സുധീരന് വന്നു കുടിയും നിന്നു... കുടിയന്മാരുടെ രണ്ടടി മുട്ടിച്ച സുധീരന് വീട്ടമ്മമാരുടെ കൈയ്യടി
മദ്യം വിഷമാണുണ്ണി അത്‌ കുടിക്കരുത്‌ എന്ന്‌ വലിയ പരസ്യ വാചകത്തോടൊപ്പം കുടിയന്മാരെ ആവോളം കുടിപ്പിച്ച്‌ പ്രോത്സാഹിപ്പിക്കുന്ന മനസാണ്‌ കാലാകാലങ്ങളിലെ സര്‍ക്കാരുകളുടെ നയം. അത്‌ കൊണ്ട്‌ തന്നെ കുടിയന്മാരെ കുളിപ്പിച്ചു കിടത്തുന്ന എക്‌സൈസ്‌ വകുപ്പിന്റെ മന്ത്രിയാകുന്നവനും ഒരു യോഗമാണ്‌. മേലനങ്ങാതെ ഇത്രയം തുട്ടുകള്‍ ഒരുമിച്ച്‌ പോക്കറ്റില്‍ വരുന്ന മറ്റൊരു വകുപ്പ് ഇല്ല തന്നെ.
ഒരാള്‍ എക്‌സൈസ്‌ മന്ത്രിയാകുന്നതോട്‌ കൂടി നാട്ടിലെ പ്രമാണികളായ മദ്യ ലോബികളെല്ലാം ചുറ്റും കൂടി തല ചൊറിയും. സഹായിച്ചില്ലെങ്കിലും ഉപദ്രപിക്കരുത്‌ എന്ന ഒറ്റ കണ്ടീഷനില്‍ അവര്‍ മന്ത്രിക്കും ഉദ്യോഗസ്ഥര്‍ക്കും അവര്‍ക്ക്‌ പ്രിയപ്പെട്ടതെല്ലാം ഒരുക്കും. ഇതിന്‌ പുറമേ ലോക്കല്‍ പോലീസ് മുതലുള്ളവര്‍ക്കുള്ള മാസപ്പടി വേറെ. അങ്ങനെ മന്ത്രിക്കും സന്തോഷം, എക്‌സൈസ്‌കാര്‍ക്കും സന്തോഷം, ലോക്കല്‍ പോലീസിനും സന്തോഷം, മദ്യ മുതലാളിമാര്‍ക്കും സന്തോഷം. അവരുടെ ആകെക്കൂടെയുള്ള ആ സന്തോഷത്തില്‍ കുടിയന്മാര്‍ക്ക്‌ ബഹു സന്തോഷം.
പക്ഷെ ഈ ഒരു സന്തോഷം പണ്ടില്ലായിരുന്നു. മുമ്പൊക്കെ രണ്ടെണ്ണം അടിക്കണമെങ്കില്‍ തലയില്‍ മുണ്ടിട്ട്‌ പാത്തും പതുങ്ങിയും ഓലക്കുടിലുകളില്‍ പോകണമായിരുന്നു. ഇടയ്‌ക്ക്‌ കണ്ണും കരളും പോയവനെ ഓര്‍ത്ത്‌ കരയാന്‍ അവനവന്റെ കുടുംബം മാത്രമായി. കുടിയന്മാരുടെ ഈ ധര്‍മ്മ സങ്കടം കണ്ട്‌ ജനകീയ സര്‍ക്കാരിന്‌ കണ്ണു നിറഞ്ഞു. അവര്‍ നാറ്റമുള്ള ആ ചാരായത്തേയും വാടകളേയും ആട്ടിപ്പായിച്ച്‌ ദൈവത്തിന്റെ സ്വന്തം നാട്ടില്‍ വിദേശ മദ്യങ്ങളെ ഇറക്കുമതി ചെയ്യാതെ ഇവിടെ തന്നെ തട്ടിക്കൂട്ടി ആകര്‍ഷകമായി ചില്ലിട്ടുവെച്ചു. മാന്യമായി രണ്ടെണ്ണം വിടാന്‍ എല്ലാ ഓണം കേറാ മൂലകളിലും ബാറുകളായി. പറമ്പുകളിലോ വണ്ടികളിലോ വീടുകളിലോ അടിച്ച്‌ തെറിവിളിക്കാന്‍ സൗകര്യമുള്ളവര്‍ക്കായി വിബറേജസ്‌ കോര്‍പറേഷനുകളുമായി. അങ്ങനെ കേരളത്തില്‍ മദ്യം മാന്യവത്‌കരിക്കപ്പെട്ടു.
നാല് തൂണും ഒരു ഷട്ടറുമുള്ള എല്ലാവരും ബാര്‍ലൈസന്‍സ്‌ നേടാന്‍ മന്ത്രിയുടേയും ഉദ്യോഗസ്ഥരുടേയും പുറകെ നെട്ടോട്ടമായി. കുടിക്കാന്‍ വരുന്നവര്‍ക്ക്‌ ബാറുകള്‍ ടു സ്റ്റാറാണോ ഫൈവ്‌ സ്റ്റാറാണോ എന്നൊന്നും നോക്കാന്‍ നേരമില്ല. അരണ്ട വെളിച്ചത്തില്‍ രണ്ടെണ്ണം അടിക്കണം. ഇരിക്കാന്‍ സീറ്റില്ലാതെ മൂത്രപ്പുരയുടെ സ്‌മെല്ലോടെ നിന്ന് രണ്ടെണ്ണം വീശി സ്ഥലം കാലിയാക്കും. പരാതിയുമില്ല, പരിഭവവുമില്ല. പക്ഷെ ഈ സ്റ്റാര്‍ പഹയന്മാര്‍ സ്റ്റാറിന്റെ എണ്ണം കണക്കാക്കിയാണ്‌ കാശ്‌ കൊള്ളയടിക്കുന്നതെന്ന്‌ ആരും ശ്രദ്ധിക്കാറുമില്ല. മാന്യമായി രണ്ടെണ്ണം വിടണമെന്നു മാത്രം.
കേരളത്തില്‍ പരാതി പറയാത്ത ഒരേയൊരു വര്‍ഗമാണ്‌ ഈ കുടിയന്മാര്‍ . സര്‍ക്കാര്‍ എത്ര വേണോ വില കൂട്ടിക്കോ. മഴയത്തോ വെയിലത്തോ എത്ര വേണമോ ക്യൂവും നില്‍ക്കാം.
അങ്ങനെ അഭംഗുരം തുടര്‍ന്നു വന്ന ബാര്‍ ലൈസന്‍സിന്റെ കാലാവധി തീര്‍ന്നത്‌ ഈ സുധീര യുഗത്തിലായത്‌ ഒരു ദൈവ നിയോഗമാണോ എന്തോ? സുധീരന്റെ വരവ്‌ ഗൗനിക്കാതെ നിലവാരമില്ലാത്ത ബാറുകള്‍ക്കെല്ലാം പ്രവര്‍ത്തനാനുമതി നല്‍കാനൊരുങ്ങിയ എക്‌സൈസ്‌ മന്ത്രി കെ ബാബുവിനേയും ഉമ്മന്‍ ചാണ്ടിയേയും സുധീരന് മൂക്കുകയറിട്ടു. ഇതിനിടെ മദ്യ രാജാക്കന്മാര്‍ പല വിധ കളികള്‍ കളിച്ചു. ലൈസന്‍സ്‌ തരൂ കൂടിയന്മാരുടെ കാശ്‌ കൊള്ളയടിച്ച്‌ പിന്നീട്‌ സൗകര്യപൂര്‍വം നിലവാരം കൂട്ടാമെന്ന്‌ പറഞ്ഞു നോക്കിയെങ്കിലും നോ രക്ഷ.
എല്ലാവശത്തു നിന്നുമുള്ള എതിര്‍പ്പുകളേയും അവഗണിച്ച്‌ ഉറച്ചു നിന്ന സുധീരന്റെ ഈ പ്രവൃത്തി സാധാരണക്കാരുടേയും ഒപ്പം കുടിയന്മാരുടേയും കൈയ്യടി നേടി. അല്‍പം കാത്തിരുന്നാലും സുഖിച്ച്‌ കുടിക്കാമല്ലോ എന്ന്‌ സ്വയം ആശ്വസിച്ച കുടിയന്മാരും കുറവല്ല.
സുധീരന്റെ ഈ സുധീരമായ തീരുമാനം പല മുഴുക്കുടിയന്മാരുടേയും കുടി കുറപ്പിച്ചു എന്നാണ്‌ കണക്കുകള്‍ കാണിക്കുന്നത്‌. കേരളത്തിലെ മദ്യ ഉപയോഗവും മദ്യാസക്തിയും കാര്യമായി കുറഞ്ഞു. സംസ്ഥാനത്ത്‌ 418 ബാറുകള്‍ അടച്ചിട്ടതോടെ കേരളത്തിലെ ആകെ മദ്യത്തിന്റെ ഉപഭോഗത്തില്‍ 9,63,000 ലിറ്ററിന്റെ കുറവുണ്ടായി.
തൊട്ടടുത്ത്‌ ബാറുകള്‍ ഇല്ലാത്തതിനാല്‍ വിബറേജസില്‍ ക്യൂ നില്‍ക്കാനുള്ള നാണം കാരണം പലരും കുടി ഉപേക്ഷിച്ചു. അല്ലെങ്കില്‍ രാവിലെ ജോലിക്ക്‌ പോകുന്നതിനു മുമ്പ് രണ്ടെല്ലം, ഉച്ചയ്‌ക്ക്‌ ഉച്ചയൂണ്‌ ദഹിക്കാന്‍ ഓഫീസില്‍ നിന്നും മുങ്ങി രണ്ടെണ്ണം, വൈകിട്ട്‌ വീട്ടിലെത്തുന്നതിന്‌ മുമ്പ് രണ്ടെണ്ണം. ഇതിനു പുറമേയാണ്‌ വ്യാജമദ്യം ഒഴുകുമെന്നും വാടയടിച്ചാല്‍ കണ്ണു പോകുമെന്നുമുള്ള മുന്നറിയിപ്പും. എന്തായാലും ഇങ്ങനെയുള്ള ഈ രണ്ടെണ്ണമാണ്‌ സുധീരന് വേനല്‍ മഴയേടൊപ്പം ഒഴുക്കിക്കളഞ്ഞത്‌. ആദ്യമൊക്കെ രണ്ടെണ്ണം കിട്ടാത്തതില്‍ തൊണ്ട വരണ്ടെങ്കിലും പതിയെ അത്‌ ശീലമായി. അതെ പലരും മദ്യത്തിനോട്‌ താല്‍ക്കാലികമായെങ്കിലും ഗുഡ്‌ബൈ പറയുകയാണ്‌.
ആരു വിചാരിച്ചാലും എന്നെ നന്നാക്കാന്‍ നോക്കേണ്ട എന്ന മനോഗതിയുള്ള ഗൃഹനാഥന്റെ ഈ നല്ലനടപ്പില്‍ മനസാ സന്തോഷിക്കുന്ന ഒരു കൂട്ടരുണ്ട്‌. ഭാര്യയും മക്കളും മറ്റ്‌ കുടുംബാംഗങ്ങളും. ബഹളമില്ല, അട്ടഹാസമില്ല, വെല്ലുവിളിയില്ല, കൈയ്യില്‍ കാശുണ്ട്‌. എവിടേയും മനസമാധാനം. ഇപ്പോള്‍ അവരുടെ മനസില്‍ സുധീരനാണ്‌ താരം. അവര്‍ അറിയാതെ മന്ത്രിക്കുന്നു, സുധീരന് കീ ജയ്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
