തിരുവനന്തപുരം: സാമുഹ്യനീതി വകുപ്പിന്റെ കീഴിലുള്ള സംസ്ഥാന ബാലാവകാശ സംരക്ഷണ കമ്മീഷനില്‍ ഒരു ജെ.ജെ. മോണിറ്ററിംഗ് സെല്‍ രൂപീകരിക്കുന്നതിന് അനുമതി നല്‍കി ഉത്തരവിട്ടതായി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്‍. ഒരു സീനിയര്‍ ടെക്‌നിക്കല്‍ ഓഫീസറെയും ഒരു കേസ്‌വര്‍ക്കറെയും കരാറടിസ്ഥാനത്തില്‍ നിയമിക്കുന്നതിനും സര്‍ക്കാര്‍ അനുമതി നല്‍കിയിട്ടുണ്ട്.

കുട്ടികള്‍ക്ക് നേരെയുള്ള അതിക്രമങ്ങള്‍ ഫലപ്രദമായി തടയുക എന്ന ലക്ഷ്യത്തോടെ ബാലവകാശ സംരക്ഷണ കമ്മീഷന്റെ പ്രവര്‍ത്തനങ്ങള്‍ ശക്തിപ്പെടുത്തുന്നതിന്റെ ഭാഗമായാണ് ജെ.ജെ. മോണിറ്ററിംഗ് സെല്‍ പ്രവര്‍ത്തന സജ്ജമാക്കുന്നതെന്നും മന്ത്രി പറഞ്ഞു.

കുട്ടികളുടെ ശ്രദ്ധയും സംരക്ഷണവും സംബന്ധിച്ച ബാലനീതി ആക്റ്റ് 2015, 109-ാം വകുപ്പ് പ്രകാരം ഈ കേന്ദ്ര നിയമം സംസ്ഥാനത്ത് നടപ്പാക്കുന്നതിനും നിരീക്ഷിക്കുന്നതിനുമുളള ചുമതല നല്‍കിയിരിക്കുന്നത് സംസ്ഥാന ബാലാവകാശ സംരക്ഷണ കമ്മീഷനാണ്. ഈ പ്രവര്‍ത്തനങ്ങള്‍ സുഗമമായി നടപ്പിലാക്കുന്നതിന് വേണ്ടിയാണ് ജെ.ജെ. മോണിറ്ററിംഗ് സെല്‍ രൂപീകരിച്ചത്.

ജെ.ജെ. ആക്റ്റിന്റെ കീഴില്‍ ഉണ്ടാക്കിയിട്ടുളള സ്ഥാപനങ്ങളുടെ അവലോകനവും ബാലാവകാശങ്ങളും ലിംഗാവബോധം സംബന്ധിച്ച അറിവും ആശയവിനിമയവും സാധ്യമാകുന്ന സാമഗ്രികള്‍ വികസിപ്പിക്കുക, ഐ.സി.പി.എസ്. മായി ചേര്‍ന്ന് വിവിധ കര്‍ത്തവ്യവാഹകര്‍ക്കായി ട്രെയിനിംഗ് മൊഡ്യൂള്‍ വികസിപ്പിക്കുക, കുട്ടികളുടെ നവോത്ഥാനത്തിനും പുന:രധിവാസത്തിനുമായി പെരുമാറ്റ ചട്ടം വികസിപ്പിക്കുക, കുട്ടികള്‍ക്കെതിരെയുളള കുറ്റകൃത്യങ്ങള്‍ റിപ്പോര്‍ട്ട് ചെയ്യുന്നതിനുളള അവബോധം സൃഷ്ടിക്കുക, പഞ്ചായത്ത്‌രാജ് മുന്‍സിപ്പല്‍ കോര്‍പ്പറേഷന്‍ എന്നീ സ്ഥാപനങ്ങള്‍ക്ക് പ്രസ്തുത വിഷയത്തില്‍ പരിശീലന ക്ലാസ് നടത്തുക, കുട്ടികളുടെ അവകാശങ്ങളും ഉപയോഗപ്രദമായ മറ്റ് വിവരങ്ങളും അടങ്ങിയ സാമഗ്രികള്‍ പ്രാദേശികഭാഷയില്‍ വികസിപ്പിക്കുക തുടങ്ങിയ ഉത്തരവാദിത്തങ്ങള്‍ നിര്‍വ്വഹിക്കുന്നതിന് വേണ്ടിയാണ് കമ്മീഷന് പ്രതേ്യകമായി ഒരു ജെ.ജെ. മോണിറ്ററിംഗ് സെല്‍ രൂപീകരിക്കുന്നത്.