അഫ്ഗാനിസ്ഥാന്റെ തലസ്ഥാനമായ കാബൂളിലെ ക്ലാസ്മുറിയില്‍ ചാവേര്‍ ആക്രമണത്തില്‍ 48 പേര്‍ കൊല്ലപ്പെട്ടു
അഫ്ഗാനിസ്ഥാന്റെ തലസ്ഥാനമായ കാബൂളില്‍ ബുധനാഴ്ച ട്യൂഷന്‍ സെന്ററിലെ ക്ലാസ്മുറിയില്‍ ചാവേര്‍ ഭടന്‍ നടത്തിയ സ്‌ഫോടനത്തില്‍ 48 പേര്‍ കൊല്ലപ്പെട്ടു. മരണസംഖ്യ അറുപതിലധികമാണെന്ന് അനൗദ്യോഗിക റിപ്പോര്‍ട്ടുകളില്‍ പറഞ്ഞു. ആക്രമണത്തിന്റെ ഉത്തരവാദിത്വം ഐഎസ് ഏറ്റെടുത്തു.
യൂണിവേഴ്‌സിറ്റി എന്‍ട്രന്‍സ് പരീക്ഷയ്ക്കുള്ള ക്ലാസ് നടക്കുമ്പോള്‍ ചാവേര്‍ ഭടന്‍ ക്ലാസ്മുറിയില്‍ എത്തി സ്‌ഫോടനം നടത്തുകയായിരുന്നു. പതിനാറിനും പത്തൊന്പതിനും ഇടയിലുള്ള വിദ്യാര്‍ഥികളാണ് മരിച്ചവരില്‍ ഭൂരിഭാഗവും. ആണ്‍കുട്ടികളും പെണ്‍കുട്ടികളും ഉള്‍പ്പെടുന്നു. അറുപതിലധികം പേര്‍ക്കു പരിക്കേറ്റു. കാബൂളിലെ ഷിയാ ഭൂരിപക്ഷ മേഖലയിലായിരുന്നു ആക്രമണം.
ആക്രമണസമയത്ത് ക്ലാസില്‍ നൂറോളം വിദ്യാര്‍ഥികള്‍ ഉണ്ടായിരുന്നു. വിദ്യാര്‍ഥികളുടെ ചിതറിക്കിടക്കുന്ന മൃതദേഹാവശിഷ്ടങ്ങള്‍ ഭീകരമായ കാഴ്ചയാണെന്നു ദൃക്‌സാക്ഷികള്‍ പറഞ്ഞു. ബുധനാഴ്ചതന്നെ വടക്കന്‍ അഫ്ഗാനിസ്ഥാനിലെ ബാഗ്‌ലാം പ്രവിശ്യയിലുണ്ടായ മറ്റൊരു ആക്രമണത്തില്‍ 35 പട്ടാളക്കാരും ഒന്പതു പോലീസുകാരും കൊല്ലപ്പെട്ടു. ട്യൂഷന്‍ സെന്റര്‍ ആക്രമണത്തിന്റെ നടുക്കം വിട്ടുമാറുംമുന്പ് കാബൂളിലെ ഇന്റ ലിജന്‍സ് അക്കാദമിയുടെ നേര്‍ക്ക് ഇന്നലെ ഭീകരര്‍ ആക്രമണം നടത്തി. അക്കാദമിക്കു സമീപമുള്ള കെട്ടിടത്തില്‍ ഒളിച്ചുകടന്ന തോക്കുധാരികള്‍ വെടിവയ്പു തുടരുകയാണെന്ന് അധികൃതര്‍ പറഞ്ഞു.
https://www.facebook.com/Malayalivartha
