സംസ്ഥാനത്തെ വിവിധ ആശുപത്രികളിൽ നടക്കുന്ന നഴ്സുമാരുടെ സമരം കൂടുതൽ ശക്തമാകുന്നു.കോട്ടയത്തെ ഭാരത് ആശുപത്രിയില്‍ നിരാഹാരം കിടക്കുന്ന നഴ്‌സിനെ അറസ്റ്റു ചെയ്ത് നീക്കിയതോടെ സ്ഥലത്ത് സംഘര്‍ഷാവസ്ഥ തുടരുകയാണ്. സമരം ചെയ്ത 60 നഴ്‌സുമാരെ മാനജ്‌മെന്റ് നേരത്തെ പിരിച്ചുവിട്ടിരുന്നു. പുറത്താക്കിയ ഒമ്പത് നഴ്‌സുമാരെ തിരിച്ചെടുക്കണമെന്നാവശ്യപ്പെട്ട് വനിതാ നഴ്‌സുമാര്‍ കഴിഞ്ഞ 50 ദിവസങ്ങളായി സമരത്തിലാണ്.

നേരത്തെ ചേര്‍ത്തല കെവിഎം ആശുപത്രിയില്‍ നഴ്‌സുമാരുടെ സമരം 61-ാം ദിവസത്തേക്ക് കടന്നതോടെ ആശുപത്രി അടച്ചുപൂട്ടുമെന്ന് മാനേജ്‌മെന്റ് ഭീഷണി മുഴക്കി സമരത്തെ പൊളിക്കാനുള്ള നീക്കങ്ങളുമായി മാനേജ്മെന്റ് മുന്നോട്ട് പോവുകയാണ്. കഴിഞ്ഞ ദിവസം മന്ത്രിമാരുടെ സാന്നിധ്യത്തിൽ നടന്ന ചർച്ചയിൽ നിന്ന് മാനേജ്മെന്റ് പ്രതിനിധികൾ ഇറങ്ങി പോയിരുന്നു. നഴ്സുമാർ നിരാഹാര സമരത്തിലേക്ക് കടന്നതോടെ നാട്ടുകാരും വിവിധ രാഷ്ട്രീയ സംഘടനകളും സമരത്തിന് പിന്തുണയുമായി എത്തിയിട്ടുണ്ട്.

സർക്കാരിന്റെ തീരുമാന പ്രകാരമുള്ള വേതനമോ വ്യവസ്ഥകളോ നൽകാൻ മാനേജ്മെന്റ് തയാറാകുന്നില്ലെന്ന് നഴ്സുമാർ പറഞ്ഞു. സർക്കാർ തീരുമാനങ്ങൾ പേപ്പറുകളിൽ മാത്രം ഒതുങ്ങി എന്നും ആരോപണങ്ങൾ ഉണ്ട്. സമരം ചെയ്ത നഴ്സുമാർക്കെതിരെ പ്രതികാര നടപടികൾ ഒന്നും എടുക്കരുതെന്ന് മുഖ്യമന്ത്രി നേരത്തെ വ്യക്തമാക്കിയിരുന്നു എന്നാൽ ഇതെല്ലം പാഴ്വാക്കായി മാറിയ സാഹചര്യത്തിൽ സമരം കൂടുതൽ ശക്തമാക്കാൻ തന്നെയാണ് നഴ്സുമാരുടെ സംഘടനയുടെ തീരുമാനം. വിഷയത്തിൽ അടിയന്തിരമായി സർക്കാർ ഇടപെടണം എന്ന ആവശ്യവും ഉയരുന്നുണ്ട്.
.