യുഎസ് ടെന്നീസ് അസ്സോസിയേഷന്‍ അടുത്തിടെ തുടര്‍ച്ചയായി വിവാദത്തില്‍പ്പെടുന്നുണ്ട്. കോര്‍ട്ടില്‍ വെച്ച് വസ്ത്രം അഴിച്ച ആലിസ് കോര്‍നെറ്റിനെതിരെ യുഎസ് അസ്സോസിയേഷന്‍ കടുത്ത നടപടിയെടുത്തത് വിവാദമായിരുന്നു. വിമര്‍ശനങ്ങളും വിവാദങ്ങളും തുടര്‍ക്കഥയായതോടെ യുഎസ് ടെന്നീസ് അസ്സോസിയേഷന്‍ അംപയറിങ് പോളിസികള്‍ പുനഃപരിശോധിക്കുമെന്ന് അറിയിച്ചിരുന്നു. എന്നാല്‍, ഇതിനെല്ലാം പിന്നാലെ മറ്റൊരു വിവാദത്തിന് വഴി തുറന്നിരിക്കുകയാണ്.

യു.എസ് ഓപ്പണില്‍ പരാജയപ്പെട്ടതിന് പിന്നാലെ റാക്കറ്റ് നിലത്തെറിഞ്ഞ് ഒടിക്കുകയും അംപയറോട് തര്‍ക്കിക്കുകയും ചെയ്ത സെറീനയെ കഥാപാത്രമാക്കി രംഗത്തിറക്കിയ കാര്‍ട്ടൂണിനെതിരെയാണ് ലോകവ്യാപകമായി പ്രതിഷേധം ഉയരുന്നത്. ആസ്‌ട്രേലിയന്‍ കാര്‍ട്ടൂണിസ്റ്റ് മാര്‍ക്ക് നൈറ്റ് ആണ് പരിഹാസവുമായി രംഗത്തെത്തിയത്. കാര്‍ട്ടൂണ്‍ വംശീയമായി അധിക്ഷേപിക്കുന്നതാണ് എന്ന വിമര്‍ശനമാണ് ഉയരുന്നത്. ഹാരിപോര്‍ട്ടര്‍ രചയിതാവ് ജെ.കെ റൗളിങ് അടക്കമുള്ള പ്രമുഖര്‍ കാര്‍ട്ടൂണിനെ വിമര്‍ശിച്ച് രംഗത്തെത്തിയിട്ടുണ്ട്. 19-ാം നൂറ്റാണ്ടിലും, 20-ാം നൂറ്റാണ്ടിലും കറുത്ത വര്‍ഗക്കാരെ പരിഹസിക്കാന്‍ ഉപയോഗിച്ച രീതിയിലാണ് കാര്‍ട്ടൂണ്‍ വരച്ചിരിക്കുന്നതെന്ന് വാഷിങ്ടണ്‍ പോസ്റ്റ് നിരീക്ഷിക്കുന്നുണ്ട്. മത്സര വിജയിയായ നവോമി ഒസാകയെ വെള്ളക്കാരി ആയി കാര്‍ട്ടൂണില്‍ ചിത്രീകരിച്ചിരിക്കുന്നതിനേയും ആളുകള്‍ വിമര്‍ശിക്കുന്നുണ്ട്.

മെല്‍ബണിലെ ഹെറാള്‍ഡ് സണ്‍ പത്രത്തിലാണ് തിങ്കളാഴ്ച കാര്‍ട്ടൂണ്‍ അച്ചടിച്ചു വന്നത്. പുരുഷശരീരത്തോട് സാദൃശ്യമുള്ള ശരീരത്തോടും തടിച്ച ചുണ്ടുകളോടും കൂടിയ ചിത്രമാണ് സെറീനയുടെതായി വരച്ചിരിക്കുന്നത്. തകര്‍ന്ന് വീണ റാക്കറ്റിനു മുകളില്‍ ചാടുന്ന സെറീനയാണ് ചിത്രത്തില്‍. അവരെ ജയിക്കാന്‍ അനുവദിക്കാമായിരുന്നില്ലേ എന്ന് തൊട്ടപ്പുറത്ത് അംപയര്‍ ഒസാകയോട് ചോദിക്കുന്നതായും കാര്‍ട്ടൂണിലുണ്ട്. യു.എസ് മാധ്യമങ്ങളിലും സമൂഹ മാധ്യമങ്ങളിലും ശക്തമായ വിമര്‍ശനം ഉയര്‍ന്നതോടെ കാര്‍ട്ടൂണിലൂടെ താന്‍ വംശീയ അധിക്ഷേപം ഉദ്ദേശിച്ചിട്ടില്ലെന്ന ന്യായീകരണവുമായി മാര്‍ക്ക് നൈറ്റ് രംഗത്ത് വന്നിട്ടുണ്ട്.

ആളുകള്‍ക്ക് ബുദ്ധിമുട്ട് ഉണ്ടാക്കിയതില്‍ ഖേദം ഉണ്ട്. എന്നാല്‍ കാര്‍ട്ടൂണ്‍ പിന്‍വലിക്കാന്‍ സാധിക്കില്ല. കാര്‍ട്ടൂണില്‍ വംശീയതയോ ലൈംഗികതയോ ഇല്ലെന്നും കോര്‍ട്ടിലെ സെറീനയുടെ മോശം പെരുമാറ്റത്തെ സൂചിപ്പിക്കുക മാത്രമാണ് ചെയ്തതെന്നും അദ്ദേഹം പറഞ്ഞു. ആളുകള്‍ ഇതിനെ തെറ്റായി വ്യാഖ്യാനിക്കുകയാണ് എന്ന് നൈറ്റ് മാധ്യമങ്ങളോട് പറഞ്ഞു. ആസ്‌ട്രേലിയന്‍ പുരുഷ ടെന്നീസ് താരം മോശമായി പെരുമാറിയപ്പോഴും താന്‍ ഇത്തരത്തില്‍ കാര്‍ട്ടൂണ്‍ വരച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

എന്നാല്‍ ഇതുകൊണ്ടൊന്നും പ്രതിഷേധങ്ങള്‍ അവസാനിക്കുന്നില്ല. ലജ്ജാകരം എന്നാണ് നാഷണല്‍ അസോസിയേഷന്‍ ഓഫ് ബ്ലാക്ക് ജേര്‍ണലിസ്റ്റ്, കാര്‍ട്ടൂണിനെ വിശേഷിപ്പിച്ചത്.