സൗജന്യമായി ചക്കപ്പഴം നല്‍കാന്‍ വിസമ്മതിച്ച കുട്ടിയ്‌ക്കെതിരെ പോലീസിന്റെ കള്ളക്കേസ്
പാറ്റ്‌നയിലെ ചിത്രഗുപ്ത നഗര്‍ സ്വദേശിയായ ഒരു പച്ചക്കറി വില്‍പ്പനക്കാരന്റെ മകനെതിരെ കേസെടുത്ത് ജയിലില്‍ അയച്ചിരിക്കയാണ് ബിഹാറിലെ അഗംകുവാന്‍ പോലീസ്. ബൈക്ക് മോഷണകുറ്റം ചുമത്തിയാണ് കേസെടുത്തിരിക്കുന്നതെങ്കിലും അങ്ങനെയല്ല സംഗതി എന്നാണ് അറിയുന്നത്. ഇക്കഴിഞ്ഞ മാര്‍ച്ച് 19-നാണ് സംഭവം.
പോലീസുകാര്‍ പണം നല്‍കാതെ ചക്കപ്പഴം എടുക്കാന്‍ ശ്രമിച്ചത് തടഞ്ഞ കുട്ടിയെ, മര്യാദ പഠിപ്പിക്കാനാണ് കേസെടുത്തതെന്നാണ് പരാതി. കുട്ടിക്ക് 19 വയസുണ്ടെന്ന് രേഖകളില്‍ ചേര്‍ത്താണ് ജയിലേക്ക് അയച്ചത്. 14 വയസ് മാത്രമുള്ള കുട്ടിയുടെ ജനന സര്‍ട്ടിഫിക്കറ്റ് ഹാജരാക്കിയിട്ടും ജാമ്യം ലഭിച്ചില്ലെന്ന് കുട്ടിയുടെ അച്ഛന്‍ പറഞ്ഞു. സംഭവം വിവാദമായതോടെ മുഖ്യമന്ത്രി നിതീഷ് കുമാര്‍ ഉന്നതതല അന്വേഷണത്തിന് ഉത്തരവിട്ടു.
പാറ്റ്‌ന സോണല്‍ ഐജി എന്‍.എച്ച്.ഖാന്‍, ഡിഐജി രാജേഷ് കുമാര്‍, സീനിയര്‍ സൂപ്രണ്ട് ഓഫ് പോലീസ് എന്നീ ഉന്നത പോലീസ് സംഘമാണ് കേസന്വേഷിക്കുന്നത്. സിസിടിവി ദൃശ്യങ്ങള്‍ പരിശോധിച്ച് വരികയാണ് അന്വേഷണ ഉദ്യോഗസ്ഥര്‍. കുറ്റക്കാരെന്ന് കണ്ടെത്തിയാല്‍ കടുത്ത ശിക്ഷ നല്‍കുമെന്ന് പാറ്റ്‌ന സോണല്‍ ഐജി എന്‍. എച്ച്.ഖാന്‍ പറഞ്ഞു.
https://www.facebook.com/Malayalivartha
