ഓസ്‌ട്രേലിയന്‍ ദമ്പതികളുടെ ജീവിതത്തിലേക്ക് ഒരേസമയം നാല് പെണ്‍കുഞ്ഞുങ്ങള്‍ കൂടി വന്നതോടെ കുടുംബത്തിന്റെ സാഹചര്യങ്ങള്‍ മാറാന്‍ തുടങ്ങി. മൂന്ന് മക്കളുടെ മാതാപിതാക്കളായിരുന്ന ദമ്പതികള്‍ക്കിടയിലേക്ക് നാലാമത്തെ പ്രസവത്തില്‍ നാല് കുഞ്ഞുങ്ങള്‍കൂടി കടന്നുവന്നതോടെ ആകെ കുട്ടികളുടെ എണ്ണം ഏഴായി. നാല് പെണ്‍കുഞ്ഞുങ്ങളുടെ ഒന്നിച്ചുള്ള ജനനം കുടുംബത്തിന് സന്തോഷം നല്‍കിയെങ്കിലും ഇതോടൊപ്പം നിരവധി പ്രോയോഗിക വെല്ലുവിളും ഉയരാന്‍ തുടങ്ങി. പ്രത്യേകിച്ച്, കുടുംബത്തിലെ എല്ലാവര്‍ക്കും ഒന്നിച്ച് യാത്രചെയ്യാനായി നിലവിലുള്ള കാറില്‍ മതിയായ സീറ്റുകള്‍ ഇല്ലാത്തതാണ് കുടുംബം നേരിടുന്ന വലിയ പ്രശ്‌നം.

ഏഴ് മക്കളുമായി നടത്തേണ്ടി വരുന്ന ആശുപത്രി സന്ദര്‍ശനങ്ങള്‍, സ്‌കൂള്‍ യാത്രകള്‍, കുടുംബസമേതമുള്ള യാത്രകള്‍ എന്നിവ സുഗമമാക്കുന്നതിനായി പത്ത് സീറ്റുകളുള്ള ഒരു വാന്‍ വാങ്ങാനായി ധനസമാഹരണം ആരംഭിച്ചിരിക്കുകയാണ് കുടുംബം. നാല് പെണ്‍കുഞ്ഞുങ്ങളുടെ ജനനം ജീവിതത്തിലെ മറക്കാനാകാത്ത അനുഗ്രഹമാണെന്ന് മാതാപിതാക്കള്‍ പ്രതികരിച്ചു. എന്നാല്‍, ഇത്ര വലിയ കുടുംബത്തിന്റെ ആവശ്യങ്ങള്‍ നിറവേറ്റാന്‍ ഗണ്യമായ സാമ്പത്തിക ചെലവ് ആവശ്യമായി വരുന്നതായും അവര്‍ പറഞ്ഞു. ഡയപ്പറുകള്‍, കുഞ്ഞുങ്ങളുടെ ഭക്ഷണം, വസ്ത്രങ്ങള്‍ തുടങ്ങിയ ദൈനംദിന ചെലവുകള്‍ക്ക് പുറമെ സുരക്ഷിതവും വിശാലവുമായ ഒരു വാഹനം വാങ്ങുകയെന്നതാണ് ഇപ്പോഴത്തെ ഏറ്റവും വലിയ ആവശ്യമായി മാറിയിരിക്കുന്നത്.

കുടുംബത്തിന്റെ സാഹചര്യം മനസിലാക്കിയ സുഹൃത്തുക്കളും പ്രദേശവാസികളും വിവിധ രീതികളില്‍ സഹായവുമായി രംഗത്തെത്തിയിട്ടുണ്ട്. നിരവധിപേര്‍ കുടുംബത്തിന് ആശംസകളും പിന്തുണയും അറിയിച്ച് മുന്നോട്ടുവരുന്നുണ്ട്.