മലയാറ്റൂര് ഓര്മ്മയായിട്ട് 17 വര്ഷം; മലയാറ്റൂര് താമസിച്ചിരുന്ന സ്ഥലത്ത് മലയാറ്റൂരിന് സ്മാരകം വേണമെന്ന് സംഘടന
മലയാറ്റൂര് രാമകൃഷ്ണന്റെ ഓര്മ്മക്ക് അദ്ദേഹം താമസിച്ചിരുന്ന കരമന ശാസ്ത്രി നഗറിലെ സര്ക്കാര് മിച്ചഭുമിയില് കേരള സാഹിത്യ അക്കാദമിയുടെ തിരുവനന്തപുരം സെന്റര് സ്ഥാപിക്കണമെന്ന് മലയാറ്റൂര് സ്മാരക വേദിയായ വേരുകള്-മലയാറ്റൂര് ഓര്മ്മക്കൂട്ടം സാംസ്ക്കാരിക മന്ത്രിക്ക് നിവേദനം നല്കി.
കഴിഞ്ഞ ദിവസമായിരുന്നു (ഡിസംബര് 27) മലയാറ്റൂറിന്റെ 17-ാം ചരമദിനം. 1997 ഡിസംബര് 27 നാണ് അദ്ദേഹം അന്തരിച്ചത്. ശാസ്ത്രിനഗര് സൗത്തില് കളിസ്ഥലമായി ഉപയോഗിക്കുന്ന സര്ക്കാര്വക മിച്ചഭൂമി സ്മാരകമാക്കണമെന്നാണ് സംഘടനയുടെ ആവശ്യം.
നാലുവയസ്സുമുതല് കരമനയിലെ ഒരു അഗ്രഹാരത്തിലാണ് മലയാറ്റൂര് താമസിച്ച് പഠിച്ചിരുന്നത്. ഐ.എ.എസുകാരനായ ശേഷം ശാസ്ത്രിനഗര് സൗത്തില് സ്ഥലം വാങ്ങി 1970 നവംബര് 18 ന് വൈദേഹി നിര്മ്മിച്ചു. വയലാര് രാമവര്മ്മ ഉള്പ്പെടെയുള്ള എഴുത്തുകാരുടെ തിരുവനന്തപുരത്തെ അഭയകേന്ദ്രമായിരുന്നു വൈദേഹി. ജീവിതത്തിന്റെ അന്ത്യദിനംവരെ മലയാറ്റൂര് എഴുത്തും വായനയും വരയുമായി കൂടിയതും വൈദേഹിയിലാണ്. മലയാറ്റൂര് അന്ത്യവിശ്രമം കൊള്ളുന്നത് കരമനയിലെ ബ്രാഹ്മണ സമുദായം ശ്മശാനത്തിലാണ്.
നേരത്തെ പെരുമ്പാവൂരില് ഒരു മന മലയാറ്റൂര് സ്മാരകമാക്കിയെങ്കിലും പ്രവര്ത്തനം തുടങ്ങുന്നതിനു മുമ്പ് നിലച്ചതായി വേരുകള്-മലയാറ്റൂര് ഓര്മ്മക്കൂട്ടം ഭാരവാഹികളും മാധ്യമ പ്രവര്ത്തകരുമായ പി.എം.ബിനുകുമാറും പി ഗോപീനാരായണനും സി.റഹീമും നിവേദനത്തില് പറഞ്ഞു.
ഇപ്പോള് കേരള സാഹിത്യ അക്കാദമിക്ക് തിരുവനന്തപുരത്ത് സെന്ററില്ല. മറ്റ് പല സാംസ്ക്കാരിക സ്ഥാപനങ്ങള്ക്കും തിരുവനന്തപുരത്ത് സെന്ററുണ്ട്. ഏറ്റവുമധികം സാഹിത്യകാരന്മാരുള്ള നഗരമാണ് തിരുവനന്തപുരം.
മലയാറ്റൂരിന്റെ പേരില് അനുവദിക്കുന്ന സാഹിത്യ അക്കാദമി സെന്ററില് മലയാറ്റൂര് പാര്ക്ക്, ലൈബ്രറി, കോണ്ഫറന്സ്ഹാള്, സാഹിത്യകാരന്മാര്ക്ക് താമസിക്കാനുള്ള മുറികള് തുടങ്ങിയവ അടങ്ങുന്ന ഒരു കോംപ്ലക്സ് അനുവദിക്കണമെന്നും വേരുകള് മലയാറ്റൂര് ഓര്മ്മക്കൂട്ടത്തിന്റെ നിവേദനത്തില് പറയുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha