രാജ്യത്തെ ജനങ്ങള്‍ക്ക് ശാസ്ത്രാവബോധം നല്‍കണമെന്ന് ഭരണഘടനയില്‍ എഴുതിവച്ചിട്ടുള്ള ഒരേയൊരു രാജ്യം ഇന്ത്യയാണെന്ന് ബഹിരാകാശ ശാസ്ത്രജ്ഞനും മുഖ്യമന്ത്രിയുടെ ശാസ്ത്ര ഉപദേഷ്ടാവുമായ എം.സി ദത്തന്‍. അന്ധവിശ്വാസങ്ങളും നരബലി പോലുള്ള അനാചാരങ്ങളും നിലനിന്നിരുന്ന കാലത്ത് ജനങ്ങളില്‍ ശാസ്ത്ര ബോധം വളര്‍ത്തണമെന്ന് നിര്‍ദേശിച്ച നേതാവാണ് ജവഹര്‍ലാല്‍ നെഹ്‌റു. അദ്ദേഹം വെറുമൊരു രാഷ്ട്രീയ നേതാവ് മാത്രമായിരുന്നില്ല. തന്റെ രാജ്യത്തിന്റെയും ജനങ്ങളുടെയും ഭാവിയെക്കുറിച്ച് ദീര്‍ഘമായ കാഴ്ചപ്പാടുള്ള ആളായിരുന്നു എന്നും പറഞ്ഞു. ദേശീയ ശാസ്ത്രദിനത്തോട് അനുബന്ധിച്ച് ജവഹര്‍നഗര്‍ സന്ദീപനി സ്‌കൂളില്‍ നടന്ന പരിപാടി ഉദ്ഘാടനം ചെയ്യുകയായിരുന്നു അദ്ദേഹം. പഞ്ചേന്ദ്രിയങ്ങള്‍ ആണ് ലോകത്തിലെ ഏറ്റവും വലിയ അത്ഭുതങ്ങള്‍. അത് ഉള്ളത് കൊണ്ടാണ് എല്ലാം കാണാനും കേള്‍ക്കാനും മനസിലാക്കാനും കഴിയുന്നതെന്നും ചൂണ്ടിക്കാട്ടി.

ജനനം മുതല്‍ ഏഴ് വയസു വരെ കുട്ടികള്‍ പരമാവധി വേഗത്തില്‍ വിവരങ്ങള്‍ തലച്ചോറില്‍ ശേഖരിച്ച് വയ്ക്കുകയും ആവശ്യമുള്ള സമയത്ത് അവ ഉപയോഗിക്കുകയും ചെയ്യും. എന്നാല്‍ പഞ്ചേന്ദ്രിയങ്ങള്‍ക്ക് മഹാശക്തിയില്ല. മൃഗങ്ങള്‍ക്ക് അതുണ്ട്. അതുകൊണ്ടാണ് പൊലീസ് സ്‌നിഫര്‍ നായ്ക്കളെ ഉപയോഗിക്കുന്നത്. സൂഷ്മജീവികളെയും ശബ്ദങ്ങളെയും തിരിച്ചറിയാന്‍ മനുഷ്യന് കഴിയില്ല. ഇത് മറികടക്കാനാണ് സ്രഷ്ടാവ് മനുഷ്യന് ബുദ്ധി തന്നത്. അത് ഉപയോഗിച്ച് നമുക്ക് വേണ്ട കാര്യങ്ങള്‍ കണ്ടുപിടിക്കാനാകും. വിവരങ്ങള്‍ ശേഖരിക്കാനുള്ള മനുഷ്യന്റെ ശേഷി പോരാന്ന് വന്ന സാഹചര്യത്തില്‍, അവ തരംതിരിച്ച് സൂക്ഷിച്ച് വയ്ക്കുന്നതിനാണ് കമ്പ്യൂട്ടര്‍ കണ്ടുപിടിച്ചത്. ഇന്നിപ്പോ നിര്‍മ്മിതബുദ്ധി വലിയ പ്രചാരത്തിലായി. അത് മനുഷ്യന്‍ ഉണ്ടാക്കിയ ബുദ്ധിയാണ്, അല്ലാതെ കമ്പ്യൂട്ടറിന് ബുദ്ധിയില്ലെന്നും അദ്ദേഹം പറഞ്ഞു.

ഇന്നത്തെ കുട്ടികള്‍ക്ക് ഒന്നും ഓര്‍മ്മയില്‍ വയ്‌ക്കേണ്ടതില്ലെന്നൊരു തോന്നലുണ്ട്, അത് ചിന്താശക്തിയെ ഹനിക്കുന്നതാണ്. ചിന്തകളില്‍ നിന്നാണ് പുതിയ ആശയങ്ങള്‍ ഉണ്ടാകുന്നത്. അതുകൊണ്ട് വിദേശങ്ങളിലെ പല സ്‌കൂളുകളും കുട്ടികള്‍ക്ക് മൊബൈല്‍ ഫോണും കാല്‍ക്കുലേറ്ററും നല്‍കുന്നത് ഒഴിവാക്കിയിരിക്കുകയാണ്. റോബോട്ടിക് സാങ്കേതികവിദ്യയും ലോകത്ത് വ്യാപിച്ചുകൊണ്ടിരിക്കുകയാണ്. കൃഷി, ഖനി പോലുള്ള അപകടമേഖലകളിലെ ജോലിക്കും വെള്ളപ്പൊക്കം, തീപിടുത്തം തുടങ്ങിയ സാഹചര്യങ്ങളിലും റോബോട്ടിക് സേവനം നല്ലതാണ്.

മാനുഷിക മൂല്യം തകര്‍ക്കുന്ന രീതിയില്‍ റോബോട്ടുകളെ ഉപയോഗിക്കരുതെന്നും അദ്ദേഹം നിര്‍ദ്ദേശിച്ചു. സന്ദീപനി സ്‌കൂളിലെ കുട്ടികള്‍ നിര്‍മ്മിച്ച ഗാര്‍ഗി എന്ന റോബോട്ട് അദ്ദേഹം അനാച്ഛാദനം ചെയ്തു. ചടങ്ങില്‍ വാര്‍ഡ് കൗണ്‍സിലര്‍ കെ എസ് ശബരീനാഥന്‍, സ്‌കൂള്‍ ഡയറക്ടര്‍ ഡോ. കെ ജി വിജയലക്ഷ്മി, സ്‌റ്റെം റോബോട്ടിക്‌സ് ഇന്റര്‍നാഷണല്‍ സിഇഒ രാജശേഖരന്‍ എ എച്ച്, സ്‌കൂള്‍ അസിസ്റ്റന്റ് ഡയറക്ടര്‍ അനന്തപത്മനാഭന്‍, പ്രിന്‍സിപ്പല്‍ രതി നായര്‍ എന്നിവര്‍ സംസാരിച്ചു. കുട്ടികളുടെ ചിത്ര പ്രദര്‍ശനം കെഎസ് ശബരീനാഥന്‍ ഉദ്ഘാടനം ചെയ്തു.