ഗര്‍ഭിണികളെ അടിയന്തരമായി നാട്ടിലെത്തിക്കണമെന്ന മുറവിളിക്കു വൈകിയാണെങ്കിലും പരിഹാരമുണ്ടായി. ആശങ്കകളോടെ അന്യനാട്ടില്‍ കഴിഞ്ഞ ഗര്‍ഭിണിമാര്‍ക്ക് നാടണയുന്നതിന്റെ ആഹ്ലാദമായി.

5 വര്‍ഷമായി റിയാദിലെ കിങ് സല്‍മാന്‍ ആശുപത്രിയില്‍ നഴ്‌സുമാരാണ് പാലാ സ്വദേശി അഞ്ജു ജോബിനും രാമപുരം സ്വദേശിയായ ഭാഗ്യലക്ഷ്മി മനുവും. ഒന്നര മാസമായി നാട്ടിലെത്താനുള്ള കിണഞ്ഞ പരിശ്രമത്തിലായിരുന്നു.

റിയാദില്‍ നിന്ന് 600 കിലോമീറ്റര്‍ അകലെ കിങ് ഫഹദ് ആശുപത്രിയിലെ സ്റ്റാഫ് നഴ്‌സായ കൊല്ലം ശാസ്താംകോട്ട സ്വദേശി പ്രീതി തോമസിനെ സൗദി ആരോഗ്യവകുപ്പാണു നേരിട്ടു വിമാനത്താവളത്തിലെത്തിച്ചത്. നിറവയറോടെയെത്തുന്ന പ്രീതിയെ കേരള ആരോഗ്യവകുപ്പ് കൊല്ലത്തെ വീട്ടിലെത്തിക്കുമെന്നാണ് അറിയിച്ചിരിക്കുന്നത്.

സൗദിഫ്രാന്‍സ് ബാങ്കില്‍ ജോലി ചെയ്യുന്ന ഷാഹുല്‍ ഹമീദിന്റെ ഭാര്യ കോഴിക്കോട് സ്വദേശി ഷഹീല ഫെബിനും കടിഞ്ഞൂല്‍ പ്രസവത്തിനു മാതാപിതാക്കളുടെ സ്‌നേഹത്തണലിലേക്ക് എത്താനാകുന്നതിന്റെ ആവേശത്തിലാണ്. 8 മാസം ഗര്‍ഭിണിയായ അവര്‍ക്ക് യാത്രാനുമതി നല്‍കില്ലെന്ന് അധികൃതര്‍ ശഠിച്ചെങ്കിലും യുവതിയുടെ പ്രയാസവും ഇവിടുത്തെ പരിമിതിയും ബോധ്യപ്പെടുത്തിയപ്പോള്‍ ഒടുവില്‍ അനുമതി നല്‍കുകയായിരുന്നു.

ബഹ്‌റൈനില്‍ നിന്നു ഗര്‍ഭിണിയായ ഭാര്യ രേഷ്മയുമായി നാട്ടിലേക്കു മടങ്ങുന്ന ആറന്‍മുള സ്വദേശി ബിനുവും സന്തോഷത്തിലാണ്.'' അപ്രതീക്ഷിതമായാണ് എംബസിയില്‍ നിന്നുള്ള വിളി വന്നത്. തക്കസമയത്ത് കൈയില്‍ പണമുണ്ടായിരുന്നു. 2 ദിവസത്തിനുള്ളില്‍ ടിക്കറ്റിന്റെ പണമടച്ചു. എന്നാല്‍, ടിക്കറ്റിനുള്ള പണമില്ലാത്ത എത്രയോ പേര്‍ ഉണ്ടാകും. ആരെങ്കിലും സഹായിച്ചാല്‍ മാത്രമേ അവര്‍ക്കു മടങ്ങാനാവൂ.

ബഹ്‌റൈന്‍ ഒരു ചെറിയ രാജ്യമാണ്. ഇവിടെ ഇനിയും എത്രയോ പ്രവാസികള്‍ നാട്ടിലേക്കു മടങ്ങാനായി കാത്തിരിക്കുന്നുണ്ട്. അവര്‍ക്കൊക്കെ ഇനി എപ്പോഴാണു മടങ്ങാന്‍ കഴിയുകയെന്നറിയില്ല. ഇവിടെയുളള സംഘടനകള്‍ രാഷ്ട്രീയമോ, മതമോ, ജാതിയോ ഒന്നും നോക്കാതെ നമുക്കു വേണ്ടി ഓടി നടക്കുന്നുണ്ട്. അതാണ് ആശ്വാസം. അല്ലെങ്കിലും സങ്കടങ്ങള്‍ എല്ലാ കാലത്തേക്കുമുള്ളതല്ലല്ലോ ''- ബിനു പറഞ്ഞു.

ഭര്‍ത്താവ് നിജോ സാമുവല്‍ വര്‍ഗീസിനൊപ്പം ഷാര്‍ജയിലാണു കോട്ടയം സ്വദേശി ടാനിയ സാറാ അലക്‌സാണ്ടര്‍ താമസിച്ചിരുന്നത്. കോട്ടയത്തേക്കാണ് പോരേണ്ടതെങ്കിലും കരിപ്പൂര്‍ വിമാനം കിട്ടിയപ്പോള്‍ 8 മാസം ഗര്‍ഭിണിയായ ടാനിയ ഒട്ടും മടിച്ചില്ല. ടാനിയയ്ക്ക് യാത്രാനുമതി ലഭിക്കുന്നതിനുള്ള സാധ്യത ഓരോ ദിവസവും കുറഞ്ഞു വരികയായിരുന്നു. എങ്ങനെയും നാട്ടില്‍ എത്തുക എന്ന ഒരു വിചാരം മാത്രമാണ് ടാനിയയെ നയിച്ചത്. ആദ്യ കണ്‍മണിക്കായുള്ള കാത്തിരിപ്പിലാണ് ഇരുവരും.

കരിപ്പൂരില്‍ നിന്നു ടാനിയയെ നാട്ടിലെത്തിക്കാന്‍ അമ്മ ലില്ലി കോട്ടയത്തു നിന്ന് ആംബുലന്‍സുമായി പോയാണ് കൂട്ടിക്കൊണ്ടു വന്നത്. വീട്ടില്‍ പ്രത്യേകം മുറി തയാറാക്കി ക്വാറന്റീനില്‍ കഴിയുകയാണ് ടാനിയ. അടുത്ത ദിവസം പരിശോധനയ്ക്കായി ആശുപത്രിയില്‍ പോകുന്നതിനുള്ള അനുമതി ജില്ലാ മെഡിക്കല്‍ ഓഫിസില്‍ നിന്നു ലഭിച്ചിട്ടുണ്ട്.