കണ്ണീരടക്കാനാവാതെ.... പേരാമ്പ്രയിൽ ഓടിക്കൊണ്ടിരുന്ന കാറിന് തീപിടിച്ച് അപകടം. വാഹനത്തിലുണ്ടായിരുന്ന ഗർഭിണി വെന്തുമരിച്ചു. ഭർത്താവിന് ഗുരുതരമായി പരുക്കേൽക്കുകയും ചെയ്തു. ചെറുവണ്ണൂർ സ്വദേശി പൂവത്തും ചാലിൽ ലാലുവിൻറെ ഭാര്യ സോനയാണ് മരിച്ചത്.

ഡോക്ടറെ കാണിച്ച് തിരിച്ചുവരുമ്പോഴാണ് അപകടം സംഭവിച്ചത്. സോന കാറിൻറെ പിൻസീറ്റിലാണ് ഇരുന്നിരുന്നത്. വാഹനം ഓടിച്ചിരുന്നത് ഭർത്താവ് ലാലുവാണ്. വാഹനത്തിൽ പുക കണ്ടതോടെ ലാലുവിന് ഡോർ തുറന്ന് പുറത്തിറങ്ങാനായി.

എന്നാൽ ഡോർ ലോക്കായി പോയതിനാൽ സോനയ്ക്ക് പുറത്തിറങ്ങാൻ കഴിഞ്ഞി്ല്ല. നാട്ടുകാർ ഉടനെ എത്തി സോനയെ പുറത്തിറക്കാനായി നോക്കിയെങ്കിലും സാധിച്ചില്ല. അപ്പോഴേക്കും ഫയർ ഫോഴ്സ് എത്തിയെങ്കിലും കാർ ഏതാണ്ട് പൂർണമായി കത്തിയിരുന്നു. പേരാമ്പ്രയിലെ കല്ലോട്ടെ ആശുപത്രിയിലേക്ക് സോനയെ എത്തിച്ചപ്പോഴേക്കും മരണം സംഭവിച്ചു.

ഏഴ് മാസം ഗർഭിണിയായിരുന്നു സോന. പരിക്കേറ്റ ലാലുവിനെ കോഴിക്കോട് മെഡിക്കൽ കോളേജ് ആശുപത്രിയിലേക്ക് കൊണ്ടുപോയി. എങ്ങനെയാണ് കാറിന് തീപിടിച്ചതെന്ന് അറിവായിട്ടില്ല.