മരംമുറിക്കേസില്‍ മുന്‍ മന്ത്രിമാര്‍ക്ക് പങ്ക് എന്താണെന്ന് എന്നാണ് ഇപ്പോള്‍ ചര്‍ച്ച ചെയ്യപ്പെടുന്നത്. സംഭവത്തില്‍ മുമ്പ് പ്രതിസ്ഥാനത്തുള്ള ബെന്നി പറഞ്ഞത് മുന്‍ വനം മന്ത്രി എല്ലാം അറിഞ്ഞുവെന്നാണ്. പ്രതിയുടെ വെളിപ്പെടുത്തലായതുകൊണ്ടു തന്നെ ഇത് വിശ്വസനീയമല്ലെന്ന് ഇടതുസര്‍ക്കാരിന് വാദിക്കാം. എന്നാല്‍ ഇപ്പോളത്തെ വനം മന്ത്രി ഇന്ന് നടത്തിയ പ്രസ്താവന അങ്ങനെ തള്ളികളയാന്‍ പറ്റുന്നത് അല്ല. പട്ടയ ഭൂമിയില്‍ നിന്ന് മരങ്ങള്‍ മുറിച്ച് മാറ്റുന്നതിനായി ഇറക്കിയ വിവാദ ഉത്തരവിലെ ബുദ്ധിമുട്ടുകള്‍ വനം സെക്രട്ടറി വനംവകുപ്പിനെ അറിയിച്ചിരുന്നു എന്നാണ് മന്ത്രി എകെ ശശീന്ദ്രന്‍ ഇന്ന് വെളിപ്പെടുത്തിയത്.

ഉത്തരവിലെ അപാകത പല തലത്തില്‍ സര്‍ക്കാറിന്റെ ശ്രദ്ധയില്‍ വന്നിട്ടുണ്ടെന്ന് മന്ത്രി പറഞ്ഞു. അങ്ങനെ വന്നപ്പോഴാണ് വനം വകുപ്പ് റവന്യു വകുപ്പിന്റെ ശ്രദ്ധയിലേക്ക് വിഷയം കൊണ്ടുവന്നത്. വനം റവന്യു വകുപ്പുകള്‍ തമ്മില്‍ ഇക്കാര്യത്തില്‍ മന്ത്രി തല ചര്‍ച്ച നടത്തിയിരുന്നെങ്കിലും വിവാദ ഉത്തരവ് ഇറക്കും മുമ്പ് ഇടതുമുന്നണിയില്‍ ചര്‍ച്ച ചെയ്തിട്ടില്ലെന്നും എകെ ശശീന്ദ്രന്‍ പറയുന്നു. അതായത് മരം കൊള്ളയെ കുറിച്ച് മുന്‍ വനംമന്ത്രി കെ രാജുവിന് അറിയമായിരുന്നുവെന്ന് മുട്ടില്‍ മരംമുറികേസിലെ പ്രതി റോജി അഗസ്റ്റിന്റെ സുഹൃത്തും മരം വ്യാപാരിയുമായ ബെന്നി പറഞ്ഞത് വെറുതെ അല്ലെന്ന് സാരം.

കാരണം വനം വകുപ്പും റവന്യു വകുപ്പും കഴിഞ്ഞ തവണ കൈകാര്യം ചെയ്തിരുന്നത് സി.പി.ഐയുടെ മന്ത്രിമാരാണ്. വകുപ്പുകള്‍ തമ്മില്‍ ഇതു സംബന്ധിച്ച് ചര്‍ച്ച നടന്നുവെന്ന് ഇപ്പോഴത്തെ മന്ത്രി സമ്മതിക്കുമ്പോള്‍ സി.പി.ഐ മന്ത്രിമാര്‍ ഇത് മന്ത്രിസഭയുടെ ശ്രദ്ധയില്‍പ്പെടുത്താതെ കാര്യങ്ങള്‍ സ്വന്തം നിലക്ക് ചെയ്തുവെന്ന സൂചനയും മന്ത്രി എ.കെ ശശിന്ദ്രന്റെ പ്രസ്താവന പരിശോധിക്കുമ്പോള്‍ വ്യക്തമാകുന്നുണ്ട്.

സര്‍ക്കാര്‍ ഉത്തരവിന്റെ മറവില്‍ നടക്കുന്ന മരംമുറി തടഞ്ഞില്ലെങ്കില്‍ സര്‍ക്കാറിന് കോടികളുടെ നഷ്ടമുണ്ടാകുമെന്ന് താനടക്കമുള്ള മരവ്യാപാരികള്‍ രേഖാമൂലം പരാതിയായി നല്‍കിയെങ്കിലും നടപടിയൊന്നുമുണ്ടായില്ലെന്നും ബെന്നി മാധ്യമങ്ങളോട് പറഞ്ഞിരുന്നു. നിയമം ലംഘിച്ച് സര്‍ക്കാര്‍ മരം മുറിക്കാനുള്ള റോജിയുടെ ശ്രമത്തിനിടെയാണ് ടിബ്രര്‍ മര്‍ച്ചന്റ് അസോസിയേഷന്‍ ജില്ലാ വൈസ് പ്രസിഡന്റ് കൂടിയായ ബെന്നി പിരിയുന്നത്. തുടര്‍ന്ന് സംഘടന പ്രതിനിധികള്‍ക്കൊപ്പം തിരുവനന്തപുരത്തെത്തി വനം മന്ത്രിയടക്കമുള്ള പ്രധാന നേതാക്കള്‍ക്കെല്ലാം പരാതി നല്‍കി. തട്ടിപ്പിനെകുറിച്ചായിരുന്നു പരാതിയെന്ന് ബെന്നി പറയുന്നു. ബെന്നിക്ക് പിന്തുണയുമായി വയനാട്ടിലെ മരവ്യാപാരികളുമുണ്ട്. ഉത്തരവുണ്ടാക്കാന്‍ മുന്‍ റവന്യു-വനം മന്ത്രിമാര്‍ സഹായിച്ചുവെന്ന് റോജി പലതവണ പറഞ്ഞിട്ടുണ്ടെന്നും ബെന്നി വ്യക്തമാക്കിയിരുന്നു.

എന്നാല്‍ മുട്ടില്‍ മരംമുറി വിവാദമാകും മുന്‍പേ അന്വേഷണത്തിനു നിര്‍ദേശം നല്‍കിയിരുന്നതായി മുന്‍ വനംമന്ത്രി കെ. രാജു പറയുന്നത്. വയനാട്ടില്‍നിന്നുള്ള പരിസ്ഥിതി പ്രവര്‍ത്തകന്റെ പരാതി കിട്ടിയപ്പോള്‍, ഫെബ്രുവരിയില്‍ത്തന്നെ നടപടിക്കു ശുപാര്‍ശ ചെയ്തു വനംവകുപ്പ് ആസ്ഥാനത്തേക്ക് അയച്ചു. ഇതേക്കുറിച്ചുള്ള വാര്‍ത്ത ശ്രദ്ധയില്‍പ്പെട്ടപ്പോഴും അന്വേഷണത്തിനു നിര്‍ദേശിച്ചിരുന്നു. അതിന്റെ അടിസ്ഥാനത്തിലാകാം നിയമസഭയില്‍ ചര്‍ച്ചയാകുംമുന്‍പേ വനം ഉദ്യോഗസ്ഥര്‍ തടി പിടിച്ചെടുത്തു കേസെടുത്തത്. ഈ വിഷയത്തില്‍ തന്നെ ആരും വന്നു കണ്ടിട്ടില്ല. വനം വകുപ്പ് ഉദ്യോഗസ്ഥരുടെ ഭാഗത്തു വീഴ്ചയുണ്ടായിട്ടുണ്ടെങ്കില്‍ കര്‍ശന നടപടിയുണ്ടാകണം. അന്വേഷണ റിപ്പോര്‍ട്ടൊന്നും തന്റെ കാലത്തു വന്നിട്ടില്ലെന്നും അദ്ദേഹം വ്യക്തമാക്കി.

അതേസമയം കേരളത്തില്‍ സര്‍ക്കാര്‍ ഉത്തരവിന്റെ മറവില്‍ മരം മുറിച്ച് മാറ്റിയതൊന്നും വന ഭൂമിയില്‍ നിന്നല്ല. വനംഭൂമിയില്‍ നിന്നും മരംമുറിച്ചിട്ടില്ലെന്നും റവന്യൂഭൂമിയില്‍ നിന്നും മാത്രമാണ് മരംമുറിച്ചതെന്നും മന്ത്രി എ.കെ ശശീന്ദ്രന്‍ ഇന്നും ആവര്‍ത്തിച്ചു. വിജിലന്‍സ് വിഭാഗം ശക്തപ്പെടുത്തും. വനം വകുപ്പ് ഉദ്യോഗസ്ഥരുടെ തന്നിഷ്ടം അനുവദിക്കില്ലെന്നും മന്ത്രി വ്യക്തമാക്കുന്നുണ്ട്.

വയനാട് മാത്രമല്ല സംസ്ഥാനത്ത് നിരവധി സ്ഥലങ്ങളില്‍ റവന്യൂവകുപ്പിന്റെ ഉത്തരവ് മറയാക്കി വ്യാപകമായ മരമുറി നടന്നിട്ടുണ്ടെന്നാണ് ഡിജിപിയുടെ റിപ്പോര്‍ട്ട്. ക്രൈംബ്രാഞ്ച് മേധാവി എസ് ശ്രീജിത്തിന്റെ നേതൃത്വത്തിലുള്ള പ്രത്യേക സംഘം മരംകൊള്ള അന്വേഷിക്കും. ഡിജിപിയുടെ റിപ്പോര്‍ട്ടിന്റെ അടിസ്ഥാനത്തിലാണ് ക്രൈം ബ്രാഞ്ച് മേധാവിയുടെ നേതൃത്വത്തില്‍ വിജിലന്‍സ് വനം ഉദ്യോഗസ്ഥരുള്‍പ്പെടെ പ്രത്യേക സംഘത്തെ നിയോഗിച്ച് ഉത്തരവിറക്കിയത്.

വനം നിയമങ്ങളുടെ ലംഘനം മുതല്‍ അഴിമതിയും ഗൂഢാലോചനയും അടക്കം എല്ലാ വശങ്ങളും സംഘം അന്വേഷിക്കും. വനംഉദ്യോഗസ്ഥര്‍ക്കെതിരെ മരംമുറികേസിലെ പ്രതികള്‍ കോഴ ആരോപണം ഉന്നയിച്ചിരുന്നു. ഇതേ തുടര്‍ന്നാണ് പ്രത്യേക സംഘത്തെ നിയോഗിച്ചതെന്നും വനംമന്ത്രി അറിയിച്ചു.