ഫെയ്‌സ്ബുക്കില്‍ നിന്ന് ഈ വര്‍ഷത്തിന്റെ ആദ്യ പകുതിയില്‍ കേന്ദ്രസര്‍ക്കാര്‍ വിവരശേഖരണം നടത്തിയത് 6,324 തവണ. വിവിധ അന്വേഷണ ഏജന്‍സികളും കംപ്യൂട്ടര്‍ എമര്‍ജന്‍സി റെസ്‌പോണ്‍സ് ടീമുമാണ് വിവിധ വ്യക്തിഗത അക്കൗണ്ടുകള്‍ ഉള്‍പ്പെടെയുള്ളവയുടെ വിവരങ്ങള്‍ ശേഖരിച്ചത്. ഇവരുടെ ആവശ്യപ്രകാരം ഫെയ്‌സ്ബുക്കില്‍ അപ്ലോഡ് ചെയ്ത 2034 ഉള്ളടക്കങ്ങള്‍ക്ക് നിയന്ത്രണം ഏര്‍പ്പെടുത്തി.

മതവിദ്വേഷവും കലാപവുമുണ്ടാക്കുന്ന ഉള്ളടക്കങ്ങളായിരുന്നു ഇതിലേറെയും. 8,290 ഉപയോക്താക്കളുമായി ബന്ധപ്പെട്ടായിരുന്നു ഈ വിവരശേഖരണം. ഇതിനു പുറമേ 850 ഉപയോക്താക്കളുമായി ബന്ധപ്പെട്ട് 609 അക്കൗണ്ടുകളുടെ പ്രവര്‍ത്തനം തടയാനും നിര്‍ദേശം ലഭിച്ചു.

കഴിഞ്ഞവര്‍ഷം ജൂലായ് മുതല്‍ ഡിസംബര്‍ വരെയുള്ള അവസാനപകുതിയില്‍ 5,561 തവണയായിരുന്നു സര്‍ക്കാര്‍ ഏജന്‍സികള്‍ വിവരശേഖരണം നടത്തിയിരുന്നത്. അമേരിക്കയാണ് ഇക്കാലയളവില്‍ ഫെയ്‌സ്ബുക്കില്‍ നിന്ന് ഏറ്റവുമധികം വിവരശേഖരണം നടത്തിയത്. 38,951 ഉപയോക്താക്കളുമായി ബന്ധപ്പെട്ട് 23,854 തവണയാണ് അമേരിക്കന്‍ അന്വേഷണ ഏജന്‍സികള്‍ വിവരശേഖരണം നടത്തിയത്.