സുഖമായി യാത്ര ചെയ്യണമെന്ന് കരുതിയാണ് പല യാത്രക്കാരും ട്രെയിനില്‍ സ്ലീപ്പര്‍ ക്ലാസ് ടിക്കറ്റെടുക്കുന്നത്. പക്ഷെ, ഇനി അത് നടക്കില്ല. കാരണം , സ്ലീപ്പര്‍ ക്ലാസില്‍ പകല്‍ യാത്ര ചെയ്യുന്നവര്‍ക്ക് കനത്ത തിരിച്ചടിയായി പുതിയ നിയമം. റിസര്‍വേഷന്‍ ഇല്ലാതെ സ്ലീപ്പര്‍ ക്ലാസ് ടിക്കറ്റെടുത്ത് യാത്ര ചെയ്യുന്നവര്‍ക്കാണ് ഈ നിയമം പ്രധാനമായി തിരിച്ചടിയാകുന്നത്. ഏറ്റവും കുറഞ്ഞത് 200 കിലോമീറ്റര്‍ ദൂരത്തിന്റെ യാത്രാനിരക്കും ഒപ്പം റിസര്‍വേഷന്‍ ചാര്‍ജും നല്‍കിയാല്‍ മാത്രമേ മെയ് ഒന്നു മുതല്‍ സ്ലീപ്പര്‍ ക്ലാസുകളില്‍ ഹ്രസ്വദൂര യാത്ര ചെയ്യാന്‍ കഴിയൂ. ഡീ റിസേര്‍വ്ഡ് കോച്ചുകളില്‍ മാത്രമേ യാത്ര ചെയ്യാന്‍ സാധിക്കൂ എന്നതും നിര്‍ബന്ധമാക്കിയിട്ടുണ്ട്.
അതായത് കുറഞ്ഞ ദൂരം യാത്ര ചെയ്യുന്നവര്‍ ഇനി ഇരട്ടിയോളം തുക സ്ലീപ്പര്‍ ക്ലാസിനായി നല്‍കേണ്ടി വരും എന്നതാണ് യാഥാര്‍ത്ഥ്യം. എക്‌സ്പ്രസ് ട്രെയിനില്‍ തിരുവനന്തപുരത്തു നിന്നു കൊല്ലം വരെ സ്ലീപ്പര്‍ ക്ലാസ് ടിക്കറ്റെടുത്തു യാത്ര ചെയ്താലും യാത്രക്കാര്‍ക്ക് നഷ്ടം. റിസര്‍വേഷന്‍ കമ്പാര്‍ട്ടുമെന്റില്‍ യാത്ര ചെയ്യുന്നതിന് 65 രൂപയാണ് ഈടാക്കിയിരുന്നത്. എന്നാല്‍, പുതിയ നിയമം വരുന്നതോടെ മെയ് ഒന്നു മുതല്‍ ഇതിനായി ഈടാക്കുന്നത് തിരുവനന്തപുരത്തു നിന്നു 200 കിലോമീറ്ററിന് ഈടാക്കുന്ന 120 രൂപയും റിസര്‍വേഷന്‍ ചാര്‍ജുമാണ്.
റിസര്‍വേഷന്‍ കോച്ചുകളില്‍ പകല്‍സമയങ്ങളില്‍ യാത്രചെയ്യാന്‍ അനുവാദം നല്കിയിരുന്നത് ഹ്രസ്വദൂര യാത്രക്കാര്‍ക്ക് ഏറെ സഹായകരമായിരുന്നു. എന്നാല്‍ റിസര്‍വേഷന്‍ ബോഗികളില്‍ വന്‍തോതില്‍ ആളുകള്‍ കയറിക്കൂടുന്നതിലാല്‍ യാത്ര ദുരിതമാണെന്നു റിസര്‍വേഷന്‍ യാത്രക്കാരുടെ ഭാഗത്തു നിന്നു നിരവധി പരാതികള്‍ ഉയര്‍ന്നതിനാലാണ് ഇത്തരമൊരു തീരുമാനമെന്നാണ് റെയില്‍വെ വ്യക്തമാക്കുന്നത്. ഏതായാലും ഇത്തരത്തിലുള്ള പുതിയൊരു നിയമം യാത്രക്കാര്‍ക്ക് തലവേദനയാകുമെന്നത് ഉറപ്പ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha