മദ്രസാ അധ്യാപകന്‍ സോഷ്യല്‍ മീഡിയയില്‍ താരം, നരകയാതന അനുഭവിച്ച തെരുവു നായക്ക് പുതുജീവന്‍ നല്‍കി!
ശരീരത്തില്‍ മുറിവേറ്റ് നരക യാതന അനുഭവിച്ചു കൊണ്ടിരുന്ന ഒരു തെരുവു നായയെ, ഉരുവച്ചാല്‍ ടൗണ്‍ ജുമാ മസ്ജിദ് ഖത്തീബും മദ്രസ അധ്യാപകനുമായ കൈതേരി കപ്പണയിലെ ഹാരിസ് ജമാലി കണ്ടത് കുടുംബത്തോടൊപ്പമുള്ള വാഹനയാത്രയ്ക്കിടെയാണ്.
നിര്‍മലഗിരിയില്‍ റോഡരികില്‍ ദേഹത്ത് കേബിള്‍ കുടുങ്ങി മുറിവേറ്റ നിലയിലായിരുന്നു നായ. കേബിള്‍ കുടുങ്ങിയതു കാരണം വലതു കൈയുടെ മാംസം അഴുകുകയും എല്ല് പുറത്തു കാണുന്ന രീതിയിലുമായിരുന്നു.വാഹനത്തില്‍ നിന്നും ഇറങ്ങിയ ഹാരിസ് ജമാലി ഒരു മണിക്കൂറോളം നീണ്ട പരിശ്രമത്തിനൊടുവില്‍ നായയുടെ ദേഹത്ത് നിന്നും കുരുക്കഴിച്ചു.
ഇതിനിടെ ചില ഓട്ടോ ഡ്രൈവറും ഇതിലേ വരികയായിരുന്ന ഹാരിസ് ജമാലിയുടെ സഹപാഠിയായിരുന്ന സ്ത്രീയും ഇദ്ദേഹത്തിന് സഹായിയായി.സ്ത്രീ ടൗണില്‍ പോയി വാങ്ങിയ മരുന്നും തുണിയും മുറിവില്‍ വെച്ചു കെട്ടി നായയെ വിട്ടയക്കുകയായിരുന്നു.
അഞ്ചു ദിവസം മുമ്പായിരുന്നു സംഭവമെങ്കിലും ഹാരിസ് ജമാലി നായയെ രക്ഷപ്പെടുത്തുന്ന ദൃശ്യം ചിലര്‍ മൊബൈലില്‍ പകര്‍ത്തി സമൂഹമാധ്യമങ്ങളിലൂടെ പ്രചരിപ്പിച്ചതോടെയാണ് സംഭവം വൈറലായത്.
താന്‍ നടത്തിയ കാരുണ്യ പ്രവൃത്തിയെ കുറിച്ച് ഹാരിസ് ജമാലിയോട് ചോദിച്ചപ്പോള്‍ അദ്ദേഹം പറയുന്നതിങ്ങിനെ: പലരും മാറ്റിനിര്‍ത്തുന്ന ജീവിയായിട്ടു പോലും അതിന്റെ വേദന എനിക്ക് ഉള്‍ക്കൊള്ളാനായി. വ്രണിതമായ ജീവിയുടെ വേദന എത്രമാത്രം കഠിനമാണെന്ന് എനിക്ക് ബോധ്യമായി. ഒരു ജീവിയേയും പ്രയാസപ്പെടുത്തരുത്, ഓരോ ജീവനും വിലയുണ്ട്.
വേനല്‍ക്കാലത്ത് ദാഹിച്ച് വലയുന്നവര്‍ക്ക് സൗജന്യമായി സംഭാരം വിതരണം ചെയ്തും ഇദ്ദേഹം നേരത്തെ ശ്രദ്ധേയനായിരുന്നു. കേരള എമര്‍ജന്‍സി ടീം അംഗമായ ഇദ്ദേഹം ദുരിതാശ്വാസം, രക്തദാനം, സാന്ത്വന പരിചരണം തുടങ്ങിയ രംഗങ്ങളിലും സജീവ സാന്നിധ്യമാണ്. കേരള എമര്‍ജന്‍സി ടീമിനൊപ്പം കഴിഞ്ഞ പ്രളയകാലത്ത് ദുരിതാശ്വാസ പ്രവര്‍ത്തനങ്ങളില്‍ ഏര്‍പ്പെട്ട ഹാരിസ് ജമാലി ഈ പ്രളയകാലത്തും അത്തരം തിരക്കുകളിലാണ്.
https://www.facebook.com/Malayalivartha
