ഏറ്റവും വേഗമുള്ള സൂപ്പര്‍ കംപ്യൂട്ടര്‍ ചൈന നിര്‍മ്മിച്ചു. ചൈനയിലെ ദേശീയ പ്രതിരോധ സാങ്കേതികവിദ്യാ സര്‍വകലാശാലയാണ് ലോകത്ത്‌ ഏറ്റവും വേഗമുള്ള സൂപ്പര്‍ കംപ്യൂട്ടര്‍ വികസിപ്പിച്ചെടുത്തത്. ടിയാനെ-2 എന്നാണ് സൂപ്പര്‍ കംപ്യൂട്ടറിന് പേരു നല്‍കിയിരിക്കുന്നത്. ചൈനീസ് ഭാഷയില്‍ ടിയാനെ എന്നാല്‍ ക്ഷീരപഥം എന്നാണ് അര്‍ത്ഥം. ടിയാനെ 2വിന്റെ വരവോടെ ഒന്നാം സ്ഥാനത്തായിരുന്ന യുഎസിന്റെ ടൈറ്റന്‍ സൂപ്പര്‍ കംപ്യൂട്ടര്‍ രണ്ടാം സ്ഥാനത്തായി.
സെക്കന്‍ഡില്‍ 3386 ദശലക്ഷം കോടി പ്രവര്‍ത്തനങ്ങളാണ് ഈ സൂപ്പര്‍ കംപ്യൂട്ടര്‍ കൈക്കാര്യം ചെയ്യുക. അതിവേഗ പ്രവര്‍ത്തനവേളയില്‍ സൂപ്പര്‍ കംപ്യൂട്ടറിന് സെക്കന്‍ഡില്‍ 5490 ദശലക്ഷം കോടി വരെ പ്രവര്‍ത്തനങ്ങള്‍ നടത്തുവാന്‍ സാധിക്കുമെന്ന് സര്‍വകലാശാലാ അധികൃതര്‍ പറയുന്നു. ഗ്വാങ്ങ്ചൗവിലെ നാഷണല്‍ സൂപ്പര്‍ കംപ്യൂട്ടര്‍ സെന്ററില്‍ ആയിരിക്കും ടിയാനെ-2 സ്ഥാപിക്കുക.
ടിയാനെ-2ന്റെ മുന്‍പ് ‘ടിയാന്‍-1എ’ എന്ന സൂപ്പര്‍ കംപ്യൂട്ടറും 2010 നവംബറില്‍ ചൈന വികസിപ്പിച്ചിരുന്നു. അന്ന് ടിയാന്‍-1എ ലോകത്ത്‌ ഒന്നാമതായിരുന്നു. പക്ഷേ ലോകത്തെ ഏറ്റവും വേഗമേറിയ സൂപ്പര്‍ കംപ്യൂട്ടര്‍ സ്ഥാനം നേടിയ ടിയാനെ-1എയെ 2011 ജൂണില്‍ ജപ്പാന്റെ കെ കംപ്യൂട്ടര്‍ മറികടന്നു.