മെട്രോ വീണ്ടും വാര്‍ത്തകളില്‍ നിറയുന്നു. ഇന്ത്യയിലെ ആദ്യ മെട്രൊ റെയില്‍ ഡോര്‍മെറ്ററി സംവിധാനം എം ജി റോഡ് മെട്രോ സ്‌റ്റേഷനില്‍ ആരംഭിച്ചു . എസി ട്രെയിന്‍ കമ്പാര്‍ട്ടുമെന്റിന്റെ മാതൃകയില്‍ നിര്‍മ്മിച്ചിട്ടുള്ള മെട്രോ റെയില്‍ ഡോര്‍മെറ്ററിയില്‍ 200 കിടക്കകളും, 40 ശുചിമുറികളുമാണ് ഉള്ളത്. കൂടാതെ മൊബൈല്‍ ചാര്‍ജിംഗ് പോയിന്റ്, റീഡിംഗ് ലൈറ്റ് തുടങ്ങിയവ എന്നീ സൗകര്യങ്ങളും എല്ലാ ബെഡുകളിലും നല്‍കിയിട്ടുണ്ട്. ഉപഭോക്താക്കളുടെ സ്വകാര്യത ഉറപ്പു വരുത്തുവാനും സ്ത്രീകളുടെ സംരക്ഷണത്തിനുമായി യി പ്രത്യേകം കംപാര്‍ട്ട്‌മെന്റ് മുറികളും ഡോര്‍മെറ്ററിയില്‍ സജ്ജമാക്കിയിട്ടുണ്ട്. രാത്രി ഏഴു മണിക്ക് ചെക്ക് ഇന്‍ ചെയ്യുന്ന ഒരാള്‍ക്കു രാവിലെ എട്ടു മണിവരെയാണു താമസത്തിനുള്ള അനുവദനീയ സമയം. പകല്‍ സമയ വിശ്രമത്തിനും മെട്രോ റെയില്‍ ഡോര്‍മെറ്ററി സൗകര്യം ഒരുക്കുന്നുണ്ട്. 395 രൂപയാണ് ഡോര്‍മെറ്ററിയിലെ രാത്രി സമയ താമസത്തിന്. മൂന്നാര്‍, വാഗമണ്‍, കുമരകം, ഗുരുവായൂര്‍ എന്നിവിടങ്ങളിലേക്കു യഥാക്രമം 3900, 3100, 2750 രൂപകളിലുള്ള ഡേ ടൂര്‍ പാക്കേജുകളും രണ്ടു രാത്രികളില്‍ സൗജന്യ താമസ സൗകര്യവും ഇവര്‍ ഉപഭോക്താക്കള്‍ക്കായി ക്രമീകരിച്ചിട്ടുണ്ട്.
സുരക്ഷിതവും വൃത്തിയുള്ളതുമായ സ്ഥലത്ത് സ്വച്ഛമായ വിശ്രമമാണു മെട്രോ റെയില്‍ ഡോര്‍മെറ്ററിയിലൂടെ ലക്ഷ്യമിടുന്നതെന്ന് പീറ്റേഴ്‌സ് ഇന്‍ കമ്പനിയുടെ മാനേജിംഗ് ഡയറക്ടര്‍ ഫ്രാന്‍സിസ് മുക്കാണിക്കല്‍ പറഞ്ഞു. ഡോര്‍മെറ്ററി സംവിധാനം വിജയകരമായാല്‍ മറ്റു സ്‌റ്റേഷനുകളിലേയ്ക്കു കൂടി വ്യാപിപ്പിക്കുമെന്നും അദ്ദേഹം കൂട്ടിചേര്‍ത്തു. വിവാഹ ആവശ്യങ്ങള്‍ക്കായും യാത്രാപരിപാടികള്‍ക്കായും എത്തുന്നവര്‍ക്കു ചെലവ് കുറഞ്ഞ രീതിയില്‍ ഒന്നിച്ചു താമസിക്കുവാനും 900 രൂപയ്ക്ക് കൊച്ചിയിലെ കാഴ്ചകള്‍ ആസ്വദിക്കുവാനും മെട്രൊ റെയില്‍ ഡോര്‍മെറ്ററി സംവിധാനം ഒരുക്കുന്നുണ്ട്.