ഉദയകുമാർ ഉരുട്ടിക്കൊലകേസിൽ രണ്ട് പോലീസുകാർക്ക് വധശിക്ഷ വിധിക്കുമ്പോൾ സമാന്തരങ്ങളില്ലാത്ത ചരിത്രമാണ് കേരളത്തിന് ലഭിക്കുന്നത്. ഇന്ത്യൻ ചരിത്രത്തിൽ ആദ്യമായാണ് രണ്ടുതവണ പോലീസുകാർക്ക് വധശിക്ഷ വിധിക്കുന്നത്. ഈ രണ്ടുതവണയും ശിക്ഷ വിധിച്ചത് കേരളം സംസ്ഥാനത്ത് നിന്നുള്ള കേസുകളിലായിരുന്നു. സർവീസിലിരിക്കുന്ന പോലീസുകാർക്ക് ശിക്ഷ ലഭിക്കുന്ന സംഭവം രാജ്യത്ത് സംഭവിച്ചത് രണ്ടുതവണ. ഇത് രണ്ടും കേരളത്തിലാണ്. 1983 ൽ ആയിരുന്നു ആദ്യ സംഭവം. ഇപ്പോൾ ഉദയകുമാറിന്റെ മരണം രണ്ടാം സംഭവവും. സർവീസിലിരിക്കെ പോലീസുകാർക്ക് വധ ശിക്ഷ വിധിക്കുന്ന രണ്ടാമത്തെ കേസാണ് ഉദയകുമാർ ഉരുട്ടിക്കൊല. കസ്റ്റഡി മരണത്തിന് വധശിക്ഷ വിധിച്ച രാജ്യത്തെ ആദ്യകേസും കേരളത്തിലേത് തന്നേ.

1983 ൽ തൃശൂർ ജില്ലയിലെ മലക്കപാറയിലെ കസ്റ്റഡി മരണത്തിലാണ് പോലീസുകാരന് ആദ്യ വധശിക്ഷ ലഭിച്ചത്. മലക്കപാറ പോലീസ് സ്റ്റേഷനിലെ റൈറ്ററായിരുന്ന ബാലകൃഷ്ണനാണ് ശിക്ഷ ലഭിച്ചത്. പക്ഷെ പിന്നീട് ഹൈക്കോടതി ഇടപെട്ട് ഇത് ജീവ പര്യന്തമാക്കുകയും സുപ്രീംകോടതി വെറുതെ വിടുകയും ചെയ്തു. 1982 സെപ്റ്റംബർ 23 നാണ് സംഭവം. വെറ്റിലപ്പാറ സ്വദേശി ആദിവാസി രാമനെ മലക്കപ്പാറ പോലീസ് സ്റ്റേഷനിലെ ലോക്കപ്പിൽ ഇട്ട് മർധിച്ചുകൊന്നു എന്നായിരുന്നു കേസ്. കൊലപാതകം ഉൾപ്പെടെയുള്ള പല കേസുകളിലും പോലീസുകാർ ശിക്ഷിക്കപ്പെടുകയും ജയിലിൽ കിടക്കുകയും ചെയ്തിട്ടുണ്ട്. കസ്റ്റഡി മരണത്തിലും അല്ലാതെയുമായി മൂന്ന് കേസുകളിൽ പോലീസുകാർ ജീവപര്യന്തം ശിക്ഷിക്കപ്പെട്ടു. എറണാകുളത്തെ പ്രവീൺ വധക്കേസിൽ ഡിവൈഎസ്പി ഷാജി ജീവ പര്യന്തം തടവ് ശിക്ഷ അനുഭവിച്ചുകൊണ്ട് ഇരിക്കുകയാണ്. പലിനൂർ സോമൻ കേസിലും പോലീസ് ഉദ്യോഗസ്ഥന് ശിക്ഷ ലഭിച്ചു.

ഒരാളെ പോലീസ് അറസ്റ് ചെയ്‌താൽ അടുത്ത ബന്ധുക്കളെ അറിയിക്കണമെന്നാണ് സുപ്രീം കോടതിയുടെ നിർദ്ദേശം. നിയമ സഹായം തേടാൻ അനുവാദവും നൽകണം. എന്തിനാണ് പിടികൂടിയതെന്ന കാര്യം അയാളെ അറിയിക്കണം. അറസ്റ് രേഖപ്പെടുത്തി ഇരുപത്തിനാല് മണിക്കൂറിനകം കോടതിയിൽ ഹാജരാക്കണം. പലപ്പോഴും ഇത്തരം കർശനമായ നിർദ്ദേശങ്ങൾ നിലനിൽക്കെത്തന്നെ ഇതൊന്നും പോലീസുകാർ പാലിക്കാറില്ല. തുടരെത്തുടരെയുള്ള വീഴ്ചകളിൽ നിന്ന് പാഠം പഠിക്കാതെ നിൽക്കുന്ന പോലീസുകാർക്ക് കൃത്യമായ താക്കീത് നൽകുന്നതാണ് ഈ വിധി.