ഐപിഎലില്‍ മുംബൈയുടെ തുടര്‍ച്ചയായ നാലാം തോല്‍വി... കൊല്‍ക്കത്ത നൈറ്റ് റൈഡേഴ്‌സിന് മിന്നും ജയം. മിച്ചല്‍ സ്റ്റാര്‍ക്ക്, വരുണ്‍ ചക്രവര്‍ത്തി, സുനിന്‍ നരെയ്ന്‍ എന്നിവരടങ്ങിയ ബോളിങ് നിരയുടെ കരുത്തില്‍ മുംബൈ ഇന്ത്യന്‍സിനെ 24 റണ്‍സിനാണ് കൊല്‍ക്കത്ത നൈറ്റ് റൈഡേഴ്‌സ് തോല്‍പ്പിച്ചത്.


170 റണ്‍സ് വിജയലക്ഷ്യം പിന്തുടര്‍ന്ന് ബാറ്റു ചെയ്ത മുംബൈയുടെ ഇന്നിങ്‌സ് 18.5 ഓവറില്‍ 145 റണ്‍സില്‍ അവസാനിച്ചു. അര്‍ധസെഞ്ചറി നേടിയ സൂര്യകുമാര്‍ യാദവ് (35 പന്തില്‍ 56) മാത്രമാണ് മുംബൈ നിരയില്‍ പൊരുതിയത്. കൊല്‍ക്കത്തയ്ക്കായി മിച്ചല്‍ സ്റ്റാര്‍ക്ക് നാല് വിക്കറ്റ് വീഴ്ത്തിയപ്പോള്‍ വരുണ്‍ ചക്രവര്‍ത്തി, സുനില്‍ നരെയ്ന്‍, ആന്ദ്രെ റസ്സല്‍ എന്നിവര്‍ രണ്ടു വിക്കറ്റ് വീതം വീഴത്തുകയും ചെയ്തു.

ഐപിഎലില്‍ മുംബൈയുടെ തുടര്‍ച്ചയായ നാലാം തോല്‍വിയാണിത്. ഇതോടെ മുംബൈയുടെ പ്ലേഓഫ് പ്രതീക്ഷകള്‍ ഏറെക്കുറെ അവസാനിക്കുകയും ചെയ്തു. രണ്ടാം സ്ഥാനത്തുള്ള കൊല്‍ക്കത്ത, 14 പോയിന്റുമായി ലീഡുയര്‍ത്തി. മറുപടി ബാറ്റിങ്ങില്‍, പവര്‍പ്ലേ അവസാനിക്കുന്നതിനു മുന്‍പു തന്നെ മുംബൈയുടെ ആദ്യ മൂന്നു വിക്കറ്റുകള്‍ വീണു. ഇഷാന്‍ കിഷന്‍ (7 പന്തില്‍ 13), രോഹിത് ശര്‍മ (12 പന്തില്‍ 11), നമന്‍ ധിര്‍ (11 പന്തില്‍ 11) എന്നിവരുടെ വിക്കറ്റുകളാണ് ആദ്യ ആറ് ഓവറിനുള്ളില്‍ വീണത്.

പിന്നീട് നാലാം വിക്കറ്റില്‍ സൂര്യകുമാര്‍ തിലക് വര്‍മ സഖ്യം ഒന്നിച്ചെങ്കിലും അധികം വൈകാതെ തിലകും (6 പന്തില്‍ 4) പുറത്തായി. ഒരുവശത്ത് സൂര്യകുമാര്‍ നിന്നു പൊരുതിയപ്പോള്‍ മറുവശത്ത് വിക്കറ്റുകള്‍ വീണുകൊണ്ടേയിരുന്നു. 16ാം ഓവറില്‍ സൂര്യ വീണതോടെ ആദ്യ പ്രതീക്ഷയും അസ്തമിച്ചു. നേഹല്‍ വധേര (11 പന്തില്‍ 6), ക്യാപ്റ്റന്‍ ഹാര്‍ദിക് പാണ്ഡ്യ (3 പന്തില്‍ 1), ജെറാള്‍ഡ് കോട്ട്‌സെ (6 പന്തില്‍ 8), പീയുഷ് ചൗള (പൂജ്യം) എന്നിവര്‍ക്കാര്‍ക്കും തിളങ്ങാന്‍ കഴിഞ്ഞില്ല.