മലയാളികള്‍ ഉള്‍പ്പെടുന്ന നാലംഗ സംഘം തട്ടിപ്പ് കേസിൽ അറസ്റ്റിൽ. നഗ്നത കാണാവുന്ന കണ്ണടകൾ വിൽപനയ്ക്ക് എന്ന പേരിലായിരുന്നു സംഘം തട്ടിപ്പ് നടത്തിയത്. ലക്ഷങ്ങളായിരുന്നു കണ്ണടയ്ക്കായി തട്ടിയത്. തൃശൂർ സ്വദേശിയായ ഗുബൈബ്, വൈക്കം സ്വദേശി ജിത്തു, മലപ്പുറം സ്വദേശി ഇർഷാദ്, ബെംഗളൂരു സ്വദേശിയായ സൂര്യ എന്നിവരാണ് കോയമ്പേടുള്ള ലോഡ്ജില്‍ നിന്നും പോലീസ് പിടിയിലായത്. നഗ്നത കാണാനാകുന്ന എക്സ്റേ കണ്ണടകൾ വിൽപ്പനയ്‌ക്കുണ്ടെന്ന പേരിൽ ഇവർ സമൂഹമാധ്യമങ്ങളിലൂടെ പരസ്യം നൽകി.

ഒരു കോടി രൂപ വിലയുള്ള കണ്ണട, അഞ്ചോ പത്തോ ലക്ഷം രൂപ നൽകി ഓർഡർ ചെയ്യാമെന്നാണ് പരസ്യത്തിൽ പറഞ്ഞിരുന്നത്. ഇതിനു തയാറാകുന്ന ആളുകളെ ഇവർ താമസിക്കുന്ന ഹോട്ടലിലേക്കു വിളിച്ചുവരുത്തും. പരീക്ഷിക്കാനായി ഒരു കണ്ണട നൽകും. എന്നാൽ വലിയ മാറ്റമൊന്നും ഉണ്ടാകില്ല. പിന്നീട് കണ്ണട തിരിച്ചുവാങ്ങി നന്നാക്കുന്നുവെന്ന വ്യാജേന നിലത്തിട്ടു പൊട്ടിക്കും. തുടർന്ന് കണ്ണടയുടെ വിലയായിട്ടുള്ള ഒരു കോടി രൂപ ആവശ്യപ്പെടും. നൽകാൻ വിസമ്മതിക്കുന്നതോടെ പൊലീസിനെ വിളിക്കുമെന്ന് ഭീഷണിപ്പെടുത്തും. ഇവരുടെ കൂട്ടത്തിൽ രണ്ടു പേർ പൊലീസ് വേഷം ധരിച്ച് തോക്കുമായി പുറത്തു കാത്തുനിൽക്കുന്നുണ്ടാകും. തുടർന്ന് ഇവർ റൂമിലേക്കു കടന്നുവരും. പണം നൽകി നഗ്നത കാണാൻ തയാറായ ആളുകളെ ഇവർ കണക്കിനു പരിഹസിക്കും.

ഒടുവിൽ ഇവർ പണം നൽകി മുങ്ങുകയാണ് പതിവ്. മാനഹാനി ഭയന്ന് ഇരകൾ പൊലീസിൽ പരാതിപ്പെടില്ലെന്ന ആത്മവിശ്വാസത്തിലാണ് ഇവർ തുടർച്ചയായി തട്ടിപ്പുകൾ നടത്തിയിരുന്നത്. പണം തട്ടിയതുമായി ബന്ധപ്പെട്ട് കോയമ്പേട് പൊലീസിനു ലഭിച്ച പരാതിയെ തുടർന്നാണ് അന്വേഷണം ആരംഭിക്കുന്നത്. നാലംഗ സംഘം തോക്കു ചൂണ്ടി തന്റെ കയ്യിൽനിന്ന് ആറു ലക്ഷം രൂപ കവർന്നുവെന്നായിരുന്നു ചെന്നൈ സ്വദേശിയുടെ പരാതി.

തുടർന്ന് ചില സൂചനകളുടെ അടിസ്ഥാനത്തിൽ ഈ നാലംഗ സംഘം താമസിക്കുന്ന കോയമ്പേട് ബസ് സ്റ്റാൻഡ് പരിസരത്തെ ലോഡ‍്ജിലെത്തി പൊലീസ് പരിശോധന നടത്തി. ഇവരിൽനിന്ന് കൈത്തോക്ക്, വിലങ്ങുകൾ, നാണയങ്ങൾ, കണ്ണട ഉൾപ്പെടെ നിരവധി സാമഗ്രികൾ പിടികൂടി. പിന്നീട് ഇവരെ ചോദ്യം ചെയ്തതിൽ നിന്നാണ് അസാധാരണ തട്ടിപ്പിന്റെ വിവരം പുറത്തുവരുന്നത്. ഇത്തരത്തിൽ തട്ടിപ്പ് നടത്തുന്നതിനിടെയാണ് കഴിഞ്ഞ ദിവസം ചെന്നൈയിൽവച്ച് അറസ്റ്റിലാകുന്നത്. സമ്പന്നരായ ബിസിനസുകാരെ ലക്ഷ്യമിട്ട് സംഘം കണ്ണടകൾ എങ്ങനെ പ്രവർത്തിക്കുന്നുവെന്നതിന്റെ വീഡിയോകൾ കാണിക്കുകയും അവയെ പരീക്ഷിക്കാൻ രഹസ്യ സ്ഥലത്തേക്ക് കൊണ്ടുപോകുകയും ചെയ്തിരുന്നതായി പോലീസ് പറയുന്നു.

ആവശ്യക്കാർക്ക് കണ്ണട ധരിക്കാൻ അനുവാദമുള്ള ഇരുട്ട് മുറിയിൽ നഗ്നരായി പോസ് ചെയ്യാൻ മോഡലുകളെ ബാംഗ്ലൂരിൽ നിന്ന് എത്തിച്ചതായും വിവരമുണ്ട്. ഇത് പോലീസ് അന്വേഷിക്കുന്നുണ്ട്. സംഘം നഗരത്തിലെ വ്യവസായികൾക്ക് ഐശ്വര്യം കൊണ്ടുവരുന്ന 'റൈസ് പുള്ളിംഗ്' പാത്രം വിറ്റ് കബളിപ്പിക്കാൻ പദ്ധതിയിട്ടിരുന്നതായും പോലീസ് പറഞ്ഞു. കപ്പൽ ചെമ്പും ഇറിഡിയവും കൊണ്ടുണ്ടാക്കിയതാണെന്നും ഇടിമിന്നലേറ്റതിനാൽ പ്രത്യേക ശക്തിയുണ്ടെന്നും തട്ടിപ്പുകാർ അവകാശപ്പെട്ടതായി പോലീസ് പറഞ്ഞു. കച്ചവടക്കാരുടെ അന്ധവിശ്വാസം മുതലെടുക്കുകയായിരുന്നു സംഘത്തിന്റെ ലക്ഷ്യം.

ഒരു വ്യവസായിയുടെ പരാതിയിൽ പോലീസ് ഹോട്ടലിൽ റെയ്ഡ് ചെയ്താണ് ഇവരെ അറസ്റ്റ് ചെയ്തത്. പുരാവസ്തുക്കൾ വിൽക്കുമെന്ന് പറഞ്ഞ് സൂര്യ അഞ്ച് ലക്ഷം രൂപ തട്ടിയിരുന്നു. സൂര്യ നഗരത്തിൽ തിരിച്ചെത്തിയതായി വ്യാപാരി മനസ്സിലാക്കുകയും, പണം തിരികെത്തരാൻ ആവശ്യപ്പെടുകയും ചെയ്തു. സൂര്യയും കൂട്ടാളികളും വ്യാജ തോക്ക് ചൂണ്ടി ഇയാളെ ഭീഷണിപ്പെടുത്തിയതായി പോലീസ് പറയുന്നു. ഇയാളുടെ പരാതിയിൽ പ്രതികളെ പിടികൂടിയ അന്വേഷണസംഘം മജിസ്‌ട്രേറ്റിന് മുന്നിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു.