ചുണ്ടു ചുവപ്പിക്കാൻ വിചിത്രമായൊരു മാർ​ഗം സ്വീകരിച്ച യുവതിയുടെ വീഡിയോ ആണ് ഇപ്പോൾ സമൂഹമാധ്യമത്തിൽ വൈറലാകുന്നത്. ലിപ്സ്റ്റിക്കിനു പകരം പ്രകൃതിദത്ത ഉത്പന്നങ്ങളായ ബീറ്റ്റൂട്ടും റോസാപ്പൂവിതളുകളുമൊക്കെ ഉപയോ​ഗിക്കുന്നത് കണ്ടിട്ടുണ്ടാവും. എന്നാൽ ഇവിടെ ലിപ്സ്റ്റിക്കിനു പകരം മൈലാഞ്ചി ഉപയോ​ഗിച്ച വീഡിയോ ആണ് വൈറലാകുന്നത്. ചിക്കാ​ഗോയിൽ നിന്നുള്ള മോഡലും ബ്യൂട്ടി ബ്ലോ​ഗറുമായ ബ്രിയാന ക്രിസ്റ്റ്യാൻസൺ എന്ന യുവതിയാണ് വീഡിയോ പോസ്റ്റ് ചെയ്തത്.

മെഹന്ദി കോണിൽ നിന്നും മൈലാഞ്ചി ഒരു ചെറിയ പാത്രത്തിലേക്കു മാറ്റി ബ്രഷ് ഉപയോ​ഗിച്ച് ചുണ്ടിൽ പുരട്ടുന്നതാണ് വീഡിയോയിലുള്ളത്. ഉണങ്ങിയതിനുശേഷം മൈലാഞ്ചി നീക്കം ചെയ്യുന്നതും ചുവന്ന ചുണ്ടുകൾ കാണിക്കുന്നതും വീഡിയോയിൽ കാണാം. എന്നാൽ നിരവധി പേരാണ് യുവതിയെ വിമർശിച്ച് കമന്റ് ചെയ്തിരിക്കുന്നത്. കൈകാലുകളിലോ മുടിയിലോ അല്ലാതെ മറ്റെവിടെയും ഇവ ഉപയോ​ഗിക്കരുതെന്നും കെമിക്കലുകളാൽ നിർമിതമായ ഇത്തരം മൈലാഞ്ചി ചുണ്ടിൽ പുരട്ടുക വഴി അലർജി ഉണ്ടായേക്കമെന്നുമൊക്കെ പോകുന്നു കമന്റുകൾ. കുറച്ചു ദിവസം കഴിയുമ്പോൾ മൈലാഞ്ചി അവിടവിടെയായി മാഞ്ഞുപോയി തുടങ്ങുമെന്നും അപ്പോൾ ചുണ്ട് കൂടുതൽ വൃത്തികേടാവുമെന്നും പറയുന്നവരുണ്ട്. സം​ഗതി കൈവിട്ടുപോയെന്നു മനസ്സിലായതോടെ മറ്റൊരു വീഡിയോയുമായി ബ്രിയാന രം​ഗത്തെത്തി. ഇനിയാരും ഇത്തരത്തിൽ ചുണ്ടിൽ മൈലാഞ്ചി പുരട്ടരുതെന്നും ബ്രിയാന അഭ്യർഥിക്കുന്നുണ്ട്.  രണ്ടുദിവത്തിനുള്ളിൽ ചുണ്ടിലെ നിറം മാഞ്ഞുപോയെന്നും കോണിൽ ഹാനികരമായ കെമിക്കൽ ചേരുവകൾ ഉണ്ടെന്നത് പിന്നീടാണ് ശ്രദ്ധിച്ചതെന്നും പറഞ്ഞാണ് ബ്രിയാന വീഡിയോ പോസ്റ്റ് ചെയ്തത്.