതിന്റെ ഉത്തരവാദിത്വം ഏറ്റെടുത്ത് സാവോ സിഹോംഗ് എന്ന മറ്റൊരാള്‍ രംഗത്ത് വന്നതോടെ 2005 ല്‍ കേസ് വീണ്ടും വിചാരണയ്ക്ക് എടുക്കുകയായിരുന്നു. 
ഹുജില്‍റ്റ്‌സുവാണ് കുറ്റം ചെയ്തതെന്ന് സ്ഥിരീകരിക്കുന്ന തെളിവുകള്‍ നിലനില്‍ക്കുന്നതല്ലെന്ന് തിങ്കളാഴ്ച കോടതി പറഞ്ഞു. പത്തു വര്‍ഷമായി ഹുജില്‍റ്റ്‌സുവിന്റെ നിരപരാധിത്വം തെളിയിക്കുന്നതിനായി ഹുജില്‍റ്റ്‌സുവിന്റെ കുടുംബം നിയമ പോരാട്ടത്തിലായിരുന്നു. സംഭവത്തില്‍ ഹുജില്‍റ്റ്‌സുവിന്റെ മാതാപിതാക്കള്‍ക്ക് കോടതിയുടെ ഡെപ്യൂട്ടി പ്രസിഡന്റ് 30,000 യുവാന്‍ നഷ്ടപരിഹാരം നല്‍കി. പ്രായമായ ഇവരോട് ഡെപ്യൂട്ടി പ്രസിഡന്റ് മാപ്പ് അപേക്ഷിച്ചിട്ടുണ്ട്.
അതേസമയം ഒരിക്കല്‍ ശിക്ഷിക്കപ്പെടുകയും വര്‍ഷങ്ങള്‍ക്ക് ശേഷം കുറ്റവിമുക്തരാക്കുകയും ചെയ്യുന്ന അനേകം കേസുകള്‍ ചൈനയില്‍ അടുത്ത കാലത്ത് നടന്നിരുന്നതായിട്ടാണ് റിപ്പോര്‍ട്ടുകള്‍. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha