ഒരുമ ബ്ലാക്ക്ബേൺ മലയാളി കൂട്ടായ്മ സംഘടിപ്പിച്ച രണ്ടാമത് അഖില യു കെ വടംവലി മത്സരത്തിൽ ചാമ്പ്യൻ പട്ടം കരസ്ഥമാക്കി ടൺബ്രിഡ്‌ജ് വെൽസ് ടസ്‌കേഴ്‌സ് കെന്റ് ടീം. വനിതാ വിഭാഗത്തിൽ ലിമ ലിവർപൂൾ കിരീടം ചൂടി. ബ്ലാക്ക്ബേൺ സെൻട്രൽ ഹൈ സ്കൂളിൽ വച്ചു നടത്തപ്പെട്ട മത്സരത്തിൽ ബ്ലാക്ക്ബേൺ എംപി അദ്നാൻ ഹുസൈൻ മുഖ്യാതിഥി ആയി .

യുകെയിലെ പ്രമുഖ ടീമുകൾ മാറ്റുരച്ച ടൂർണമെന്റിൽ അത്യന്തം വാശിയേറിയ പോരാട്ടങ്ങൾക്കാണ് ബ്ലാക്ക്ബേൺ വേദിയായത് . വനിതാ പുരുഷ വിഭാഗങ്ങളിലായി നടന്ന മത്സരങ്ങൾ കാണികളുടെ സാന്നിധ്യം കൊണ്ടും ശ്രദ്ധേയമായി.

ബെസ്റ്റ് ഓഫ് ത്രീ യിലേക്ക് കടന്ന പുരുഷ വിഭാഗം കലാശപ്പോരാട്ടത്തിൽ ടൺബ്രിഡ്‌ജ് വെൽസ് ടസ്‌കേഴ്‌സ് കെന്റും, സ്റ്റോക്ക് ലയൺസ്‌ വാരിയേഴ്‌സും ഏറ്റുമുട്ടി. സ്റ്റോക്ക് ലയൺസ്‌ വാരിയേഴ്‌സ് മികച്ച പ്രകടനം കാഴ്ച വച്ച് രണ്ടാം സ്‌ഥാനം കരസ്ഥമാക്കി.

വൂസ്റ്റർ തെമ്മാടീസ്, എവർഷൈൻ ബ്രദേഴ്‌സ് കാന്റർബറി എന്നിവർ യഥാക്രമം മൂന്ന് നാല് സ്‌ഥാനങ്ങൾ നേടി. ആദ്യ റൗണ്ടിൽ എല്ലാ മത്സരങ്ങളിലും വിജയിച്ച കൊമ്പൻസ് കാന്റർബറി ടീമിന്റെ പ്രകടനവും കാണികളുടെ ശ്രദ്ധയാകർഷിച്ചു .

വനിതാ വിഭാഗത്തിൽ ആതിഥേയരായ ഒരുമ ബ്ലാക്ക്ബേൺ, ക്യുൻസ് ഓൾധാം, സ്റ്റോക്ക് എലൈറ്റ് എന്നീ ടീമുകൾ രണ്ടു, മൂന്നു, നാല് സ്‌ഥാനങ്ങൾ നേടി. രണ്ടു വിഭാഗങ്ങളിലുമായി 4800 പൗണ്ടിൽ അധികം ക്യാഷ് പ്രൈസും 75ൽ അധികം ട്രോഫികളും വിതരണം ചെയ്തു.