ഹൃദയത്തെ വെല്ലുന്ന യന്ത്രഹൃദയം
ഹൃദയം മാറ്റിവയ്ക്കല് ശസ്ത്രക്രിയ നേരിടുന്ന ഏറ്റവും വലിയ വെല്ലുവിളി ഹൃദയത്തിന്റെ ലഭ്യതക്കുറവു തന്നെയാണ്. ഇതിനു ശാശ്വതപരിഹാരവുമായി യന്ത്രഹൃദയം ഒരുങ്ങുന്നു. മുംബൈ ബാന്ദ്രയിലെ ഏഷ്യന് ഹാര്ട്ട് ഇന്സ്റ്റിറ്റിയൂട്ട്, ബാംഗ്ലൂരിലെ നാരായണ ഹൃദയാലയ എന്നീ ആശുപത്രികളില് കൃത്രിമഹൃദയം രോഗികള്ക്കു ഘടിപ്പിക്കുന്നതു സംബന്ധിച്ച പരിശീലനപ്രവര്ത്തനങ്ങള് നടന്നുവരുന്നു. കൃത്രിമഹൃദയത്തിനു നാനൂറുഗ്രാമാണു ഭാരമുണ്ടാകുക. നാല്പതുലക്ഷത്തോളം പേരാണു നമ്മുടെ രാജ്യത്തു പ്രതിവര്ഷം ഹൃദയാഘാതത്തെ തുടര്ന്നു മരിക്കുന്നത്. ഹൃദയം മാറ്റിവയ്ക്കല് ശസ്ത്രക്രിയയ്ക്കു നിര്ദേശിക്കപ്പെടുന്ന രോഗികളില് ഒരു ശതമാനത്തിനു മാത്രമാണ് അനുയോജ്യമായ ഹൃദയം ലഭ്യമാക്കപ്പെടുന്നത്. ഹൃദയം ലഭിക്കാന് താമസിക്കുന്നതിനെ തുടര്ന്നു മരണത്തിനു കീഴടങ്ങുന്നവരും കുറവല്ല. കൃത്രിമഹൃദയം ഇത്തരം പ്രശ്നങ്ങള്ക്കുള്ള പ്രതിവിധിയാണ്. സാധാരണ ഹൃദയത്തെക്കാള് പകുതി വലിപ്പം മാത്രമാണിതിനുള്ളത്. അനുയോജ്യമായ ഹൃദയം ലഭിക്കുവാന് താമസം നേരിട്ടാല് തത്ക്കാലത്തേക്കു കൃത്രിമഹൃദയം ശസ്ത്രക്രിയയിലൂടെ ഘടിപ്പിച്ചു ജീവന് നിലനിര്ത്താന് കഴിയും. ചിലരില് കൃത്രിമഹൃദയം ഘടിപ്പിച്ചു കുറെക്കാലം കഴിയുമ്പോള് യഥാര്ത്ഥ ഹൃദയം കാര്യക്ഷമത വീണ്ടെടുത്തെന്നു ബോധ്യപ്പെട്ടാല് കൃത്രിമഹൃദയം നീക്കം ചെയ്യുകയുമാകാം. ലോകത്തു കൃത്രിമഹൃദയവുമായി ജീവിക്കുന്ന പതിനായിരത്തോളം ആളുകളെങ്കിലുമുണ്ടാകുമത്രെ. ഇന്ത്യയില് ഈ ശസ്ത്രക്രിയയ്ക്ക് ഒരുകോടി രൂപയെങ്കിലും ചിലവു വരുമെന്ന് ഏഷ്യന് ഹാര്ട്ട് ഇന്സ്റ്റിറ്റിറ്റിയൂട്ട് അധികൃതര് പറയുന്നു.
https://www.facebook.com/Malayalivartha
