കനകദുര്‍ഗയും ബിന്ദുവും ശബരിമല ദര്‍ശനം നടത്തിയതിന് പിന്നാലെ ശ്രീലങ്കന്‍ യുവതി ദര്‍ശനം നടത്തിയതും അതിന് പിന്നാലെ അവരും പൊലീസും നടത്തിയ നാടകം മാധ്യമങ്ങളെ പോലും ഞെട്ടിച്ചു. ഭര്‍ത്താവ് ശരവണമാരനും മകനും ഒപ്പം എത്തിയ ശശികലയേയും കൊണ്ട് പൊലീസ് മലകയറി. മാധ്യമങ്ങള്‍ പിന്നാലെയുണ്ടായിരുന്നു. എന്നാല്‍ മരക്കൂട്ടത്ത് വെച്ച് ഭര്‍ത്താവിനെയും മകനെയും വഴി മാറ്റിവിട്ടു. ദര്‍ശനം നടത്തിയ ശേഷം താന്‍ കയറിയില്ലെന്നും പതിനെട്ടാംപടിക്കല്‍ വെച്ച് പൊലീസ് പറഞ്ഞയച്ചെന്നും ശശികല മാധ്യമങ്ങളോട് ക്ഷുഭിതയായി. അത് പൊലീസ് എഴുതിയ തിരക്കഥയിലെ പ്രധാന ഭാഗമായിരുന്നു. ശശികല അത് ഭംഗിയായി അഭിനയിക്കുകയും ചെയ്തു.

ശശികലയും ഭര്‍ത്താവും പമ്പ പൊലീസ് കണ്‍ട്രോള്‍റൂമില്‍ എത്തിയപ്പോഴേ പൊലീസ് എല്ലാ സുരക്ഷയും ഒരുക്കാമെന്നും തങ്ങള്‍ പറയുന്നത് അനുസരിക്കണമെന്നും നിര്‍ദ്ദേശിച്ചു. അതിന് അനുസരിച്ചാണ് ദര്‍ശനം നടത്തിയ ശേഷം പതിനെട്ടാംപടി കയറിയില്ലെന്നും പൊലീസ് തിരിച്ചയച്ചെന്നും ശശികല മാധ്യമങ്ങളോട് ക്ഷുഭിതയായത്. യുവതി ദര്‍ശനം നടത്തിയെന്ന വാര്‍ത്ത പരന്നെങ്കിലും സ്ഥിരീകരിക്കാന്‍ പൊലീസോ, മുഖ്യമന്ത്രിയുടെ ഓഫീസോ, മറ്റ് ഔദ്യോഗിക വൃത്തങ്ങളോ തയ്യാറായില്ല. അതിന് കാരണം ശശികലയ്ക്കും കുടുംബത്തിനും സുരക്ഷാഭീഷണി ഉണ്ടാകുമെന്ന് അറിയാമായിരുന്നത് കൊണ്ടാണ്.

ശശികലയും ഭര്‍ത്താവും മകനും സംസ്ഥാനം വിട്ട ശേഷമാണ് പതിനെട്ടാംപടി കയറി ദര്‍ശനം നടത്തിയെന്ന വാര്‍ത്ത പൊലീസും മുഖ്യമന്ത്രിയുടെ ഓഫീസ് സ്ഥിരീകരിച്ചത്. ഇന്നലെ മുതല്‍ പല വാര്‍ത്താ ചാനലുകളും യുവതി മലകയറിയെന്ന് പറഞ്ഞെങ്കിലും പൊലീസ് അത് സ്ഥിരീകരിച്ചില്ല. വാര്‍ത്തകള്‍ പരന്നിട്ടും സന്നിധാനത്തും പമ്പയിലും പ്രതിഷേധം ഉണ്ടായില്ല. ഇപ്പോള്‍ പമ്പയില്‍ പ്രതിഷേധത്തിന് സാധ്യതയുണ്ടെന്ന് പൊലീസ് രഹസ്യാന്വേഷണ വിഭാഗം പറയുന്നു. പൊലീസിനെയും സര്‍ക്കാരിനേയും വെല്ലുവിളിച്ച കര്‍മസമിതിയും ബി.ജെ.പിയും ശശികലയുടെ ദര്‍ശനത്തെ കുറിച്ച് ഉച്ചവരെ പ്രതികരിക്കുകയോ, പ്രതിഷേധിക്കുകയോ ചെയ്തില്ല. 

അതേസമയം യുവതി ദര്‍ശനം നടത്തിയതായി ദ ഹിന്ദു പത്രം റിപ്പോര്‍ട്ട് ചെയ്തിട്ടുണ്ട്. ഒരു ഉന്നത പൊലീസ് ഉദ്യോഗസ്ഥന്റെ കമന്റോടെയാണ് റിപ്പോര്‍ട്ട് പ്രസിദ്ധീകരിച്ചിരിക്കുന്നത്. ദര്‍ശനം നടത്തിയ യുവതി സുരക്ഷിതയായി മടങ്ങിയെന്നും അതില്‍ പറയുന്നു. എന്നാല്‍ മലയാള പത്രങ്ങളിലൊന്നും ഈ വാര്‍ത്ത വന്നിട്ടില്ല എന്നത് ശ്രദ്ധേയമായി.