കുമരകമോ... ഏയ് പോകരുത്, ദുര്‍ഗന്ധം കൊണ്ട് ചാകും... ലോക ടൂറിസം ഭൂപടത്തില്‍ മുഖ്യ സ്ഥാനമുള്ള കുമരകത്തിന്റെ ഇപ്പോഴത്തെ വിശേഷണമാണ് ഇത്. 

പ്രശാന്ത സുന്ദരമായ വേമ്പനാട്ടു കായലിലെ ചെറു ദ്വീപുകളുടെ സമൂഹമായ ഈ കുമരകത്തിന് എന്തു പറ്റി? 

വിനോദ സഞ്ചാരികള്‍ക്ക് എന്നും പ്രിയം തന്നെയാണ് കുമരകം. ഇഴപിരിയുന്ന കനാലുകള്‍, ജലപാതകള്‍, പാടങ്ങള്‍, കളിവള്ളങ്ങള്‍, കരിമീനുകള്‍, ദേശാടന പക്ഷികള്‍ അങ്ങനെ വേറിട്ടൊരു അനുഭവമാണ് കുമരകം സഞ്ചാരികള്‍ക്ക് നല്‍കുന്നത്. ദൈവത്തിന്റെ സ്വന്തം നാട്ടിലെ യഥാര്‍ത്ഥ സൗന്ദര്യം നുകരാന്‍ കഴിയുന്ന ഈ കുമരകത്ത് 20,000 ലധികം വിദേശ സഞ്ചാരികളും 30,000 ലധികം സ്വദേശ സഞ്ചാരികളുമാണ് പ്രതിവര്‍ഷം എത്തുന്നത്. സമുദ്ര നിരപ്പിന് താഴെ സ്ഥിതിചെയ്യുന്ന കുമകരം പ്ലാസ്റ്റിക് നിരോധിത മേഖല കൂടിയാണ്.
ഇത്രയേറെ പ്രത്യേകതകളുള്ള കുമരകത്ത് ഇപ്പോള്‍ വരുന്നെങ്കില്‍ മൂക്ക് പൊത്തേണ്ട അവസ്ഥയാണ്. അത്രക്ക് രൂക്ഷമാണ് ഇവിടത്തെ ദുര്‍ഗന്ധം. ശുദ്ധജല കായലെന്ന് പേരുകേട്ട ഈ കായലിന്റെ നീരൊഴുക്ക് കുറഞ്ഞ് വെള്ളം കെട്ടിക്കിടക്കുകയാണ്. ശുദ്ധജലത്തിന് ചെളി വെള്ളത്തിന്റെ നിറമാണിപ്പോള്‍. അഴുക്കു ചാലുകള്‍ മാലിന്യം കൊണ്ട് കെട്ടിക്കിടക്കുകയാണ്. പ്ലാസ്റ്റിക് കുപ്പികള്‍, മദ്യക്കുപ്പികള്‍, ടോയ്‌ലറ്റ് മാലിന്യങ്ങള്‍ എല്ലാം വലിച്ചെറിയുന്നത് ഈ കായലിലേക്കാണ്. കരയില്‍ താമസിക്കുന്നവരുടെ വക വീട്ടുമാലിന്യങ്ങളും ഒഴുക്കുന്നതും ഇവിടേക്ക് തന്നെ. ഹൗസ്‌ബോട്ടുകളിലേയും ഹോട്ടലുകളിലേയും മാലിന്യങ്ങളും തള്ളുന്നത് ഇവിടേക്ക് തന്നെ.
ഇതു കൂടാതെ പായലുകള്‍ രൂക്ഷമാണ്. കുളവാഴ, ആഫ്രിക്കന്‍ പായല്‍ എന്നിവയും കുമരത്തെ മലീമസമാക്കുന്നു.
ഇപ്പോള്‍ കുമരകം എന്നു കേള്‍ക്കുമ്പോള്‍ സഞ്ചാരികള്‍ മൂക്ക് പൊത്തുകയാണ്. അത്രയ്ക്ക് സഹിക്കാന്‍ കഴിയുന്നില്ല കുമരകത്തെ ദര്‍ഗന്ധം. മൂന്ന് ദിവസം തങ്ങാനായി എത്തുന്ന സഞ്ചാരികള്‍ ഒരുദിവസം എങ്ങനേയും കഴിച്ചുകൂട്ടി ഇവിടെ നിന്ന് മുങ്ങുകയാണ്. ഈ മൂക്ക് പൊത്തി പോകുന്നവര്‍ കുമരകത്തിന്റെ ഇപ്പോഴത്തെ മഹിമ കാട്ടുതീപോലെ പടര്‍ത്തുന്നു. തുടര്‍ന്ന് പലരും റിസര്‍വേഷന്‍ ക്യാന്‍സല്‍ ചെയ്യുകയാണ്. 
പ്രാദേശിക സഞ്ചാരികള്‍ക്കും മടുത്തു. ഹൗസ് ബോട്ടുകളിലെ റെയ്ഡാണ് അവര്‍ക്ക് വില്ലനായത്. തരുണീമണികളോടൊപ്പം അല്‍പം ആസ്വദിക്കാന്‍ ഹോട്ടലുകളെക്കാള്‍ ഹൗസ് ബോട്ടുകളാണ് നല്ലതെന്ന അവരുടെ കണ്ടുപിടുത്തമാണ് പോലീസുകാര്‍ തകര്‍ത്തത്. മാത്രമല്ല ഹൗസ് ബോട്ടുകളുടെ കൊള്ളയും നിലവാരമില്ലാത്ത ഭക്ഷണവുമെല്ലാം ഫാമിലിയായി വരുന്നവരേയും അകറ്റുന്നുണ്ട്. ഇതിനിടെ നല്ല കള്ള് കുടിക്കാന്‍ വരുന്നവര്‍ക്ക് ആനമയക്കി നല്‍കിയതോടെ അവര്‍ക്കും താത്പര്യം കുറഞ്ഞു.
വെള്ളത്തില്‍ കൂടി യാത്ര ചെയ്ത് വന്നവരെല്ലാം എത്രയും വേഗം കരമാര്‍ഗം രക്ഷപ്പെടാനുള്ള തത്രപ്പാടിലാണ്. അവര്‍ക്ക് ആകെ ആശ്വാസമുള്ളത് കോട്ടയം എപിയുടെ കോട്ടയം, കുമരകം, ചേര്‍ത്തല ടൂറിസം ഹൈവേയാണ്. 
ഇങ്ങനെ ദുര്‍ഗന്ധം സഹിക്കാന്‍ വയ്യാതെ സഞ്ചാരികള്‍ നാടു വിടുമ്പോഴും കുമരകത്തെ രക്ഷിക്കാന്‍ ആരുമില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha