രാജ്യത്ത് ഇപ്രാവശ്യം മൺസൂൺ മഴയുടെ അളവ് സാധാരണയിലേതിനെക്കാൾ കുറയുമെന്ന് മുന്നറിയിപ്പ്. പസഫിക് സമുദ്രത്തിലെ താപനില കുറയുന്ന 'എൽ നിനോ' പ്രതിഭാസമാണ് ഇതിനുകാരണമെന്നാണ് വിലയിരുത്തപ്പെടുന്നത്.

യുഎസ് ദേശീയ കാലാവസ്ഥാ ഏജൻസിയായ യുഎസ് നാഷണൽ ഓഷ്യാനിക് അറ്റ്മോസ്‌ഫറിക് (എൻ ഒ എ എ) ഇതുസംബന്ധിച്ച റിപ്പോർട്ട് പുറത്തുവിട്ടു. ജൂൺ ഓഗസ്റ്റ് മാസങ്ങളിൽ എൽനിനോ ശക്തിപ്രാപിക്കുമെന്നാണ് റിപ്പോർട്ടിലുള്ളത്. തൽഫലമായി ഇന്ത്യയിൽ ചൂടുയരുകയും മൺസൂൺ ദുർബലപ്പെടുകയും ചെയ്യാമെന്നും റിപ്പോർട്ടിൽ മുന്നറിയിപ്പുണ്ട്.

എൻ ഒ എ എയുടെ കാലാവസ്ഥാപ്രവചന കേന്ദ്രത്തിന്റെ (സിപിസി) നിരീക്ഷണത്തിൽ ജൂണിനും ഓഗസ്റ്റിനും ഇടയിൽ എൽനിനോ ഉണ്ടാകാനുള്ള സാദ്ധ്യത 62 ശതമാനമാണെന്നും തുടർന്നുള്ള മാസങ്ങളിൽ ഇത് 80 ശതമാനമായി ഉയരാമെന്നും മുന്നറിയിപ്പുണ്ട്. ഭൂമദ്ധ്യരേഖയ്‌ക്ക് മദ്ധ്യ-കിഴക്ക് സമുദ്രോപരിതലം ചൂടുപിടിക്കുന്ന പ്രതിഭാസമാണ് എൽനിനോ. രണ്ടുമുതൽ ഏഴുവർഷങ്ങളുടെ വ്യത്യാസത്തിൽ എൽ നിനോ ആവർത്തിക്കാൻ സാദ്ധ്യതയുണ്ട്. എൽനിനോ അനുഭവപ്പെടുന്ന കാലത്ത് ഇന്ത്യയിൽ മൺസൂൺ മഴ കുറയുന്ന സാഹചര്യം മുമ്പുണ്ടായിട്ടുണ്ട്.