ഝാര്‍ഖണ്ഡിലെ ഗോഡ്ഡ സ്വദേശിയായ ധനഞ്ജയ കുമാര്‍ മാഞ്ചി ഝാര്‍ഖണ്ഡ്, ബിഹാര്‍, ഉത്തര്‍പ്രദേശ് എന്നീ സംസ്ഥാനങ്ങളിലെ ദുര്‍ഘട പാതകള്‍ താണ്ടി ഭാര്യ സോണിയുമായി മധ്യപ്രദേശിലെ ഗ്വാളിയോറില്‍ എലമെന്ററി എഡ്യൂക്കേഷന്‍ വിഭാഗത്തിലെ ഡിപ്ലോമ പരീക്ഷയ്ക്ക് എത്തി. ബംഗ്ലാദേശിനോട് ചേര്‍ന്നുള്ള അതിര്‍ത്തി ഗ്രാമത്തില്‍ താമസിക്കുന്ന ഇവര്‍ മൂന്നു ദിവസം യാത്ര ചെയ്താണ് ഗ്വാളിയറില്‍ എത്തിയത്. കൊവിഡ് ലോക്ഡൗണിനെ തുടര്‍ന്ന് പൊതുഗതാഗത സൗകര്യം ഇല്ലാത്തതാണ് ഇവരെ വലച്ചത്.

എട്ടാം ക്ലാസ് വരെ മാത്രം പഠിക്കാനെ മാഞ്ചിക്ക് കഴിഞ്ഞുള്ളു. എന്നാല്‍ ഭാര്യ അധ്യാപികയായി കാണണമെന്ന ആഗ്രഹമാണ് ഈ കഷ്ടതകള്‍ സഹിക്കാന്‍ ഇവരെ പ്രേരിപ്പിച്ചത്. കാന്റീന്‍ ജീവനക്കാരനായ മാഞ്ചിയ്ക്ക് കൊവിഡ് കാരണം മൂന്നു മാസമായി ജോലിയില്ല. കയ്യില്‍ പണമില്ലാത്തതിനാല്‍ ഭാര്യയുടെ ആഭരണങ്ങള്‍ പണയം വച്ചാണ് ഇന്ധനചെലവിനും വഴിചെലവിനുമുള്ള പണം സംഘടിപ്പിച്ചത്. 2019-ലാണ് ദമ്പതിമാര്‍ വിവാഹിതരായത്.

യാത്ര ഭാര്യയ്ക്ക് ഏറെ കഷ്ടപ്പാടുകള്‍ നിറഞ്ഞതായിരുന്നു. തുടര്‍ച്ചയായ യാത്ര കാലുകളില്‍ മരവിപ്പ് ഉണ്ടാക്കി. നടുവിനും ഇടുപ്പിനും വയറിനും കടുത്ത വേദനയും നല്‍കി. എന്തുവന്നാലും ഒരു ജോലി എന്ന ആഗ്രഹം ഇതെല്ലാം തരണം ചെയ്യാന്‍ പ്രേരിപ്പിച്ചുവെന്ന് സോണി പറയുന്നു.

യാത്രയ്ക്കിടെ ഒരു ദിവസം മുസാഫര്‍പുരിലെ ഒരു ലോഡ്ജില്‍ താമസിച്ചു. പിന്നീട് ലക്നൗവിലെ ടോള്‍ പ്ലാസയിലാണ് കിടന്നുറങ്ങിയത്. യാത്രയില്‍ മഴ പലപ്പോഴും വില്ലനായി. മഴ മാറാന്‍ കാത്ത് മരങ്ങള്‍ക്കു കീഴെ മണിക്കൂറുകള്‍ നില്‍ക്കേണ്ടിവന്നു. ബിഹാറിലെ പ്രളയത്തിനും ഇവരുടെ നിശ്ചയദാര്‍ഢ്യത്തെ തകര്‍ക്കാന്‍ കഴിഞ്ഞില്ല.

ഭാര്യയുടെ ഓര്‍മ്മയ്ക്കായി വലിയ മല ഒറ്റയ്ക്ക് തുരന്ന് റോഡ് നിര്‍മ്മിച്ച ദശരഥ് മാജിയാണ് ധനഞ്ജയ കുമാര്‍ മാഞ്ചിയ്ക്ക് പ്രചോദനമായത്.

ദമ്പതികളുടെ കഷ്ടപ്പാടുകള്‍ മനസിലാക്കിയ ഗ്വാളിയര്‍ കളക്ടര്‍ കൗശലേന്ദ്ര വിക്രം സിംഗ് അവരെ പരിപാലിക്കാന്‍ ജില്ലാ വനിതാ ശാക്തീകരണ ഓഫീസര്‍ ഷലീന്‍ ശര്‍മയോട് നിര്‍ദ്ദേശിക്കുകയും 5,000 രൂപ അടിയന്തര സഹായമായി നല്‍കുകയും ചെയ്തു.

ഭരണകൂടം അവരുടെ വാടകയ്ക്ക് പണം നല്‍കുകയും ഭക്ഷണത്തിനുള്ള ക്രമീകരണങ്ങള്‍ നടത്തുകയും ചെയ്യും. അവരെ സുരക്ഷിതമായി അവരുടെ ഗ്രാമത്തിലേക്ക് തിരിച്ചയക്കാമെന്നും അവര്‍ വാഗ്ദാനം ചെയ്തിട്ടുണ്ട്.

യുവതി ഗര്‍ഭിണിയായതിനാല്‍ അവര്‍ക്ക് പ്രത്യേക ശ്രദ്ധ നല്‍കുന്നുണ്ടെന്നും വൈദ്യപരിശോധനയും അള്‍ട്രാസൗണ്ടും ഞായറാഴ്ച നടത്തുമെന്നും അദ്ദേഹം പറഞ്ഞു.