നടിയെ ആക്രമിച്ചത് വ്യക്തമായ പ്ലാനോടെ; പ്രതികളെല്ലാം സിനിമാക്കാര്‍; അന്വേഷണം പുരോഗമിക്കുന്നതിങ്ങനെ
നടിയെ ആക്രമിച്ചത് വ്യക്തമായ പ്ലാനോടെയെന്ന് പോലീസ് കണ്ടെത്തല്‍. നടിയുടെ ഡ്രൈവര്‍ മാര്‍ട്ടിനും മുന്‍ ഡ്രൈവര്‍ സുനിയും വെള്ളിയാഴ്ച പകല്‍ മുഴുവന്‍ ഫോണിലൂടെ ബന്ധപ്പെട്ടിരുന്നു. ഇരുവരും നിരവധി തവണ ഫോണില്‍ സംസാരിച്ചതിന്റേയും എസ്എംഎസ് അയച്ചതിന്റേയും വിശദാംശങ്ങള്‍ പോലീസ് കണ്ടെത്തി. പ്രതികള്‍ എല്ലാവരും തന്നെ സിനിമാ പ്രവര്‍ത്തനങ്ങളുമായി ബന്ധപ്പെട്ടു പ്രവര്‍ത്തിക്കുന്നവരാണെന്ന് കണ്ടെത്തി.
നടിയുടെ യാത്രയും മറ്റും കാര്യങ്ങളും കൃത്യമായി മനസിലാക്കിയാണ് സംഘം പദ്ധതി ആസൂത്രണം ചെയ്തത്. നടിയെ ആക്രമിച്ച നഗ്‌നചിത്രങ്ങള്‍ പകര്‍ത്തി ബ്ലാക്ക്‌മെയില്‍ ചെയ്ത് പണം തട്ടാനായിരുന്നു സംഘത്തിന്റെ ശ്രമമെന്നും പോലീസിന് വ്യക്തമായി. ഇവരുടെ ക്വട്ടേഷന്‍ ബന്ധമുള്‍പ്പടെ പോലീസ് വിശദമായ അന്വേഷണം തുടങ്ങിയിട്ടുണ്ട്.
കേസില്‍ രാവിലെ തന്നെ പോലീസ് നടിയുടെ മൊഴിയും രേഖപ്പെടുത്തി. യാത്രയ്ക്കിടെ തന്റെ ഡ്രൈവര്‍ മാര്‍ട്ടിന്‍ ആര്‍ക്കോ എസ്എംഎസ് അയക്കുന്നത് കണ്ടിരുന്നുവെന്ന് നടി മൊഴി നല്‍കിയിട്ടുണ്ട്. യാത്രയ്ക്കിടെ മറ്റൊരു വാഹനത്തില്‍ കാര്‍ ഇടിപ്പിച്ച് നാടകീയമായി അക്രമികള്‍ തന്റെ വാഹനത്തിനുള്ളില്‍ കടക്കുകയായിരുന്നു. ക്വട്ടേഷന്‍ സംഘമാണെന്നും തന്നെ വധിക്കുമെന്നും ഭീഷണിമുഴക്കിയെന്ന് നടി പോലീസിനോട് പറഞ്ഞു.
വെള്ളിയാഴ്ച അര്‍ധരാത്രി തൃശൂരില്‍നിന്നു കൊച്ചിയിലേക്കു വരുന്‌പോഴായിരുന്നു നാടകീയ സംഭവങ്ങള്‍. കൊച്ചിയിലേക്കുള്ള യാത്രയ്ക്കിടെ അത്താണിയില്‍ വച്ചാണ് നടിക്കെതിരേ ആക്രമണമുണ്ടായത്. തൃശൂരിലെ ഷൂട്ടിംഗിനു ശേഷം രാത്രി എറണാകുളത്തേക്കു തിരിച്ചുവരുന്‌പോഴായിരുന്നു സംഭവം. കാര്‍ അത്താണിയില്‍ എത്തിയപ്പോഴായിരുന്നു സംഭവങ്ങളുടെ തുടക്കം. പിന്നാലെ എത്തിയ പ്രതികള്‍ സഞ്ചരിച്ചിരുന്ന വാഹനം നടി സഞ്ചരിച്ച ഔഡി കാറിന്റെ പിന്‍ഭാഗത്തു ഇടിപ്പിച്ചു. ഇതേത്തുടര്‍ന്നു നടിയുടെ വാഹനം നിര്‍ത്തി. പിന്നീട് എത്തിയ സംഘം ഡ്രൈവറുമായി തര്‍ക്കം തുടങ്ങി. തര്‍ക്കത്തിനിടെ പ്രതികളില്‍ രണ്ടു പേര്‍ നടിയുടെ കാറിലേക്ക് അതിക്രമിച്ചു കയറുകയായിരുന്നു. കാറില്‍ വച്ചു നടിയെ ഉപദ്രവിക്കുകയും അപമാനിക്കുകയും ചെയ്ത സംഘം നഗ്‌നചിത്രങ്ങള്‍ പകര്‍ത്താനും ശ്രമം നടത്തി.
കാറുമായി പ്രതികള്‍ നഗരത്തിന്റെ വിവിധ ഭാഗങ്ങളിലൂടെ സഞ്ചരിച്ച ശേഷം 12ഓടെ കാക്കനാടിനു സമീപം പടമുകളില്‍ എത്തി. അവിടെ വച്ചു പ്രതികള്‍ കാറില്‍നിന്ന് ഇറങ്ങി. പിന്നാലെ എത്തിയ ഇവരുടെ വാഹനത്തില്‍ കയറി രക്ഷപ്പെട്ടു. തുടര്‍ന്ന് നടി വാഴക്കാലയിലുള്ള നടനും സംവിധായകനുമായ ലാലിന്റെ വീട്ടില്‍ അഭയം തേടുകയായിരുന്നു. ലാലിന്റെ നിര്‍ദേശ പ്രകാരം പോലീസില്‍ വിവരം അറിയിച്ചു.
https://www.facebook.com/Malayalivartha
